Kunsill Affarijiet Barranin, 21/11/2014, 21 ta' Novembru 2014

Nimxu 'l quddiem fis-Sħubija Trans-Atlantika ta’ Kummerċ u ta’ Investiment (TTIP)

F'laqgħa tal-Kunsill Affarijiet Barranin dwar kwistjonijiet kummerċjali, il-Kunsill ikkonferma d-determinazzjoni tiegħu li jikkonkludi ftehim mal-Istati Uniti malajr kemm jista' jkun.

It-TTIP ser jagħti spinta lit-tkabbir ekonomiku u l-ħolqien ta' impjiegi fl-UE 

It-TTIP għandu jipprovdi opportunitajiet ġodda sinifikanti għaċ-ċittadini u l-kumpanniji fl-UE u fl-Istati Uniti. Il-konklużjoni ta' ftehim bħal dan ser ikollu rwol ukoll fil-politika barranija tal-UE, filwaqt li jsaħħaħ politikament is-sħubija transatlantika strateġika. 

Sadanittant, il-Kunsill ser jiżgura li l-ftehim finali jkun jirrispetta l-istandards ta' kwalità tal-UE u l-leġislazzjoni tal-istati membri. 

Nikkomunikaw aħjar il-benefiċċji tal-ftehim tat-TTIP

Il-Kunsill irrikonoxxa l-ħtieġa tat-titjib tat-trasparenza u d-djalogu fis-soċjetà ċivili sabiex jiġu enfasizzati l-benefiċċji għaċ-ċittadini Ewropej. 

Aġenda tal-UE dwar il-Kummerċ

Il-Kunsill adotta wkoll konklużjonijiet dwar il-prijoritajiet tal-aġenda tal-UE dwar il-kummerċ għall-5 snin li ġejjin filwaqt li talab lill-Kummissjoni biex taġġorna l-istrateġija tal-UE dwar il-kummerċ u tinkludi rekwiżiti ta' trasparenza fin-negozjati.

Dwar is-Sħubija Trans-Atlantika ta’ Kummerċ u ta’ Investiment (TTIP)

L-UE u l-Istati Uniti ddeċidew li jieħdu r-relazzjoni ekonomika tagħhom livell ogħla billi qablu li jibdew negozjati dwar ftehim komprensiv ta' kummerċ u ta' investiment.  Dan il-ftehim għandu l-għan li jneħħi l-ostakoli għall-kummerċ f'firxa wiesgħa ta' setturi ekonomiċi biex jiffaċilita x-xiri u l-bejgħ ta' oġġetti u servizzi bejn l-UE u l-Istati Uniti.

Temi oħra fuq l-aġenda

Negozjati kummerċjali mal-Ġappun u l-Vjetnam

Il-ministri tal-UE għall-kummerċ ġew informati dwar il-progress li sar fin-negozjati mal-Ġappun u l-Vjetnam u dwar il-prospetti li dawn jiġu konklużi fl-2015.

Aġenda ta' Doha għall-Iżvilupp

Wara l-iżvilupp importanti li sar bejn l-Indja u l-Istati Uniti dwar kwistjonijiet tas-sigurtà tal-ikel, il-Kunsill iddiskuta l-prospett tal-konklużjoni ta' negozjati skont l-Aġenda ta' Doha għall-Iżvilupp (DDA) tad-WTO.

Il-ministri tal-UE għall-kummerċ iddiskutew ukoll proposti għal regolamenti li għandhom l-għan li jaġġornaw l-istrumenti tal-UE għall-indirizzar tal-kompetizzjoni inġusta fir-rigward ta':

• il-protezzjonikontra importazzjonijiet li jkunu s-suġġett ta' dumping jew ta' sussidji
• l-akkwist pubbliku f'pajjiżi terzi, il-kondizzjonijiet li fihom in-negozji tal-UE jistgħu jikkompetu għal kuntratti pubbliċi