Kunsill Affarijiet Ġenerali, 15 ta' Ottubru 2024

Riżultati ewlenin

Kunsill Ewropew ta' Ottubru

Il-Kunsill kompla t-tħejjijiet għal-laqgħa tal-Kunsill Ewropew tas-17 u t-18 ta' Ottubru 2024 billi ddiskuta l-abbozz ta' konklużjonijiet.

Fil-laqgħa tagħhom li jmiss, il-mexxejja tal-UE ser jindirizzaw:

• l-Ukrajna
• il-Lvant Nofsani
• il-kompetittività
• il-migrazzjoni
• is-Semestru Ewropew 2024
• punti oħra

• Kunsill Ewropew, 17-18 ta' Ottubru 2024

Relazzjonijiet bejn l-UE u l-Iżvizzera

Il-Kummissjoni infurmat lill-ministri dwar il-progress tan-negozjati rigward pakkett wiesa' ta' miżuri bħala l-bażi għal relazzjonijiet futuri bejn l-UE u l-Iżvizzera, segwit minn skambju ta' fehmiet.

L-għan tan-negozjati huwa li jiġu mmodernizzati u approfonditi r-relazzjonijiet bilaterali bejn l-UE u l-Iżvizzera. L-elementi ewlenin tal-pakkett jinkludu:

• dispożizzjonijiet istituzzjonali u dwar l-għajnuna mill-istat li għandhom jiġu inklużi fi ftehimiet eżistenti u futuri mal-Iżvizzera b'rabta mas-suq intern
• ftehim li jippermetti l-parteċipazzjoni tal-Iżvizzera fil-programmi tal-UE
• ftehim dwar il-kontribuzzjoni finanzjarja permanenti tal-Iżvizzera għall-koeżjoni soċjali u ekonomika fl-UE
• negozjati dwar ftehimiet dwar l-elettriku, is-sikurezza tal-ikel u s-saħħa

Waqt l-iskambju ta' fehmiet, il-ministri enfasizzaw l-importanza li jinżamm momentum pożittiv sabiex in-negozjati jiġu konklużi sa tmiem l-2024. Huma ssottolinjaw li dan jeħtieġ progress sostanzjali u parallel fil-ftehimiet kollha, iżda l-aktar importanti fil-ftehim dwar il-moviment liberu tal-persuni u dwar kontribut ġust u regolari mill-Iżvizzera għall-koeżjoni, li għandhom jiġu ttrattati bħala pakkett wieħed.

Il-Kummissjoni ġiet mistiedna tkompli bl-isforzi tagħha, bil-flessibbiltà meħtieġa li żżomm il-bilanċ ġenerali, bl-għan li n-negozjati jaslu għal konklużjoni b'suċċess fil-forma ta' pakkett uniku u bbilanċjat ta' ftehimiet li jirrifletti l-interess tal-UE.

• UE-Żvizzera: il-Kunsill jadotta mandat għal negozjati dwar relazzjoni futura (stqarrija għall-istampa, 12 ta' Marzu 2024)
• Ftehim Komuni li jikkonkludi t-taħditiet esploratorji dwar ir-relazzjoni bilaterali bejn l-UE u l-Iżvizzera, 15 ta' Diċembru 2023

Il-ġlieda kontra l-antisemitiżmu

Il-ministri approvaw dikjarazzjoni dwar is-sostenn tal-ħajja Lhudija u l-ġlieda kontra l-antisemitiżmu. Id-dikjarazzjoni tenfasizza l-importanza tal-ġlieda kontra l-forom kollha ta' antisemitiżmu, razziżmu u mibegħda u diskriminazzjoni, b'mod partikolari f'kuntest ta' antisemitiżmu li qed jiżdied fl-UE. Tenfasizza wkoll il-ħtieġa tas-sostenn tal-ħajja Lhudija permezz tat-tifkira, il-kultura u l-edukazzjoni, u billi jiġu żgurati s-sikurezza u s-sigurtà tal-Lhud.

• Is-sostenn tal-ħajja Lhudija u l-ġlieda kontra l-antisemitiżmu: il-Kunsill japprova dikjarazzjoni (stqarrija għall-istampa, 15 ta' Ottubru 2024)

Il-ministri kellhom ukoll skambju ta' fehmiet mas-Sa Sirpa Rautio, Direttur tal-Aġenzija tal-UE għad-Drittijiet Fundamentali dwar is-sostenn tal-ħajja Lhudija u l-ġlieda kontra l-antisemitiżmu. L-Aġenzija għandha rwol ewlieni fil-ġbir u l-forniment ta' data, riċerka u analiżi ta' kwalità għolja dwar id-drittijiet fundamentali fl-UE u l-identifikazzjoni tax-xejriet, inkluż fil-qasam tal-ġlieda kontra l-antisemitiżmu.

• L-Aġenzija tal-UE għad-Drittijiet Fundamentali

Semestru Ewropew

Bħala parti mis-Semestru Ewropew 2024, il-Kunsill approva r-rakkomandazzjonijiet integrati speċifiċi għall-pajjiżi u ddeċieda li jibgħathom lill-Kunsill Ewropew għall-approvazzjoni.

Wara l-approvazzjoni mill-Kunsill Ewropew, ir-rakkomandazzjonijiet ser jiġu adottati formalment mill-Kunsill il-ġimgħa d-dieħla.

• Kif jaħdem is-Semestru Ewropew (informazzjoni ġenerali)
• Semestru Ewropew 2024 – Pjan direzzjonali aġġornat

Affarijiet oħra

Taħt "Affarijiet oħra", id-delegazzjoni Ġermaniża qajmet punt dwar l-iżviluppi reċenti fil-Georgia.

Il-Kummissjoni pprovdiet aġġornament dwar l-aħħar żviluppi fir-relazzjonijiet bejn l-UE u r-Renju Unit. Il-ministri laqgħu b'mod ġenerali l-impenn pożittiv u esprimew ir-rieda tagħhom li jikkunsidraw kif ir-relazzjonijiet jistgħu jissaħħu aktar. Fakkru wkoll fl-importanza tal-implimentazzjoni sħiħa, fidila u f'waqtha tal-ftehimiet eżistenti bħala prekundizzjoni għal impenji futuri, kif ukoll ir-responsabbiltà tagħhom għar-relazzjoni ġenerali bejn l-UE u r-Renju Unit fil-Kunsill.

Il-Kummissjoni infurmat ukoll lill-ministri dwar is-segwitu għall-elezzjonijiet tal-Parlament Ewropew, filwaqt li enfasizzat il-punti ewlenin u t-tagħlimiet meħuda għat-titjib tat-tħejjija u l-ġlieda kontra d-diżinformazzjoni u l-indħil barrani fil-futur.

Il-Kunsill adotta wkoll, mingħajr diskussjoni, il-punti fuq il-lista ta' punti A mhux leġiżlattivi.