Kunsill Affarijiet Barranin, 17/06/2019, 17 ta' Ġunju 2019

Riżultati ewlenin

Ġrajjiet kurrenti

Ir-Rappreżentant Għoli u l-ministri għall-affarijiet barranin iddiskutew l-aktar kwistjonijiet urġenti fuq l-aġenda internazzjonali. Huma għamlu referenza għas-sitwazzjoni fil-Venezwela, filwaqt li enfasizzaw it-tħassib tagħhom hekk kif is-sitwazzjoni politika u umanitarja qed tkompli tmur għall-agħar. Huma tennew it-talba tagħhom għal soluzzjoni politika u negozjata fi ħdan il-qafas tal-kostituzzjoni Venezweljana li fl-aħħar mill-aħħar twassal għal elezzjonijiet presidenzjali ħielsa, ġusti u kredibbli, u tennew ukoll l-appoġġ tagħhom għall-isforzi f’din id-direzzjoni.

Ir-Rappreżentant Għoli u l-ministri għall-affarijiet barranin għamlu referenza wkoll għall-Att Helms-Burton, filwaqt li enfasizzaw l-impenn tal-UE li tipproteġi n-negozji tagħha u li tuża l-miżuri xierqa kollha biex tindirizza l-effetti tal-Att Helms-Burton, inkluż fir-rigward tad-drittijiet tal-UE fid-WTO u permezz tal-użu tal-istatut ta’ mblukkar tal-UE.

Iddiskutew ukoll is-sitwazzjoni fir-Repubblika tal-Moldova, wara l-formazzjoni tal-gvern il-ġdid. Tennew li l-UE hija lesta li taħdem ma’ gvern impenjat lejn ir-riforma, abbażi tal-Ftehim ta’ Assoċjazzjoni bejn l-UE u l-Moldova.

Ir-Rappreżentant Għoli rreferiet ukoll għall-ewwel anniversarju tal-ftehim ta’ Prespa, li ġie iffirmat mill-Greċja u l-Maċedonja ta' Fuq preċiżament sena ilu.

Strateġija Globali tal-UE

Il-ministri għall-affarijiet barranin u għad-difiża ddiskutew l-Istrateġija Globali tal-UE abbażi tat-tielet rapport ta’ progress annwali mir-Rappreżentant Għoli: "L-Istrateġija Globali tal-UE: il-prospettiva tliet snin wara”. Ħadu kont tal-progress li sar fl-aħħar tliet snin u rriflettew fuq il-perspettivi futuri. Il-Kunsill adotta wkoll konklużjonijiet dwar l-azzjoni tal-UE biex issaħħaħ il-multilateraliżmu bbażat fuq ir-regoli.

• It-tisħiħ tal-multilateraliżmu: il-Kunsill jadotta konklużjonijiet (stqarrija għall-istampa, 17/06/2019)

Il-ministri ffokaw fuq il-kooperazzjoni fil-qasam tas-sigurtà u tad-difiża, u laqgħu l-progress sostantiv li sar biex tissaħħaħ is-sigurtà tal-Unjoni u r-rwol tagħha bħala garanti tas-sigurtà u attur globali, inkluż permezz tal-Politika ta’ Sigurtà u ta’ Difiża Komuni tagħha. Il-Kunsill adotta konklużjonijiet dwar is-sigurtà u d-difiża fil-kuntest tal-Istrateġija Globali tal-UE.

• Sigurtà u difiża: il-Kunsill jadotta konklużjonijiet (stqarrija għall-istampa, 17/06/2019)
• L-Istrateġija Globali tal-UE: il-prospettiva tliet snin wara, rapport, Ġunju 2019
• Kooperazzjoni tal-UE dwar is-sigurtà u d-difiża (informazzjoni ġenerali)

L-effikaċja tal-Politika Estera u ta’ Sigurtà Komuni

Il-ministri għall-affarijiet barranin iddiskutew l-effikaċja tal-Politika Estera u ta’ Sigurtà Komuni (PESK). It-tibdil kbir li qed iseħħ fix-xenarju globali u l-isfidi li qed tħabbat wiċċha magħhom l-Unjoni Ewropea fid-dinja tal-lum jeħtieġu politika barranija saħansitra aktar effikaċi. Il-ministri għalhekk irriflettew fuq ideat prattiċi biex titjieb l-effikaċja tal-Politika Estera u ta’ Sigurtà Komuni (PESK) tal-UE. Taw ħarsa partikolari lejn kif il-koerenza u l-konsistenza jistgħu jiżdiedu aktar u rriflettew fuq modi possibbli biex tissaħħaħ l-unità u l-effikaċja.

Sudan

Il-Kunsill iddiskuta s-sitwazzjoni fis-Sudan u adotta dikjarazzjoni.

• Sudan: dikjarazzjoni tal-Kunsill Affarijiet Barranin (stqarrija għall-istampa, 17/06/2019)

Ikla informali dwar il-Lvant Nofsani

Il-ministri għall-affarijiet barranin kellhom skambju ta’ fehmiet mal-Ministru għall-Affarijiet Barranin tal-Ġordan, Ayman Safadi. Iffokaw fuq l-aħħar żviluppi fir-reġjun, inkluż is-Sirja, it-tensjonijiet fir-reġjun tal-Golf, u l-prospetti għall-Proċess ta’ Paċi fil-Lvant Nofsani.

Eskalazzjoni militari fir-reġjun tal-Golf tkun perikoluża ħafna, għal kull persuna fir-reġjun, għall-Ewropa, u għall-bqija tad-dinja. Nappellaw għall-akbar rażan u tnaqqis tat-tensjoni, minħabba li nemmnu li dan huwa fl-interess ta’ kulħadd. Federica Mogherini, Rappreżentant Għoli għall-Affarijiet Barranin u l-Politika ta' Sigurtà