Kunsill Affarijiet Ġenerali, 19/02/2019, 19 ta' Frar 2019

Riżultati ewlenin

Il-qafas finanzjarju pluriennali li jmiss

Il-presidenza ppreżentat is-sitwazzjoni attwali dwar id-diskussjonijiet dwar il-qafas finanzjarju pluriennali (QFP) għall-2021-2027 u stabbilixxiet il-programm ta’ ħidma proviżorju sa April. Il-ministri kellhom skambju ta’ fehmiet dwar l-organizzazzjoni tal-ħidma li trid titwettaq.

L-objettiv kondiviż huwa li l-Kunsill Ewropew ta’ Ġunju jiġi pprovdut b'abbozz simplifikat tal-Kaxxa ta’ Negozjar, bil-ħsieb li jintlaħaq ftehim fil-Kunsill Ewropew fil-ħarifa tal-2019.

L-abbozz tal-Kaxxa ta' Negozjar jiġbor flimkien dawk l-elementi li huma l-aktar probabbli li jirrikjedu gwida politika mill-mexxejja tal-UE bil-ħsieb li l-Kunsill jilħaq il-pożizzjoni tiegħu. Din hija għodda biex jiġu strutturati u ffaċilitati n-negozjati dwar il-QFP. L-abbozz tal-Kaxxa ta' Negozjar jiġi kontinwament diskuss u aġġornat meta jkun meħtieġ, hekk kif in-negozjati jimxu ‘l quddiem.

Qed naħdmu b’mod intensiv biex niżguraw li n-negozjati importanti dwar il-QFP li jmiss qed jagħmlu progress tajjeb. Id-diskussjoni tal-lum tatna l-feedback li neħtieġu biex inkomplu din il-ħidma u biex niżguraw li l-mexxejja tagħna ser ikollhom bażi tajba għad-diskussjonijiet tagħhom dwar l-aktar kwistjonijiet importanti f’Ġunju. George Ciamba, Ministru Delegat għall-Affarijiet Ewropej tar-Rumanija

• Il-programm ta’ ħidma propost tal-presidenza Rumena

Il-Kunsill Ewropew ta’ Marzu

Il-Kunsill beda t-tħejjijiet għal-laqgħa tal-Kunsill Ewropewtal-21 u t-22 ta' Marzu billi ddiskuta abbozz ta' aġenda annotata.

Fil-laqgħa tagħhom f’Marzu, il-mexxejja tal-UE ser jiffokaw fuq is-suġġetti li ġejjin:

• Impjiegi, tkabbir u kompetittività: ser jiddiskutu l-iżvilupp futur tas-Suq Uniku, l-Unjoni tas-Swieq Kapitali, il-politika industrijali u l-politika diġitali Ewropea bi tħejjija għall-Aġenda Strateġika li jmiss; mistennija wkoll jindirizzaw il-prijoritajiet għas-Semestru Ewropew 2019 u japprovaw ir-Rakkomandazzjoni dwar il-politika ekonomika taż-żona tal-euro
• Tibdil fil-klima: ser jipprovdu gwida dwar id-direzzjoni ġenerali u l-prijoritajiet politiċi fl-indirizzar tat-tibdil fil-klima, sabiex l-Unjoni Ewropea tkun tista' tippreżenta strateġija fit-tul sal-2020 f'konformità mal-Ftehim ta' Pariġi
• Relazzjonijiet esterni: ser iħejju s-summit bejn l-UE u ċ-Ċina li ser isir fid-9 ta' April 2019 u jiddiskutu suġġetti oħrajn ta' politika barranija fid-dawl tal-ġrajjiet kurrenti
• Punti oħrajn: ser jirrieżaminaw ukoll il-progress li sar biex tiġi indirizzata d-diżinformazzjoni u l-ħtieġa li tiġi protetta l-integrità demokratika tal-elezzjonijiet Ewropej u dawk nazzjonali madwar l-UE

• Laqgħa tal-Kunsill Ewropew tal-21 u t-22 ta' Marzu 2019

Lejn Ewropa sostenibbli sal-2030

Il-Kunsill kellu skambju ta’ fehmiet dwar il-passi li għandhom jittieħdu biex jiżguraw Ewropa sostenibbli sal-2030. Id-diskussjoni kienet ibbażata fuq dokument ta’ riflessjoni tal-Kummissjoni “Lejn Ewropa sostenibbli sal-2030”, li ġie ppreżentat fit-30 ta’ Jannar.

Il-ministri ddiskutew il-faċilitaturi ċentrali għat-tranżizzjoni lejn Ewropa sostenibbli u esprimew il-fehmiet tagħhom dwar it-tliet xenarji ppreżentati mill-Kummissjoni fid-dokument ta’ riflessjoni tagħha. Huma enfasizzaw l-importanza li tittieħed azzjoni biex jiġi appoġġat l-iżvilupp sostenibbli fil-livell domestiku, reġjonali u globali b’mod koerenti sabiex tinkiseb l-implimentazzjoni fil-livell tal-UE tal-Aġenda 2030 tan-NU għall-Iżvilupp Sostenibbli.

Id-diskussjoni ser isservi bħala kontribut għat-tħejjija tal-konklużjonijiet tal-Kunsill, li jkun fihom ir-rispons tal-Kunsill għad-dokument ta’ riflessjoni tal-Kummissjoni u jikkontribwixxu għat-tħejjija tas-sessjonijiet tal-Forum Politiku ta’ Livell Għoli dwar l-Iżvilupp Sostenibbli li għandu jsir f’Lulju u Settembru 2019.

Huwa importanti għall-UE li tistabbilixxi l-passi meħtieġa għall-implimentazzjoni tal-Aġenda 2030 għall-Iżvilupp Sostenibbli. Irridu nqisu l-impatt globali tal-politiki domestiċi tal-UE. Id-diskussjoni tal-lum kienet pass importanti f’dik id-direzzjoni. Taħt il-presidenza tagħna ser inkomplu naħdmu b’mod intensiv fuq din il-kwistjoni. George Ciamba, Ministru Delegat għall-Affarijiet Ewropej tar-Rumanija

• Id-dokument ta' riflessjoni "Lejn Ewropa sostenibbli sal-2030"

Proċedimenti skont l-Artikolu 7

Dwar il-Polonja, l-istati membri qiesu li l-bidliet leġislattivi reċenti li jikkonċernaw il-liġi tal-Qorti Suprema kienu żvilupp pożittiv u ħeġġu lill-awtoritajiet Pollakki biex jindirizzaw il-kwistjonijiet pendenti mqajma mill-Kummissjoni.

Dwar l-Ungerija, l-istati membri kellhom skambju ta’ fehmiet dwar is-sitwazzjoni attwali.

Il-Kunsill ser jerġa’ lura għaż-żewġ proċeduri tal-Artikolu 7(1) TUE, b’kont meħud tal-fehmiet espressi mill-istati membri.

• Proposta motivata skont l-Artikolu 7(1) TUE dwar l-Ungerija
• Proposta motivata skont l-Artikolu 7(1) TUE dwar il-Polonja

Elezzjonijiet liberi u ġusti

Il-Kunsill adotta, mingħajr diskussjoni, konklużjonijiet dwar l-iżgurar ta' elezzjonijiet Ewropej liberi u ġusti.

Il-konklużjonijiet ikopru għadd ta’ azzjonijiet mhux leġislattivi li għandhom jittieħdu sabiex jiġu indirizzati l-kampanji ta’ diżinformazzjoni minn ġewwa u barra l-UE u tiżdied iċ-ċibersigurtà fil-perjodu ta’ qabel l-elezzjonijiet Ewropej f’Mejju 2019.

• Stqarrija għall-istampa dwar L-iżgurar ta' elezzjonijiet Ewropej liberi u ġusti: il-Kunsill jadotta konklużjonijiet, 19 ta' Frar 2019

Ir-relazzjonijiet tal-UE mal-Iżvizzera

Il-Kunsill adotta, mingħajr diskussjoni, konklużjonijiet dwar ir-relazzjonijiet tal-UE mal-Konfederazzjoni Żvizzera.

Il-konklużjonijiet jivvalutaw l-evoluzzjoni u l-istat ġenerali tar-relazzjonijiet tal-UE mal-Konfederazzjoni Żvizzera wara l-adozzjoni tal-konklużjonijiet preċedenti dwar il-kwistjoni fi Frar 2017.

• Aqra t-test sħiħ tal-konklużjonijiet