Kunsill Ġustizzja u Affarijiet Interni, 20/05/2016, 20 ta' Mejju 2016

Riżultati ewlenin

Politika dwar il-Viżi

Il-ministri kellhom dibattitu ġenerali dwar il-politika dwar il-viżi fid-dawl tal-proposti reċenti mill-Kummissjoni relatati mal-liberalizzazzjoni tal-viża.

Il-liberalizzazzjoni tal-viża għandha vantaġġi kbar għall-UE u l-pajjiżi terzi. Minkejja dan għandna bżonn sistema ta' sospensjoni għall-pajjiżi kollha li ma jeħtiġux il-viża biex niżguraw li l-liberalizzazzjoni tal-viża ma tistax tkun abbużata. Ninsab kuntent li llum qbilna dwar sistema li tagħmilha eħfef biex naġixxu kontra l-abbuż. Nistenna bil-ħerqa li naħdem mal-Parlament Ewropew biex dan ma ndumux ma nirrealizzawh Klaas Dijkhoff, Ministru għall-Migrazzjoni tan-Netherlands u President tal-Kunsill

Il-Kunsill enfasizza li r-rekwiżiti ta' viża jistgħu jitneħħew mhux qabel ma jiġu ssodisfati punti ta' riferiment maqbula preċedentement. Il-ministri nnutaw li d-deċiżjoni dwar jekk dawn il-punti ta' riferiment ikunux ġew issodisfati abbażi ta' valutazzjoni mill-Kummissjoni ser tittieħed b'mod strett u ġust.

Il-Kunsill qabel ukoll dwar il-pożizzjoni ta' negozjar tiegħu rigward ir-regolament propost għar-reviżjoni tas-sistema ta' sospensjoni li tista' tiġi applikata għall-ftehimiet kollha eżistenti dwar il-liberalizzazzjoni tal-viża. Fuq il-bażi ta’ dan il-mandat, il-presidenza Netherlandiża ser tibda negozjati mal-Parlament Ewropew hekk kif dan tal-aħħar ikun adotta l-pożizzjoni tiegħu.

Klaas Dijkhoff, Ministru għall-Migrazzjoni tan-Netherlands u President tal-Kunsill qal: "Il-liberalizzazzjoni tal-viża għandha vantaġġi kbar għall-UE u l-pajjiżi terzi. Minkejja dan għandna bżonn ta' sistema ta' sospensjoni għall-pajjiżi kollha li ma jeħtiġux il-viża biex niżguraw li l-liberalizzazzjoni tal-viża ma tistax tkun abbużata. Ninsab kuntent li llum qbilna dwar mekkaniżmu li jagħmilha eħfef biex naġixxu kontra l-abbuż. Nistenna bil-ħerqa li naħdem mal-Parlament Ewropew biex dan ma ndumux ma nirrealizzawh".

Migrazzjoni

Il-ministri għall-affarijiet interni kellhom skambju ta' fehmiet dwar is-sitwazzjoni migratorja attwali, b'mod partikolari l-implimentazzjoni tad-dikjarazzjoni UE-Turkija tat-18 ta' Marzu u l-flussi migratorji fiċ-Ċentru tal-Mediterran.

L-istati parteċipanti kienu mistiedna b'mod partikolari biex iħaffu r-risistemazzjoni tar-refuġjati Sirjani mit-Turkija fil-qafas tal-iskema 1:1 u ġew imħeġġa wkoll jaċċelleraw ir-rilokazzjoni ta' dawk li qed ifittxu l-asil mill-Greċja u l-Italja, f'konformità mad-deċiżjonijiet tal-Kunsill ta' Settembru 2015.

L-istati membri kkondividew l-analiżi magħmula mill-Kummissjoni dwar il-miżuri meħuda mit-Turkija mill-20 ta' Marzu 'l hawn, inkluż il-valutazzjoni li t-Turkija ħadet il-passi neċessarji kollha identifikati fil-Komunikazzjoni tas-16 ta' Marzu. L-istati membri esprimew il-konvinzjoni tagħhom li l-migranti jistgħu u għandhom jiġu rritornati lejn it-Turkija f'konformità mad-dikjarazzjoni UE-Turkija tat-18 ta' Marzu.

Gwardja Ewropea tal-Fruntiera

Il-ministri ġew infurmati dwar il-progress fl-abbozz ta' regolament dwar il-Gwardja Ewropea tal-Fruntiera. L-għan tal-Presidenza hu li jintlaħaq ftehim miż-żewġ koleġislaturi sal-aħħar ta' Ġunju, kif mitlub mill-Kunsill Ewropew.