Kunsill Trasport, Telekomunikazzjoni u Enerġija, 26/06/2017, 26 ta' Ġunju 2017

Riżultati ewlenin

Il-Kunsill adotta, mingħajr dibattitu, regolament dwar

• it-tikkettar tal-effiċjenza tal-enerġija li jippermetti lill-konsumaturi jkunu aktar konxji mill-effiċjenza fl-enerġija u l-konsum ta' enerġija ta’ apparat domestiku, u għaldaqstant jgħinhom inaqqsu l-ispejjeż tal-enerġija tagħhom u jikkontribwixxi għall-moderazzjoni tad-domanda għall-enerġija.

• Tikkettar tal-enerġija aktar ċar: effiċjenza mtejba fl-enerġija (stqarrija għall-istampa, 26/06/17)

Il-Kunsill approva l-pożizzjoni tiegħu dwar żewġ proposti għal direttivi riveduti dwar

• l-effiċjenza fl-użu tal-enerġija, li tistabbilixxi mira tal-UE ta’ 30 % għall-effiċjenza fl-użu tal-enerġija u obbligu ta’ ffrankar tal-enerġija ta’ 1.5 %, li jonqos għal 1.0 % għall-perjodu 2026-2030, dment li l-evalwazzjoni ta' nofs it-terminu li l-Kummissjoni ser twettaq fl-2024 ma tikkonkludix li l-UE ma tkunx fit-triq it-tajba biex tilħaq il-miri tagħha.

• Aktar effiċjenza enerġetika: niżguraw progress lejn il-miri tal-UE għall-klima u l-enerġija (stqarrija għall-istampa, 26/06/17)

• ir-rendiment tal-bini fl-użu tal-enerġija li għandha l-għan li tippromwovi l-effiċjenza fl-użu tal-enerġija fil-bini u tappoġġa r-rinnovament kosteffettiv tal-bini bil-ħsieb tal-għan fit-tul tad-dekarbonizzazzjoni tal-istokk ferm ineffiċjenti tal-bini Ewropew eżistenti.

• Bini effiċjenti fl-użu tal-enerġija: iffrankar akbar ta' enerġija u kundizzjonijiet aħjar tal-għajxien (stqarrija għall-istampa, 26/06/17)

Il-Kunsill ħa nota ta’ rapport ta’ progress fil-fajls leġislattivi tal-pakkett dwar l-enerġija nadifa b’mod partikolari fir-rigward tas-suq intern għall-elettriku, il-governanza u l-enerġija minn sorsi rinnovabbli.

Il-ministri rrikonoxxew l-importanza ta’ din il-leġislazzjoni u l-ħtieġa li jsir progress malajr kemm jista’ jkun, iżda enfasizzaw ukoll li, minħabba l-implikazzjonijiet estensivi tal-proposti, jeħtieġ li jsir eżami fil-fond.

“Aħna kburin ħafna li lħaqna dawn il-pożizzjonijiet tal-Kunsill, fatt li jibgħat messaġġ lill-pubbliku li l-Kunsill qed jieħu l-impenji tiegħu fir-rigward tal-enerġija u l-klima bis-serjetà u huwa lest jimpenja ruħu f’negozjati mal-Parlament Ewropew mill-aktar fis possibbli. Iż-żewġ atti leġislattivi ser isawru l-miżuri għall-effiċjenza fl-użu tal-enerġija li l-istati membri ser jieħdu fl-għaxar snin li ġejjin u wara.”

Joe Mizzi, il-ministru Malti għall-Enerġija u l-Ġestjoni tal-Ilma

Il-Kunsill ġie infurmat mill-Kummissjoni dwar l-iżviluppi reċenti fil-qasam tar-relazzjonijiet esterni fil-qasam tal-enerġija, inkluż dwar it-talba reċenti tal-Kummissjoni għal mandat ta’ negozjar għal ftehim bejn l-UE u l-Federazzjoni Russa dwar tal-pipeline Nord Stream 2.

Il-Kummissjoni spjegat li l-għan tal-ftehim huwa li tiġi evitata inċertezza legali u li jiġi żgurat li l-parti tal-pipeline fuq l-art tikkonforma mal-leġislazzjoni rilevanti kollha tal-UE f’dan il-qasam, li tinkludi s-suq intern tal-enerġija, is-sigurtà tal-provvista tal-gass, il-kompetizzjoni u l-ambjent.