Riżultati ewlenin

Żamma ta' data

Il-ministri kellhom skambju ta' fehmiet dwar iż-żamma ta' data ta' komunikazzjoni elettronika mill-fornituri tas-servizzi, li jistgħu jiżvelawha lill-awtoritajiet tal-infurzar tal-liġi u dawk ġudizzjarji taħt ċerti kondizzjonijiet stretti. Il-ministri qiesu, b'mod partikolari, jekk il-leġiżlazzjoni għandhiex tiġi adottata fil-livell tal-UE biex jiġi żgurat reġim legali armonizzat jew jekk il-kooperazzjoni tal-pulizija u dik ġudizzjarja għandhomx jiddependu biss fuq il-liġijiet nazzjonali dwar iż-żamma ta' data.

Il-ministri tennew it-tħassib tagħhom dwar l-impatt tal-każistika reċenti tal-Qorti Ewropea tal-Ġustizzja dwar l-investigazzjonijiet kriminali. Enfasizzaw il-ħtieġa li jinsab approċċ komuni dwar din il-kwistjoni li jkun konformi mas-sentenzi tal-qorti u li jirrispetta bis-sħiħ id-drittijiet fundamentali, u maġġoranza kbira tagħhom qiesu li jkun meħtieġ qafas legali Ewropew komuni biex jinkiseb rispons koerenti fil-livell tal-UE. Il-Presidenza u l-Kummissjoni Ewropea issa ser jirriflettu dwar il-passi li jmiss.

Iż-żamma ta' data hija għodda kruċjali għall-awtoritajiet tal-infurzar tal-liġi tagħna meta jwettqu l-investigazzjonijiet, u huwa ċar li s-sitwazzjoni attwali ta' inċertezza żżid ir-riskji għas-sigurtà taċ-ċittadini tagħna. Illum tennejna l-impenn tagħna biex tinstab soluzzjoni komuni; soluzzjoni li tippermetti li l-pulizija u l-awtoritajiet ġudizzjarji tagħna jwettqu xogħolhom filwaqt li tiżgura b'mod sħiħ id-drittijiet għall-privatezza taċ-ċittadini tagħna. Francisca Van Dunem, Ministru għall-Ġustizzja tal-Portugall

Drittijiet fundamentali

Il-ministri ddiskutew kif tista' tissaħħaħ l-applikazzjoni tal-Karta tad-Drittijiet Fundamentali tal-UE, u laqgħu l-istrateġija tal-Kummissjoni ppreżentata f'Diċembru 2020 u l-konklużjonijiet reċenti tal-Kunsill dwar dan is-suġġett. Enfasizzaw ukoll ir-rwol importanti tal-aġenzija tal-UE għad-drittijiet fundamentali (FRA).

L-Istrateġija tal-Kummissjoni u l-konklużjonijiet tal-Kunsill jiffukaw fuq azzjonijiet immirati u prattiċi, bħal taħriġ, sensibilizzazzjoni tal-pubbliku, finanzjament xieraq u monitoraġġ tal-atti rilevanti, li permezz tagħhom l-implimentazzjoni tal-Karta tista' tissaħħaħ b'mod konkret.

• Konklużjonijiet tal-Kunsill dwar it-tisħiħ tal-applikazzjoni tal-Karta tad-Drittijiet Fundamentali fl-UE (5 ta' Marzu 2021)
• Strateġija tal-Kummissjoni biex tissaħħaħ l-applikazzjoni tal-Karta tad-Drittijiet Fundamentali fl-UE (2 ta' Diċembru 2020)
• Protezzjoni u promozzjoni tad-drittijiet tal-bniedem (informazzjoni ġenerali)

Taħriġ ġudizzjarju

Il-ministri ġew infurmati dwar il-konklużjonijiet dwar it-tisħiħ tat-taħriġ tal-professjonisti tal-ġustizzja adottati fit-8 ta' Marzu 2021.

Dawn il-konklużjonijiet jilqgħu l-istrateġija ambizzjuża Ewropea għat-taħriġ ġudizzjarju għall-2021-2024, ippreżentata mill-Kummissjoni f'Diċembru 2020, u jenfasizzaw li t-taħriġ ġudizzjarju Ewropew għandu jikkontribwixxi għat-trawwim tar-rispett għall-istat tad-dritt u t-tisħiħ tal-kultura Ewropea tal-istat tad-dritt. Il-konklużjonijiet jenfasizzaw ukoll ir-rabtiet mill-qrib bejn it-taħriġ ġudizzjarju u d-diġitalizzazzjoni tal-ġustizzja fl-UE.

Fil-konklużjonijiet, il-Kunsill jappella lill-istati membri biex jinkoraġġixxu l-użu ta' possibbiltajiet ta' taħriġ, jinvestu fid-diġitalizzazzjoni tat-taħriġ ġudizzjarju, isaħħu t-taħriġ fid-dritt tal-UE, jenfasizzaw l-approċċ multidixxiplinari tat-taħriġ ġudizzjarju u jipprovdu appoġġ lill-ġudikaturi lil hinn mill-UE, b'mod partikolari dawk fil-Balkani tal-Punent.

• Konklużjonijiet tal-Kunsill dwar it-tisħiħ tat-taħriġ tal-professjonisti tal-ġustizzja (8 ta' Marzu 2021)

Uffiċċju tal-Prosekutur Pubbliku Ewropew

Il-ministri għall-ġustizzja ġew infurmati mill-Kummissjoni dwar is-sitwazzjoni attwali fir-rigward tal-implimentazzjoni tar-regolament dwar l-UPPE. Għaddejja ħidma f'diversi oqsma sabiex l-UPPE jibda jopera malajr kemm jista' jkun.

F'dawn l-aħħar xhur sar progress fir-rigward tal-ħatra tal-Prosekuturi Delegati Ewropej, madankollu n-nomini minn għadd ta' stati membri għadhom pendenti. Għaddejja wkoll ħidma fir-rigward tar-relazzjonijiet tal-UPPE ma' pajjiżi terzi u organizzazzjonijiet internazzjonali. Din tinkludi n-notifika tal-UPPE bħala awtorità ġudizzjarja kompetenti skont il-konvenzjonijiet rilevanti tan-NU u fir-rigward tal-Konvenzjoni Ewropea tal-1959 dwar l-assistenza reċiproka f'materji kriminali. Tikkonċerna wkoll l-identifikazzjoni ta' pajjiżi terzi li magħhom l-UPPE jista' jikkonkludi ftehimiet operazzjonali.

• Uffiċċju tal-Prosekutur Pubbliku Ewropew (informazzjoni ġenerali)