Kunsill Affarijiet Barranin, 15/07/2019, 15 ta' Lulju 2019

Riżultati ewlenin

Ġrajjiet kurrenti

Ir-Rappreżentant Għoli u l-ministri għall-affarijiet barranin iddiskutew l-aktar kwistjonijiet urġenti fuq l-aġenda internazzjonali. Huma rreferew għas-sitwazzjoni rigward l-attivitajiet ta' tħaffir illegali attwali tat-Turkija fil-Lvant tal-Mediterran.

Il-ministri għall-affarijiet barranin iddiskutew ukoll l-iżviluppi reċenti fis-Sudan. Il-Ministru għall-Affarijiet Barranin Finlandiż Pekka Haavisto żar ir-reġjun f'isem l-UE. Il-ministri għall-affarijiet barranin innutaw li l-qbil li ntlaħaq bejn il-Kunsill Militari Transizzjonali u l-Forzi għall-Ħelsien u l-Bidla fil-11 ta' Lulju huwa pass importanti, u ssottolinjaw l-importanza li tiġi appoġġata t-transizzjoni ċivili, inkluż permezz ta' appoġġ finanzjarju addizzjonali.

Il-ministri ttrattaw ukoll il-Venezwela, wara ż-żjara tal-Konsulent Speċjali Enrique Iglesias f'Caracas mis-7 sal-10 ta' Lulju. Huma tennew l-appoġġ tal-UE għall-isforzi kollha, b'mod partikolari l-proċess ta' Oslo, biex tinstab soluzzjoni politika, filwaqt li enfasizzaw it-tħassib serju tagħhom dwar is-sitwazzjoni tad-drittijiet tal-bniedem wara r-rapport ippubblikat mill-Uffiċċju tal-Kummissarju Għoli għad-Drittijiet tal-Bniedem, Michelle Bachelet fil-5 ta' Lulju 2019.

L-Iran

Il-Kunsill iddiskuta l-Iran fid-dawl tal-iżviluppi fir-reġjun u t-tħabbiriet u l-passi reċenti minn Tehran biex inaqqas l-implimentazzjoni tiegħu ta' ċerti aspetti tal-ftehim dwar il-qasam nukleari, il-Pjan ta' Azzjoni Komprensiv Konġunt (PAKK).

Kellna diskussjoni tajba dwar kif nistgħu nkomplu bil-ħidma tagħna biex nippreservaw b'mod sħiħ il-ftehim nukleari mal-Iran. Kellna unanimità fost l-istati membri dwar il-ħtieġa kemm fir-rigward tal-istrument - INSTEX - li stabbilixxejna biex nippreservaw il-kummerċ leġittimu mal-Iran, li għandu jsir aktar rapidu kif ukoll aktar operazzjonali, kif ukoll biex inkomplu naħdmu sabiex l-Iran jerġa' lura għall-konformità sħiħa mal-ftehim nukleari. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri ddiskutew is-sitwazzjoni ta' tensjoni fir-reġjun tal-Golf u modi kif jitnaqqas ir-riskju kontinwu ta' kalkolu ħażin li jista' jirriżulta f'eskalazzjoni militari.

Huma indirizzaw ukoll is-sitwazzjoni attwali tal-implimentazzjoni tal-PAKK. Huma tennew li l-UE jiddispjaċiha għad-deċiżjoni tal-Istati Uniti li jimponu mill-ġdid sanzjonijiet fuq l-Iran wara l-irtirar tagħhom mill-PAKK. Huma evalwaw l-isforzi kontinwi tal-UE biex ikun jista' jitkompla l-kummerċ leġittimu mal-Iran, inkluż permezz tal-veikolu bi skop speċjali "INSTEX" li issa huwa operazzjonali. Huma ħeġġew ukoll lill-Iran biex ireġġa' lura l-passi li ttieħdu u affermaw mill-ġdid li l-impenn tal-UE fir-rigward tal-ftehim nukleari jiddependi minn konformità sħiħa tal-Iran u li l-kwistjonijiet ta' konformità jeħtieġ li jiġu indirizzati fil-qafas tal-PAKK.

L-Iraq

Ir-Rappreżentant Għoli infurmat lill-ministri dwar iż-żjara tagħha f'Baghdad fit-13 u l-14 ta' Lulju. Il-ministri għall-affarijiet barranin imbagħad evalwaw l-iżviluppi fil-pajjiż. Huma ddiskutew kif l-UE tista' tipprovdi appoġġ ulterjuri lill-pajjiż. Il-Kunsill adotta konklużjonijiet.

• Konklużjonijiet tal-Kunsill dwar l-Iraq (stqarrija għall-istampa, 15/07/19)
• Id-delegazzjoni tal-UE fl-Iraq (SEAE)

Repubblika tal-Moldova

Il-ministri għall-affarijiet barranin kellhom skambju informali ta' fehmiet mal-Ministru għall-Affarijiet Barranin tar-Repubblika tal-Moldova, Nicolae Popescu.

Fil-konklużjonijiet tiegħu tal-20 ta' Ġunju 2019, il-Kunsill Ewropew laqa' t-trasferiment paċifiku tal-poter fir-Repubblika tal-Moldova. Huwa stieden lill-Kummissjoni Ewropea u lir-Rappreżentant Għoli biex jaħdmu fuq sensiela ta' miżuri konkreti biex jappoġġaw lir-Repubblika tal-Moldova, abbażi tal-implimentazzjoni sostnuta tagħha tar-riformi skont il-Ftehim ta' Assoċjazzjoni / DCFTA.

Il-ministri għall-affarijiet barranin esprimew l-appoġġ tagħhom, kif ukoll l-aspettattivi tagħhom, b'mod partikolari dwar l-implimentazzjoni tar-riformi relatati mal-Ftehim ta' Assoċjazzjoni, u r-rieda tagħhom li jerġa' jinbeda appoġġ finanzjarju kondizzjonali mill-UE lir-Repubblika tal-Moldova.

• Relazzjonijiet tal-UE mar-Repubblika tal-Moldova (Informazzjoni ġenerali, sit web tal-Kunsill)
• Relazzjonijiet UE-Moldova - skeda informattiva (SEAE)

Repubblika Ċentru-Afrikana

Il-Kunsill iddiskuta r-Repubblika Ċentru-Afrikana. Il-ministri rriflettew fuq kif l-UE tista' tkompli ssaħħaħ l-appoġġ tagħha biex tinkoraġġixxi l-implimentazzjoni ulterjuri tal-ftehim ta' paċi ffirmat f'Bangui fis-6 ta' Frar 2019.

Huma qablu li jibdew jaħdmu fuq pjanijiet għal missjoni ċivili possibbli tal-PSDK b'appoġġ għall-forzi ċivili tas-sigurtà tar-RĊA. Din il-missjoni ser tikkomplementa l-missjoni ta' taħriġ militari tal-UE EUTM RCA li tipprovdi taħriġ u pariri lill-Forzi Armati Ċentru-Afrikani (FACA) u tinkludi wkoll pilastru ta' interoperabbiltà ċivili-militari.

Aspetti esterni tal-migrazzjoni

Il-ministri għall-affarijiet barranin iddiskutew l-aspetti esterni tal-migrazzjoni. Il-ministri qablu dwar il-ħtieġa li jiżdiedu l-isforzi biex il-kwistjoni tiġi indirizzata b'mod aktar effettiv. B'mod partikolari, huma nnutaw il-ħtieġa li jiżdiedu r-riżorsi finanzjarji, b'mod partikolari l-Fond Fiduċjarju tal-UE għall-Afrika.

Il-ministri għall-affarijiet barranin iddiskutew l-importanza li jitħaffu r-risistemazzjonijiet ta' persuni fi bżonn ta' protezzjoni internazzjonali. Huma enfasizzaw ukoll il-ħtieġa li jsir progress fil-kwistjoni tal-iżbark ta' migranti salvati fuq il-baħar, li hija r-responsabbiltà tal-ministri għall-Ġustizzja u l-Affarijiet Interni.