"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Ġenerali, 24 ta' Settembru 2024
Riżultati ewlenin
Prijoritajiet tal-presidenza
Il-presidenza Ungeriża ppreżentat il-prijoritajiet għall-mandat tagħha mill-1 ta' Lulju sal-31 ta' Diċembru 2024.
Il-presidenza Ungeriża stabbiliet il-prijoritajiet ġenerali li ġejjin għas-semestru tagħha:
Patt ġdid dwar il-Kompetittività Ewropea
it-tisħiħ tal-politika Ewropea tad-difiża
politika ta' tkabbir konsistenti u bbażata fuq il-mertu
it-trażżin tal-migrazzjoni illegali
it-tiswir tal-futur tal-politika ta' koeżjoni
politika agrikola tal-UE ċċentrata fuq il-bdiewa
l-indirizzar tal-isfidi demografiċi
Fir-rigward tal-konfigurazzjoni tal-Kunsill Affarijiet Ġenerali, il-presidenza ser tavvanza l-ħidma dwar l-implimentazzjoni tal-Aġenda Strateġika, l-istat tad-dritt, it-trasparenza u l-integrità, ir-reżiljenza demokratika, il-futur tal-Ewropa, it-tkabbir, il-ġlieda kontra l-antisemitiżmu u t-trawwim tal-ħajja Lhudija, ir-relazzjonijiet bejn l-UE u r-Renju Unit, ir-relazzjonijiet bejn l-UE u l-Iżvizzera, u l-Ftehimiet ta' Assoċjazzjoni ma' Andorra u San Marino, fost l-oħrajn.
Waħda mill-prijoritajiet ewlenin tal-presidenza Ungeriża hija li tiġi segwita politika ta' tkabbir ibbażata fuq il-mertu, ibbilanċjata u kredibbli. Għandna l-għan li nagħtu momentum ġdid lill-proċess ta' integrazzjoni tal-Balkani tal-Punent, filwaqt li nirrikonoxxu li l-UE mhijiex kompluta mingħajr l-inklużjoni tagħhom. Nistennew li nagħmlu progress tanġibbli fl-adeżjoni ta' dawn il-pajjiżi kandidati mal-UE, filwaqt li napprofondixxu l-kooperazzjoni permezz tas-Summit li jmiss bejn l-UE u l-Balkani tal-Punent u l-Komunità Politika Ewropea.
János Bóka, Ministru għall-Affarijiet tal-Unjoni Ewropea tal-Ungerija
Bħala parti mid-djalogu annwali tal-Kunsill dwar l-istat tad-dritt, il-ministri kellhom diskussjoni dwar l-iżviluppi ġenerali relatati mal-istat tad-dritt fl-UE, bl-użu tar-rapport tal-Kummissjoni tal-2024 dwar l-istat tad-dritt.
Id-dibattitu kopra erba' oqsma relatati mal-istat tad-dritt: is-sistema ġudizzjarja, il-qafas kontra l-korruzzjoni, il-pluraliżmu u l-libertà tal-media, u kwistjonijiet istituzzjonali oħra relatati mal-kontrokontrolli.
Matul id-diskussjoni, il-ministri laqgħu b'sodisfazzjon il-progress ġenerali fit-twettiq tar-rakkomandazzjonijiet tal-Kummissjoni u l-inklużjoni tal-pajjiżi kandidati fir-rapport ta' din is-sena. Huma tennew l-appoġġ tagħhom għall-eżerċizzju bħala għodda utli biex tiggwida r-riformi nazzjonali u qiesu li huwa importanti li jitkompla d-djalogu b'rispett sħiħ għall-prinċipji tal-oġġettività, in-nondiskriminazzjoni u t-trattament ugwali tal-istati membri kollha.
Il-Kunsill mistenni jkollu diskussjoni speċifika għall-pajjiż fil-laqgħa tal-Kunsill Affarijiet Ġenerali f'Novembru, li ser tiffoka fuq l-iżviluppi f'Malta, in-Netherlands, l-Awstrija u l-Polonja.
Il-ministri kellhom ukoll skambju ta' fehmiet dwar ix-xejra ġenerali tas-sitwazzjoni tal-istat tad-dritt fl-Albanija, il-Montenegro, il-Maċedonja ta' Fuq, u s-Serbja. Għal-laqgħa attendew ministri mill-pajjiżi kkonċernati.
L-Istat tad-dritt għandu rwol ċentrali fil-proċess tat-tkabbir bħala kundizzjoni fundamentali għas-sħubija fl-UE. Din is-sena, l-Albanija, il-Montenegro, il-Maċedonja ta' Fuq, u s-Serbja, bħala l-aktar pajjiżi kandidati avvanzati fil-proċess ta' adeżjoni u fir-rigward tal-livell ta' tħejjija tagħhom dwar l-istat tad-dritt, ġew inklużi għall-ewwel darba fir-rapport tal-Kummissjoni dwar l-istat tad-dritt.
F'dan l-isfond, il-ministri kellhom skambju ġenerali dwar kwistjonijiet tal-istat tad-dritt ma' dawn il-pajjiżi kandidati, iggwidat mill-kapitolu orizzontali tar-rapport tal-Kummissjoni tal-2024. Huma faħħru r-riformi komprensivi li implimentaw jew li bdew biex isaħħu l-istat tad-dritt u ħeġġew lill-erba' pajjiżi kandidati biex ikomplu bl-isforzi ta' riforma tagħhom hekk kif iħejju għas-sħubija fl-UE.
Id-diskussjoni ffukat biss fuq ix-xejriet ġenerali tal-istat tad-dritt u ma nħarġet l-ebda konklużjoni formali wara d-dibattitu. Id-diskussjonijiet dwar l-istat tad-dritt fil-pajjiżi kandidati individwali ser ikomplu jsiru fil-qafas tal-proċess tat-tkabbir.
Il-Kunsill beda t-tħejjijiet għal-laqgħa tal-Kunsill Ewropew tas-17 u t-18 ta' Ottubru 2024 billi ddiskuta abbozz ta' aġenda annotata.
Fil-laqgħa tagħhom f'Ottubru, il-mexxejja tal-UE ser jindirizzaw il-gwerra ta' aggressjoni tar-Russja kontra l-Ukrajna u s-sitwazzjoni fil-Lvant Nofsani. Huma ser ikollhom ukoll l-ewwel skambju dwar ir-rapport ta' Mario Draghi dwar "Il-futur tal-kompetittività Ewropea". Suġġetti possibbli oħra jinkludu l-migrazzjoni, u s-sigurtà u d-difiża.
Bħala parti mis-Semestru Ewropew 2024, il-Kunsill Ewropew ser jiġi mistieden japprova r-rakkomandazzjonijiet integrati speċifiċi għall-pajjiżi.
Taħt "Affarijiet oħra", il-mexxejja ser jevalwaw it-tħejjijiet għal-laqgħat tal-COP29 dwar it-tibdil fil-klima u tal-COP16 dwar id-diversità bijoloġika. Jaf jindirizzaw ukoll kwistjonijiet speċifiċi ta' politika barranija fid-dawl tal-avvenimenti, inkluż l-iżviluppi fil-Georgia u l-Moldova.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
