Kunsill Affarijiet Barranin, 13/05/2019, 13 ta' Mejju 2019

Riżultati ewlenin

Ġrajjiet kurrenti

Min-naħa tal-UE, hemm determinazzjoni sħiħa biex nagħmlu dak kollu li nistgħu billi nużaw l-istrumenti kollha disponibbli għalina biex nimplimentaw il-parti tagħna tal-PAKK jekk l-Iran jibqa' konformi mal-parti tiegħu. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli u l-ministri għall-affarijiet barranin iddiskutew l-Iran, wara l-aħħar avviżi relatati mal-Pjan ta' Azzjoni Komprensiv Konġunt (PAKK), il-ftehim nukleari mal-Iran. Huma fakkru l-impenn sħiħ tagħhom lejn il-preservazzjoni u l-implimentazzjoni sħiħa tal-PAKK, li huwa kisba ewlenija tal-arkitettura globali ta' nonproliferazzjoni nukleari. Huma esprimew tħassib dwar dikjarazzjonijiet riċenti mill-Iran, filwaqt li fakkru li huma jirrifjutaw kwalunkwe ultimatum u enfasizzaw l-importanza li l-Iran ikompli jimxi mal-PAKK, kif għamel s'issa, u kif iċċertifikat 14-il darba mill-Aġenzija Internazzjonali tal-Enerġija Atomika (IAEA). Fl-istess ħin, affermaw mill-ġdid l-impenn tagħhom biex iwasslu l-benefiċċji tal-ftehim lill-poplu Iranjan. F'dan il-kuntest, huma esprimew id-dispjaċir tagħhom dwar l-impożizzjoni mill-ġdid ta' sanzjonijiet mill-Istati Uniti wara l-ħruġ tagħhom mill-PAKK u enfasizzaw l-impenn tagħhom biex tintlaħaq operazzjonalizzazzjoni sħiħa tal-veikolu bi skop speċjali, INSTEX.

Il-ministri indirizzaw ukoll għas-sitwazzjoni fil-Venezwela. Ir-Rappreżentant Għoli infurmat lill-ministri dwar l-aktar laqgħa riċenti tal-Grupp ta' Kuntatt Internazzjonali f'San Jose, Costa Rica, fil-5 u s-6 ta' Mejju. Il-ministri esprimew it-tħassib tagħhom wara l-avvenimenti tat-30 ta' April 2019 u ż-żieda sussegwenti tat-tensjonijiet, b'ripressjoni ulterjuri mir-reġim kontra l-oppożizzjoni u l-membri tal-Assemblea Nazzjonali. Huma tennew l-appoġġ tagħhom għall-Grupp ta' Kuntatt Internazzjonali bħala l-uniku format li permezz tiegħu tista' tiġi prevista soluzzjoni politika negozjata, kif qed jiġi rikonoxxut dejjem aktar minn atturi oħra fir-reġjun u lil hinn minnu.

• Venezwela: ir-reazzjoni tal-Kunsill għall-kriżi (informazzjoni ġenerali)

Il-ministri għall-affarijiet barranin iddiskutew ukoll l-Ukrajna, wara r-riżultati tal-elezzjoni Presidenzjali. Huma nnotaw is-sinjali pożittivi mill-amministrazzjoni l-ġdida, b'mod partikolari l-intenzjoni tagħha li tkompli u ssaħħaħ il-proċess ta' implimentazzjoni tar-riforma, li skont kif enfasizzaw huma, jibqa' kruċjali biex jitwasslu benefiċċji tanġibbli lill-poplu Ukren. Huma esprimew tħassib dwar id-digriet Russu li jissimplifika l-ħruġ ta' passaporti f'ċerti żoni tar-reġjuni ta' Donetsk u Luhansk tal-Ukrajna, u tennew l-appoġġ sħiħ tagħhom għall-Ukrajna u s-sovranità, l-indipendenza u l-integrità territorjali tagħha.

Libja

Il-ministri ddiskutew il-Libja flimkien mar-Rappreżentant Speċjali tas-SĠ tan-NU għal-Libja, Ghassan Salamé, u kellhom skambju ta' fehmiet dwar il-passi possibbli li jmiss sabiex jiġi evitat li l-konflitt jeskala aktar.

L-UE titkellem b'vuċi waħda dwar il-Libja. Iddikjarat b'mod ċar li l-attakk militari tal-Armata Nazzjonali Libjana u l-eskalazzjoni sussegwenti fi Tripli u mal-madwar jikkostitwixxu theddida serja għall-paċi u s-sigurtà internazzjonali. Aħna fakkarna li ma hemm l-ebda soluzzjoni militari, iżda s-soluzzjoni tirriżulta minn impenn mill-ġdid lejn id-djalogu politiku tan-NU li l-partijiet kollha għandhom jimpenjaw ruħhom fih. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Kunsill adotta dikjarazzjoni:

• Dikjarazzjoni tal-Kunsill Affarijiet Barranin dwar il-Libja (stqarrija għall-istampa, 13/05/2019)

Saħel

Il-ministri għall-affarijiet barranin iddiskutew dwar is-Saħel, bi tħejjija għas-sessjoni tal-għada mal-ministri għad-difiża tal-UE flimkien mal-ministri għall-affarijiet barranin u għad-difiża mill-pajjiżi tal-G5 tas-Saħel (il-Burkina Faso, iċ-Chad, il-Mali, il-Mauritania u n-Niġer). Il-Kunsill adotta konklużjonijiet dwar is-Saħel.

• Konklużjonijiet tal-Kunsill dwar is-Saħel (stqarrija għall-istampa, 13/05/2019)