Kunsill Affarijiet Ġenerali, 19/03/2019, 19 ta' Marzu 2019

Riżultati ewlenin

Il-qafas finanzjarju pluriennali li jmiss

Il-ministri ser ikollhom dibattitu ta' orjentazzjoni dwar il-qafas finanzjarju pluriennali għall-2021-2027 (QFP). Huma taw il-fehmiet tagħhom dwar il-miżuri previsti fil-QFP dwar l-integrazzjoni u l-migrazzjoni tat-tibdil fil-klima.

L-objettiv kondiviż huwa li l-Kunsill Ewropew ta' Ġunju jingħata abbozz ta' kaxxa ta' negozjar simplifikata, bil-ħsieb li jintlaħaq ftehim fil-Kunsill Ewropew fil-ħarifa 2019. L-abbozz tal-kaxxa ta' negozjar jiġbor flimkien dawk l-elementi li huma l-aktar probabbli li jirrikjedu gwida politika mill-mexxejja tal-UE bil-ħsieb li l-Kunsill jilħaq il-pożizzjoni tiegħu.

Il-Presidenza ppreżentat ukoll lill-Kunsill rapport ta' progress li jiddeskrivi l-iżviluppi miksuba fin-negozjati dwar il-proposti settorjali relatati mal-QFP.

Il-ħidma fuq il-QFP qed tagħmel progress kostanti. Id-diskussjoni tal-lum dwar l-integrazzjoni u l-migrazzjoni tat-tibdil fil-klima indirizzat uħud mill-elementi ewlenin fil-QFP propost u ser tikkontribwixxi għad-diskussjoni tal-mexxejja f'Ġunju. Fl-istess ħin, il-ftehimiet komuni li ntlaħqu mill-Presidenza Rumena tal-Kunsill tal-UE mal-Parlament Ewropew attwali dwar il-programmi settorjali relatati mal-QFP ser jikkontribwixxu aktar tard għat-tħejjija u l-implimentazzjoni f'waqtha tal-programmi li jmiss. George Ciamba, Ministru Delegat għall-Affarijiet Ewropej tar-Rumanija

• QFP - rapport ta' progress tal-Presidenza
• Qafas finanzjarju pluriennali għall-2021-2027: negozjati (informazzjoni ġenerali)

Strument għall-Assistenza ta' Qabel l-Adeżjoni

Il-ministri qablu dwar approċċ ġenerali parzjali dwar ir-Regolament li jistabbilixxi l-istrument għall-Assistenza ta' Qabel l-Adeżjoni (IPA III).

L-IPA III huwa parti mill-qafas finanzjarju pluriennali għall-2021-2027. L-IPA III jappoġġa lill-benefiċjarji biex jadottaw u jimplimentaw riformi politiċi, istituzzjonali, soċjali u ekonomiċi ewlenin biex jikkonformaw mal-valuri tal-UE u biex jallinjaw progressivament mar-regoli, l-istandards u l-politiki tal-UE.

It-test li ntlaħaq qbil dwaru ma jkoprix kwistjonijiet finanzjarji u orizzontali li ser jiddependi fuq il-qbil globali dwar il-qafas finanzjarju pluriennali li jmiss.

• Strument għall-Assistenza ta' Qabel l-Adeżjoni (IPA III): il-Kunsill jaqbel dwar il-pożizzjoni tiegħu (stqarrija għall-istampa, 19/03/2019)

Kunsill Ewropew ta' Marzu

Il-Kunsill iffinalizza t-tħejjijiet għall-laqgħa tal-Kunsill Ewropew tal-21 u t-22 ta' Marzu billi ddiskuta l-abbozz ta' konklużjonijiet.

Il-Kunsill Ewropew tar-Rebbiegħa ser jiffoka fuq it-tisħiħ tal-bażi ekonomika Ewropea. Il-mexxejja tal-UE ser jiddiskutu wkoll it-tibdil fil-klima, is-summit li jmiss maċ-Ċina u modi biex tiġi indirizzata d-diżinformazzjoni.

Fil-bidu tal-laqgħa, ir-rappreżentant tal-Istat Membru li bħalissa għandu l-presidenza tal-Kunsill, ser jagħti ħarsa ġenerali lejn il-progress fl-implimentazzjoni tal-konklużjonijiet preċedenti tal-Kunsill Ewropew.

• Kunsill Ewropew, 21-22 ta' Marzu 2019

Semestru Ewropew

Il-Kunsill eżamina rapport tal-presidenza li jippreżenta fil-qasir il-kontributi tal-konfigurazzjonijiet tal-Kunsill dwar il-pakkett tas-Semestru Ewropew 2019. L-ekonomija Ewropea dieħla fis-sitt sena tagħha ta' tkabbir mhux interrott. Madankollu, għad hemm bżonn ta' azzjoni ulterjuri biex l-ekonomija tiġi protetta mill-instabbiltà globali u minn sfidi fuq perjodu ta' żmien medju u twil.

Il-Kunsill qabel ukoll li jippreżenta abbozz ta' rakkomandazzjoni lill-Kunsill Ewropew fejn l-istati membri taż-żona tal-euro jiġu mistiedna jimplimentaw politiki li jkollhom l-għan li jagħtu spinta lit-tkabbir ekonomiku fl-2019-2020.

Miżuri ta' kontinġenza tal-Brexit

Il-Kunsill adotta mingħajr diskussjoni sensiela ta' atti leġislattivi bħala parti mit-tħejjijiet ta' kontinġenza tiegħu għal xenarju ta' Brexit ta' "ebda ftehim".

L-għan ta' dawn l-atti huwa li jillimita l-aktar ħsara serja kkawżata minn Brexit diżordinat f'setturi speċifiċi fejn dan ikun joħloq tfixkil kbir għaċ-ċittadini u n-negozji, bħas-sigurtà soċjali, il-mobbilità taż-żgħażagħ, it-trasport u s-sajd.

Dawn il-miżuri huma ta' natura temporanja, limitati fl-ambitu u adottati b'mod unilaterali mill-UE. B'ebda mod mhuma maħsuba biex jirreplikaw il-benefiċċji sħaħ tas-sħubija fl-UE jew it-termini ta' kwalunkwe perjodu ta' transizzjoni, kif previsti fil-ftehim dwar il-ħruġ. F'xi oqsma, huma kondizzjonali fuq l-azzjoni reċiproka tar-Renju Unit.

• Brexit: il-Kunsill jadotta sensiela ta' miżuri ta' kontinġenza għal xenarju ta' "ebda ftehim" (stqarrija għall-istampa, 19/03/2019)

Prevenzjoni ta' użu ħażin ta' data personali fl-elezzjonijiet tal-PE

Il-Kunsill adotta mingħajr diskussjoni regoli ġodda mmirati biex jipprevjenu l-użu ħażin tad-data personali mill-partiti politiċi Ewropej fl-elezzjonijiet tal-PE.

Ir-regoli ser jippermettu li jiġu imposti sanzjonijiet finanzjarji fuq partiti politiċi u fondazzjonijiet Ewropej li deliberatament jinfluwenzaw, jew jippruvaw jinfluwenzaw, l-eżitu tal-elezzjonijiet tal-PE billi jieħdu vantaġġ minn ksur ta' regoli dwar il-protezzjoni tad-data.

• L-elezzjonijiet għall-PE: L-UE tadotta regoli ġodda biex tipprevjeni l-użu ħażin ta' data personali mill-partiti politiċi Ewropej (stqarrija għall-istampa, 19/03/2019)