Kunsill Trasport, Telekomunikazzjoni u Enerġija (Enerġija), 04/03/2019, 4 ta' Marzu 2019

Riżultati ewlenin

Tikkettar tat-tajers

Il-Kunsill adotta approċċ ġenerali għar-reviżjoni tar-regolament dwar it-tikkettar tat-tajers. Ir-reviżjoni taġġorna t-tikketti tal-enerġija u l-prestazzjoni tas-sikurezza tat-tajers u testendi l-ambitu tas-sistema ta’ tikkettar għal tajers għall-vetturi tqal. Ir-rekwiżiti l-ġodda rigward fejn titqiegħed it-tikketta, inkluż għal bejgħ mill-bogħod u bejgħ bl-internet, kif ukoll dispożizzjonijiet imsaħħa ta’ infruzar se jtejbu l-viżibbiltà għall-konsumaturi u jiżguraw li jkunu infurmati b'mod sħiħ meta jiddeċiedu x'jixtru. In-negozjati mal-Parlament Ewropew mistennija jibdew fil-ħarifa.

• Tajers aktar nodfa, aktar sikuri, aktar silenzjużi: it-tikketti se jsiru aktar viżibbli għall-konsumaturi (stqarrija għall-istampa, 4 ta’ Marzu 2019)

Viżjoni strateġika għal ekonomija newtrali għall-klima

Il-ministri għall-enerġija kellhom dibattitu ta’ orjentazzjoni f’sessjoni pubblika dwar il-komunikazzjoni tal-Kummissjoni "Pjaneta Nadifa għal kulħadd: Viżjoni strateġika Ewropea fit-tul għal ekonomija għanja, moderna, kompetittiva u newtrali għall-klima". Dan hu wieħed minn sensiela ta’ dibattiti dwar dan is-suġġett li saret f’konfigurazzjonijiet differenti tal-Kunsill matul is-semestru attwali. Id-diskussjoni kkonċentrat fuq aspetti relatati mal-enerġija tal-viżjoni strateġika. Kienet iggwidata minn ġabra ta’ mistoqsijiet proposti mill-Presidenza, li jindirizzaw il-bidliet strutturali meħtieġa fis-sistema tal-enerġija, soluzzjonijiet teknoloġiċi ġodda, u l-ħtieġa għal “tranżizzjoni ġusta”.

Kellna dibattitu kostruttiv ħafna dwar il-kwistjonijiet relatati mal-enerġija tal-viżjoni strateġika fit-tul għal ekonomija newtrali għall-klima. Il-bidla għal enerġija nadifa hija element importanti fil-politika tal-UE dwar it-tibdil fil-klima. Diġà ksibna ħafna f’dawn l-aħħar snin biex nagħmlu din it-tranżizzjoni realtà, mhux l-inqas il-pakkett dwar l-Enerġija Nadifa li ġie konkluż is-sena li għaddiet. Illum ikkunsidrajna kif nibnu fuq dan il-progress u nimxu 'l quddiem fil-ġejjieni. Anton Anton, Ministru għall-Enerġija tar-Rumanija u l-president tal-Kunsill

• Komunikazzjoni tal-Kummissjoni "Pjaneta Nadifa għal kulħadd"

Punti oħra fuq l-aġenda

Taħt affarijiet oħra, il-Kunsill ġie infurmat dwar is-sitwazzjoni attwali tad-direttiva dwar il-gass. Qbil politiku proviżorju mal-Parlament Ewropew dwar dan il-fajl intlaħaq fit-12 ta’ Frar 2019 u ġie approvat mill-ambaxxaturi għall-UE fl-20 ta’ Frar 2019.

• Direttiva dwar il-gass: Qbil proviżorju dwar regoli ġodda għall-pipelines tal-gass lejn u minn pajjiżi terzi (stqarrija għall-istampa, 13/02/2019)

Il-presidenza infurmat ukoll lill-ministri dwar is-sitwazzjoni attwali tan-negozjati dwar il-Faċilità Nikkollegaw l-Ewropa.