"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għall-affarijiet interni, 12 ta' Marzu 2021
Riżultati ewlenin
Reżiljenza ta' entitajiet kritiċi
Il-ministri għall-affarijiet interni ddiskutew il-proposta għal direttiva biex tissaħħaħ ir-reżiljenza ta' entitajiet kritiċi li jipprovdu servizzi essenzjali, bħas-saħħa, it-trasport u l-ilma tax-xorb, fl-UE. Il-ministri qasmu l-fehmiet preliminari tagħhom dwar il-proposta tal-Kummissjoni ppreżentata f'Diċembru 2020.
Il-pandemija attwali tal-COVID-19 reġgħet poġġiet fuq quddiem nett l-interdipendenza tas-soċjetajiet tagħna. Huwa biss jekk naħdmu flimkien li niżguraw li s-servizzi kritiċi għall-ħajja ta' kuljum taċ-ċittadini tagħna jkunu reżiljenti u lesti jifilħu għal kwalunkwe sfida futura, kemm jekk dawn huma pandemija futura, attakk terroristiku jew l-effetti tat-tibdil fil-klima. Illum, il-ministri wrew l-impenn tagħhom li jpoġġu din ir-rieda f'azzjoni konkreta billi jagħtu mandat lill-Presidenza biex tkompli l-ħidma fuq din id-direttiva importanti.
Eduardo Cabrita, Ministru għall-Intern tal-Portugall
Il-ministri b'mod ġenerali kienu tal-fehma li aġġornament tal-leġiżlazzjoni f'dan il-qasam huwa meħtieġ, b'mod partikolari biex jiżdied l-għadd ta' setturi koperti. Għadd ta' stati membri enfasizzaw ukoll l-importanza li jitwessa' l-kamp ta' applikazzjoni mill-ħarsien tal-infrastruttura għall-kunċett usa' ta' reżiljenza tal-entitajiet, inkluż il-kapaċità ta' rkupru u l-kontinwità tal-operat.
Matul id-diskussjoni kien hemm kunsens wiesa' dwar il-ħtieġa li tissaħħaħ ir-rabta bejn iċ-ċibersigurtà u s-sigurtà fiżika u li tiġi żgurata l-komplementarjetà bejn din il-proposta u l-abbozz ta' direttiva dwar miżuri għal livell komuni għoli ta' ċibersigurtà madwar l-UE, li bħalissa qed jiġi diskuss ukoll. Barra minn hekk, ħafna stati membri enfasizzaw li l-ħtieġa li jiġu stabbiliti regoli komuni minimi fil-livell tal-UE kellha tiġi bbilanċjata mar-responsabbiltà primarja tal-istati membri fuq is-sigurtà nazzjonali. Fl-aħħar nett, xi stati membri enfasizzaw ukoll il-ħtieġa li jinstab il-bilanċ it-tajjeb bejn approċċ komuni u ċerta flessibbiltà li tieħu kont tad-differenzi fl-istrutturi nazzjonali.
Il-ħidma dwar din il-proposta issa ser tkompli fuq livell tekniku.
- Kooperazzjoni ma' pajjiżi terzi dwar ir-ritorn u r-riammissjoni
Il-ministri ddiskutew l-aspetti esterni tal-migrazzjoni, abbażi ta' komunikazzjoni tal-Kummissjoni dwar it-tisħiħ tal-kooperazzjoni dwar ir-ritorn u r-riammissjoni u l-valutazzjoni tal-kooperazzjoni ta' pajjiżi terzi dwar ir-riammissjoni bħala parti mill-mekkaniżmu l-ġdid tal-kodiċi tal-viża.
Il-ministri tennew l-importanza ta' kooperazzjoni effettiva dwar ir-ritorn u r-riammissjoni bħala parti mill-involviment usa' ma' pajjiżi terzi dwar il-migrazzjoni. Huma qablu li l-ħidma f'dan il-qasam għandha tkompli rapidament bil-ħsieb li tittejjeb il-kooperazzjoni mal-pajjiżi ewlenin malajr kemm jista' jkun. Il-Presidenza issa ser tmexxi l-ħidma 'l quddiem fil-livell tekniku abbażi ta' din id-diskussjoni.
- Patt dwar il-migrazzjoni u ażil
Il-presidenza aġġornat lill-ministri dwar is-sitwazzjoni attwali tan-negozjati fir-rigward tal-patt dwar il-migrazzjoni u l-ażil. Għaddejja ħidma fuq il-firxa wiesgħa ta' kwistjonijiet koperti mill-patt f'livelli differenti.
Fil-livell politiku, il-Presidenza indikat l-intenzjoni tagħha li tikkonċentra fuq xi wħud mill-kwistjonijiet politiċi ewlenin identifikati f'diskussjonijiet preċedenti, inkluż id-dimensjoni esterna, il-ġestjoni effettiva tal-fruntieri esterni tal-UE u s-solidarjetà u r-responsabbiltà. Fil-livell tekniku, il-ħidma qed tavvanza fuq l-istrumenti marbuta mad-dimensjoni interna tal-migrazzjoni. Id-diskussjonijiet dwar xi wħud minn dawn l-istrumenti diġà jinsabu fi stadju avvanzat, b'mod partikolari l-aġenzija għall-ażil tal-UE u d-direttiva dwar il-karta blu.
Kooperazzjoni bejn l-UE u l-pajjiżi tal-Afrika ta' Fuq
Il-ministri kellhom skambju ta' fehmiet dwar it-tisħiħ tal-kooperazzjoni bejn l-UE u l-pajjiżi tal-Afrika ta' Fuq, abbażi ta' proposta tal-Presidenza biex jitnieda djalogu politiku dwar il-ġustizzja u l-affarijiet interni ma' pajjiżi f'dan ir-reġjun, iffukat fuq it-tisħiħ tal-kooperazzjoni operattiva. Il-Presidenza tipproponi li jiġu inklużi l-Eġittu, il-Libja, it-Tuneżija, l-Alġerija u l-Marokk, u fit-tieni stadju l-pajjiżi fuq il-Kosta tal-Punent tal-Afrika u fir-reġjun tas-Saħel.
Il-maġġoranza tal-istati membri tkellmu biex jappoġġaw l-inizjattiva, u wrew kunsens wiesa' favur l-inizjattiva tal-Presidenza. Diversi stati membri indikaw il-ħtieġa għal koerenza mal-qafas ta' politika u l-formati ta' kooperazzjoni eżistenti bħad-djalogi settorjali. Dwar is-suġġetti, maġġoranza ta' stati membri appellaw biex jikkonċentraw fuq il-migrazzjoni, oħrajn semmew ukoll is-sigurtà (inkluż il-ġlieda kontra t-terroriżmu u l-kriminalità organizzata). Il-Presidenza ħabbret l-intenzjoni tagħha li torganizza laqgħa ministerjali mal-pajjiżi tal-Afrika ta' Fuq f'Mejju.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-pandemija attwali tal-COVID-19 reġgħet poġġiet fuq quddiem nett l-interdipendenza tas-soċjetajiet tagħna. Huwa biss jekk naħdmu flimkien li niżguraw li s-servizzi kritiċi għall-ħajja ta' kuljum taċ-ċittadini tagħna jkunu reżiljenti u lesti jifilħu għal kwalunkwe sfida futura, kemm jekk dawn huma pandemija futura, attakk terroristiku jew l-effetti tat-tibdil fil-klima. Illum, il-ministri wrew l-impenn tagħhom li jpoġġu din ir-rieda f'azzjoni konkreta billi jagħtu mandat lill-Presidenza biex tkompli l-ħidma fuq din id-direttiva importanti.