Kunsill Affarijiet Barranin, 17-18/11/2014, 17 u 18 ta' Novembru 2014

Il-Kunsill jappoġġa t-tnedija mill-ġdid tad-djalogu dwar l-Ukraina

F’laqgħa tal-Kunsill Affarijiet Barranin ppreseduta minn Federica Mogherini, il-ministri tal-affarijiet barranin tal-UE ddiskutew is-sitwazzjoni attwali fl-Ukraina fis-17 ta’ Novembru, u fit-18 ta’ Novembru l-ministri tad-difiża tal-UE tkellmu dwar is-sigurtà u d-difiża. 

L-Ukraina kienet is-suġġett prinċipali tal-Kunsill Affarijiet Barranin ta' dan ix-xahar. Il-ministri tal-UE kellhom diskussjoni estensiva dwar il-ġrajjiet reċenti fir-reġjun, il-prospetti għall-paċi u l-aġenda għar-riforma tal-Ukraina.

Wara l-bumbardamenti qawwija reċenti u r-rapporti ta’ konvojs armati li daħlu minn fuq il-fruntiera Russa f’żoni miżmuma mis-separatisti, il-Kunsill ħeġġeġ lill-partijiet kollha biex jimplimentaw bis-sħiħ il-Protokoll ta' Minsk u biex jirrispettaw il-kondizzjonijiet tal-waqfien mill-ġlied.

L-UE għandha rwol ewlieni biex tieħu ħsieb li s-sitwazzjoni militari, soċjoekonomika u umanitarja ma tkomplix tmur għall-agħar. Il-Kunsill jappoġġa djalogu mġedded bejn Kiev u Moska biex tinstab soluzzjoni għall-kwistjoni.

Jiġu kkunsidrati sanzjonijiet ġodda

Wara li evalwaw is-sitwazzjoni ta' fuq il-post, il-ministri tal-UE talbu lis-SEAE u lill-Kummissjoni Ewropea biex jippreżentaw proposta dwar aktar sanzjonijiet kontra s-separatisti.

Il-Kunsill ser ikompli jsegwi mill-qrib is-sitwazzjoni ta' fuq il-post u jiddeċiedi jekk dawn is-sanzjonijiet għandhomx jiġu applikati.

Riformi fl-Ukraina

Il-Kunsill esprima sodisfazzjon dwar iż-żamma ta' elezzjonijiet parlamentari fis-26 ta’ Ottubru u appella biex jiġi fformat gvern ġdid malajr kemm jista' jkun.

Il-ministri tal-UE talbu lill-awtoritajiet ta’ Kiev biex jintrabtu li jwettqu riformi amministrattivi u ekonomiċi, li jinkludu bidliet kostituzzjonali u aktar deċentralizzazzjoni.

Il-Kunsill iffissa wkoll l-1 ta' Diċembru 2014 bħala d-data tat-tnedija tal-Missjoni ta' Konsulenza tal-UE għar-Riforma tas-Settur tas-Sigurtà Ċivili fl-Ukraina (EUAM Ukraine).

18 ta' Novembru 2014: sigurtà u difiża fuq l-aġenda tal-Kunsill

Il-ministri tad-difiża tal-UE mlaqqgħin fil-format tad-difiża tal-Kunsill Affarijiet Barranin iddiskutew il-Politika ta’ Sigurtà u ta’ Difiża Komuni (PSDK) tal-UE. 

Il-mexxejja tal-UE ser jiddiskutu l-għanijiet tal-PSDK fil-laqgħa tal-Kunsill Ewropew ta’ Ġunju 2015. Huma appellaw għal politika aktar effiċjenti, industrija tad-difiża aktar b’saħħitha u għal spinta fil-kapaċitajiet militari.

Fil-preżenza tas-Segretarju Ġenerali tan-NATO Jens Stoltenberg, il-ministri tad-difiża tal-UE ddiskutew is-sitwazzjoni fil-viċinat usa' Ewropew (prinċipalment l-Ukraina, l-Iraq, is-Sirja u l-Libja). Taw ħarsa wkoll lejn l-istatus tal-ħames operazzjonijiet militari Ewropej fil-Bosnja, ir-Repubblika Ċentru-Afrikana, il-Mali, is-Somalja u l-Golf ta’ Aden.

Suġġetti oħra fuq l-aġenda

Lvant Nofsani

Il-ministri tal-affarijiet barranin tal-UE ħadu kont tal-iżviluppi fil-proċess ta’ paċi fil-Lvant Nofsani, wara żjara tar-Rappreżentant Għoli fir-reġjun. L-UE hi mħassba serjament dwar iż-żieda fit-tensjoni u l-vjolenza fuq il-post.

L-UE hija partikolarment ħerqana biex jerġgħu jibdew taħditiet dwar proċess ta’ paċi għar-reġjun, mas-Segretarju tal-Istati Uniti John Kerry, fil-qafas tal-Kunsill tas-Sigurtà tan-NU, kif ukoll fil-livell reġjonali ma’ pajjiżi Għarab oħra.

Bosnja-Ħerzegovina

Abbażi tal-inizjattivi ta’ ċerti stati membri, il-ministri tal-affarijiet barranin tal-UE ddiskutew il-prospetti tal-Bosnja-Ħerzegovina għal sħubija mal-UE. Ir-Rappreżentant Għoli semmiet li l-ministri qablu li jniedu proċess fuq bażi ġdida mingħajr ma jibdlu l-kondizzjonijiet marbuta mal-proċess tat-tkabbir.

Ebola

Il-koordinatur tal-UE dwar l-Ebola, Christos Stylianides, għarraf lill-Kunsill dwar is-sejbiet ewlenin u l-prijoritajiet għal azzjoni li identifika wara ż-żjara reċenti tiegħu fl-Afrika tal-Punent.

Il-Kunsill faħħar l-impenn tiegħu li jsaħħaħ ir-reazzjoni kollettiva tal-Unjoni Ewropea u jikkoordina l-ħidma tiegħu man-Nazzjonijiet Uniti, organizzazzjonijiet reġjonali u sħab ewlenin oħra.

Libja

Il-ministri tal-UE ddiskutew ukoll il-ħidma li saret minn Bernadino León, Mibgħut Speċjali tan-NU għal-Libja, l-isforzi ta’ medjazzjoni tan-NU fil-pajjiż u kif l-UE tista’ tappoġġa lil-Libja tistabbilixxi stat stabbli, demokratiku u inklużiv.

Il-ministri adottaw ukoll, mingħajr diskussjoni:

• qafas ta' politika dwar iċ-ċiberdifiża
• qafas ta’ politika biex titjieb il-kooperazzjoni fit-tul dwar id-difiża
• konklużjonijiet dwar il-pjan ta’ azzjoni dwar il-liberalizzazzjoni tal-viżi għall-Ġeorġja