Kunsill Affarijiet Barranin (Żvilupp), 16/05/2019, 16 ta' Mejju 2019

Riżultati ewlenin

Iż-żgħażagħ u l-iżvilupp

Il-ministri tal-UE għall-iżvilupp iddiskutew iż-żgħażagħ u l-iżvilupp flimkien ma' Jayathma Wickramanayake, il-Mibgħut għaż-Żgħażagħ tas-Segretarju Ġenerali tan-Nazzjonijiet Uniti.

Għall-Unjoni Ewropea l-investiment fiż-żgħażagħ huwa essenzjali. Kemm jekk fl-Afrika jew fil-Mediterran, aħna waqqafna fora biex ngħinu sabiex leħen iż-żgħażagħ jinstema’. Fil-laqgħa tagħna tal-lum iddiskutejna fit-tul l-importanza ta’ bidliet ġenerazzjonali anki fi ħdan istituzzjonijiet politiċi u l-ħtieġa li ż-żgħażagħ ikunu parti mill-proċessi tat-teħid tad-deċiżjonijiet. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Mibgħut fissret il-viżjoni u l-prijoritajiet tagħha għat-tisħiħ tal-parteċipazzjoni taż-żgħażagħ. Hija ssottolinjat il-ħtieġa li ma nibżgħux nagħtu liż-żgħażagħ ir-responsabbiltà u nsaħħuhom bil-ħiliet meħtieġa u l-aċċess għall-istituzzjonijiet sabiex ikunu jistgħu jagħmlu differenza fit-tfassil tal-politika. Hija ddeskriviet l-ostakli soċjali, ekonomiċi u politiċi li qed jiffaċċjaw iż-żgħażagħ, speċjalment it-tfajliet. Hija tat 6 rakkomandazzjonijiet għat-triq 'il quddiem: 1) nikkunsidraw l-emanċipazzjoni ekonomika taż-żgħażagħ bħala t-triq prinċipali għall-inklużjoni soċjali u drittijiet oħra, 2) niffokaw fuq bidliet transnazzjonali, 3) niżguraw li ż-żgħażagħ jifhmu l-valur tal-multilateraliżmu, 4) nimpenjaw liż-żgħażagħ fil-politika u nnaqqsu d-distakk fl-età bejn dawk li jiggvernaw u dawk iggvernati, 5) niggarantixxu l-finanzjament għaż-żgħażagħ għal terminu fit-tul, u 6) ninkludu liż-żgħażagħ fit-tfassil tal-politika f'livell orizzontali.

Il-ministri rrikonoxxew li ż-żgħażagħ u l-organizzazzjonijiet taż-żgħażagħ huma atturi soċjali essenzjali u li għandha ssir ħidma li tavvanza r-rwol pubbliku tagħhom u biex ikunu rikonoxxuti bħala sħab ugwali. Huma qablu li l-azzjonijiet kollha ta’ żvilupp għandu jkollhom il-ġenerazzjonijiet futuri bħala prijorità.

Huma qablu wkoll li ż-żgħażagħ għandhom ikunu dejjem aktar involuti fit-tfassil, l-implimentazzjoni u r-rieżami tal-politiki nazzjonali u lokali, u li għandhom jitneħħew l-ostakli għall-inseriment soċjali, ekonomiku, kulturali u politiku tagħhom. Il-ministri ħadu wkoll l-impenn li jintensifikaw l-isforzi biex jitnaqqsu l-ostakli partikolari li qed jiffaċċjaw iż-żgħażagħ, b’mod partikolari t-tfajliet.

Aġenda 2030 għall-iżvilupp sostenibbli

Il-ministri ddiskutew kif ser jinżamm il-momentum għall-aġenda 2030 u t-tibdil fil-klima fl-2019 fid-dawl tal-forum politiku ta' livell għoli dwar l-iżvilupp sostenibbli (8-19 ta’ Lulju 2019), u s-Summit dwar il-Klima (23 ta’ Settembru) u s-Summit dwar l-Għanijiet ta' Żvilupp Sostenibbli (SDG) (24-25 ta’ Settembru).

Huma rrikonoxxew li l-2019 tirrappreżenta opportunità unika għall-intensifikar tal-implimentazzjoni tal-Aġenda 2030 lejn il-kisba tal-SDGs. Huma ssottolinjaw li kien mument importanti għall-UE biex tassumi r-rwol ta' tmexxija u tiggarantixxi l-momentum għall-inizjattivi ta’ żvilupp sostenibbli.

Il-ministri għall-iżvilupp tal-UE fakkru li l-Aġenda 2030 u l-ftehim ta’ Pariġi dwar it-tibdil fil-klima jikkostitwixxu elementi fundamentali tal-parteċipazzjoni tal-UE fi ħdan l-arkitettura tal-iżvilupp globali, u huma vitali għall-prosperità fit-tul tal-UE.

• Konklużjonijiet tal-Kunsill "Lejn Unjoni dejjem aktar sostenibbli sal-2030", 9 ta’ April 2019
• Forum politiku ta' livell għoli dwar l-iżvilupp sostenibbli
• Summit dwar l-Għanijiet ta' Żvilupp Sostenibbli (SDG)

Is-Saħel

Il-ministri tal-UE għall-iżvilupp iddiskutew is-Saħel, wara l-adozzjoni tal-konklużjonijiet tal-Kunsill mill-ministri għall-affarijiet barranin fit-13 ta’ Mejju u l-laqgħa tal-ministri għad-difiża u għall-affarijiet barranin tal-UE mal-kontropartijiet tagħhom mill-pajjiżi tal-G5 tas-Saħel (il-Burkina Faso, iċ-Chad, il-Mali, il-Mauritania u n-Niġer) fl-14 ta’ Mejju.

Huma tennew l-importanza strateġika tas-Saħel għall-UE u ssottolinjaw l-impenn kontinwu tal-UE għar-reġjun, b’mod partikolari f’termini ta' għajnuna umanitarja u għall-żvilupp.

Huma rrikonoxxew l-importanza tal-approċċ integrat, li jikkombina d-djalogu politiku, il-kooperazzjoni dwar is-sigurtà (inkluż permezz tal-operazzjonijiet tal-PSDK u l-appoġġ dirett għall-Forza Konġunta tal-G5 tas-Saħel), u l-għajnuna għall-iżvilupp. Il-ministri tal-UE għall-iżvilupp esploraw modi kif jindirizzaw id-deterjorament reċenti fis-sitwazzjoni tas-sigurtà, u qablu li r-rispons għandu jkun multidimensjonali, u għandu jindirizza l-kwistjonijiet soċjoekonomiċi bl-istess importanza daqs dawk tas-sigurtà.

Huma rrikonoxxew l-urġenza fil-provvediment ta’ servizzi bażiċi lill-popolazzjonijiet lokali, l-indirizzar tat-tibdil fil-klima, u r-restawr tal-preżenza tal-istat.

• L-Unjoni Ewropea u s-Saħel, skeda informattiva (SEAE)
• Saħel: l-UE tieħu aktar passi biex tappoġġa aħjar is-sigurtà tar-reġjun, 3 ta’ Mejju 2019
• Konklużjonijiet tal-Kunsill dwar is-Saħel, 25 ta' Ġunju 2018