Kunsill Edukazzjoni, Żgħażagħ, Kultura u Sport, 24/02/2016, 24 ta' Frar 2016

Riżultati ewlenin

Il-Kunsill adotta riżoluzzjoni dwar l-iżvilupp soċjoekonomiku u l-inklużività fl-UE permezz tal-edukazzjoni. It-test jiffoka fuq miżuri li jiżguraw investiment immirat fl-edukazzjoni u kif l-aħjar jiġu indirizzati n-nuqqasijiet fil-ħiliet biex jerġa' jkun hawn l-impjiegi u jiġi promoss tkabbir ekonomiku sostenibbli fl-Ewropa. Fl-istess ħin, jenfasizza r-rwol daqstant importanti tal-edukazzjoni fil-promozzjoni taċ-ċittadinanza u l-inklużjoni soċjali.

Il-ministri ddiskutew kif jistgħu jiżdiedu s-sinerġiji bejn l-edukazzjoni, is-suq tax-xogħol u s-soċjetà bil-ħsieb li titqajjem kuxjenza u ssir enfasi fuq l-urġenza ta’ ħafna kwistjonijiet marbutin mal-iżvilupp tal-ħiliet.

Informazzjoni dwar il-laqgħa

Il-ministru Jet Bussemaker qal: "L-iżvilupp u l-użu ta' sett bilanċjat sew ta' ħiliet huwa kruċjali biex jgħin lit-tfal tal-iskola, l-istudenti, l-għalliema u l-adulti f'suq tax-xogħol dejjem aktar globali u li qed jinbidel".

Ir-riżultat tad-dibattitu ministerjali ser jikkontribwixxi għall-inizjattiva li ġejja tal-Kummissjoni "Aġenda Ġdida dwar il-Ħiliet għall-Ewropa", bil-għan li jiġi promoss l-investiment fin-nies tul il-ħajja kollha, kif ukoll li tiżdied l-impjegabbiltà.

Fl-aħħar nett, il-ministri kellhom żewġ skambji ta' fehmiet dwar il-promozzjoni taċ-ċittadinanza u l-valuri fundamentali permezz tal-edukazzjoni, b'segwitu għad-Dikjarazzjoni ta' Pariġi adottata kważi sena ilu fil-laqgħa informali tal-ministri għall-edukazzjoni f'Pariġi.

Il-ministri enfasizzaw li l-għan tal-edukazzjoni m’għandux ikun l-impjegabbiltà biss. Kompitu ewlieni ieħor huwa t-trawwim tar-rispett għall-valuri fundamentali komuni Ewropej, bħal-libertà tal-espressjoni, iċ-ċittadinanza demokratika u l-ugwaljanza.