Kunsill Affarijiet Barranin, 15/12/2014, 15 ta' Diċembru 2014

Strateġija reġjonali tal-UE għas-Sirja u l-Iraq

Is-Sirja u l-Iraq, kif ukoll il-ġlieda kontra l-ISIL kienu s-suġġetti prinċipali tal-Kunsill Affarijiet Barranin. Fil-marġini tal-laqgħa tal-Kunsill, ġie organizzat ukoll l-ewwel Kunsill ta' Assoċjazzjoni UE-Ukraina.

Is-Sirja u l-Iraq

Fil-laqgħa tagħhom fi Brussell, il-ministri tal-UE għall-Affarijiet Barranin tennew l-appoġġ sħiħ tagħhom għal Staffan de Mistura, il-Mibgħut Speċjali tan-NU għas-Sirja, fl-isforzi tiegħu biex inaqqas il-vjolenza u jistabbilixxi l-bażi għal proċess politiku usa'. L-UE ser taħdem mal-atturi kollha li jistgħu jkunu parti mis-soluzzjoni għall-kriżi Sirjana.

Il-ministri tal-UE qablu wkoll dwar miżuri konkreti:

• li jappoġġaw il-pjanijiet għall-iffriżar tal-ostilitajiet, speċjalment f'Aleppo
• għal għajnuna umanitarja  

Il-ministri wiegħdu wkoll appoġġ sħiħ għall-gvern tal-Iraq biex jiżviluppa politiki inklużivi u jimxi 'l quddiem rigward ir-rikonċiljazzjoni.

L-eżitu tad-diskussjonijiet tal-ministri tal-UE ser jikkontribwixxi għat-tħejjija ta' strateġija reġjonali komprensiva tal-UE dwar is-Sirja u l-Iraq kif ukoll dwar it-theddida tal-ISIL / Da'esh.

Suġġetti oħra fuq l-aġenda

Il-ministri tal-UE għall-affarijiet barranin iddiskutew il-prospetti tal-Bosnja-Ħerzegovina għal sħubija mal-UE. Huma qablu li jniedu proċess fuq bażi ġdida mingħajr ma jibdlu l-kondizzjonijiet marbutin mal-proċess tat-tkabbir.

Il-Kunsill ser jiddeċiedi dwar id-dħul fis-seħħ ta' Ftehim ta' Stabbilizzazzjoni u Assoċjazzjoni meta l-mexxejja kollha tal-BiH u l-Parlament tal-BiH japprovaw ir-riformi meħtieġa.

Fl-aħħar nett, il-koordinatur tal-UE dwar l-Ebola informa lill-ministri dwar ir-rispons Ewropew għat-tifqigħa.

Dwar l-Ukraina, il-Kunsill ikkonferma l-qbil tiegħu fil-prinċipju dwar proposta għal miżuri restrittivi addizzjonali tal-UE b'rispons għall-annessjoni illegali tal-Krimea u Sevastopol.

Il-ministri tal-UE approvaw ukoll diversi punti oħra mingħajr diskussjoni ("punti A"):

• konklużjonijiet dwar ir-Repubblika Ċentru-Afrikana
• konklużjonijiet dwar is-Sudan t'Isfel
• konklużjonijiet dwar l-inizjattiva ta' investiment tan-Nofsinhar tal-Mediterran (AMICI)
• il-ħatra tal-Ġeneral Mikhail Kostarakos mill-Greċja bħala l-President li jmiss tal-Kumitat Militari tal-UE
• azzjonijiet tal-UE kontra l-proliferazzjoni ta' armi ta' qerda massiva u ta' armi żgħar fir-reġjun tas-Saħel

L-ewwel laqgħa tal-Kunsill ta' Assoċjazzjoni UE-Ukraina

Fil-15 ta' Diċembru, il-Kunsill ta' Assoċjazzjoni rrikonoxxa l-ħtieġa li jiġu intensifikati r-riformi politiċi u ekonomiċi fl-Ukraina għall-implimentazzjoni tal-Ftehim ta' Assoċjazzjoni. 

Il-Prim Ministru Yatsenyuk u r-Rappreżentant Għoli Mogherini ddiskutew ukoll il-konflitt li għaddej fil-Lvant tal-Ukraina kif ukoll in-nonrikonoxximent tal-UE tal-annessjoni illegali tal-Krimea u Sevastopol mir-Russja.