"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Trasport, Telekomunikazzjoni u Enerġija (Enerġija), 16 ta' Marzu 2026
Riżultati ewlenin
Pakkett dwar il-grilji Ewropej
Il-ministri għall-enerġija tal-UE kellhom dibattitu ta' orjentazzjoni b'rabta mal-pakkett dwar il-grilji Ewropej: il-proposti tal-Kummissjoni għar-reviżjoni tar-regolament eżistenti dwar l-infrastruttura tal-enerġija trans-Ewropea (TEN-E) u għad-direttiva dwar l-għoti ta' permessi, li ġew ippreżentati fl-10 ta' Diċembru 2025.
L-għan tal-pakkett dwar il-grilji huwa li jtejjeb l-interkonnettività transfruntiera, jagħti spinta lill-elettrifikazzjoni u jħaffef il-ħruġ tal-permessi għall-grilji, filwaqt li jagħmel l-infrastruttura transfruntiera aktar reżiljenti u sigura.
Ewropa aktar konnessa hija Ewropa awtonoma u aktar reżiljenti – waħda fejn is-sigurtà tal-enerġija ma tiqafx fil-fruntieri nazzjonali. Iż-żieda reċenti fil-prezzijiet tal-enerġija u l-instabbiltà dinjija għamluha ċara li t-titjib u l-avvanz tal-interkonnettività transfruntiera fl-UE saru imperattiv strateġiku. Id-diskussjoni kostruttiva tal-lum hija pass importanti lejn it-twettiq rapidu tal-pakkett tal-grilji, biex tiġi żgurata enerġija affordabbli u domestika għall-industriji tagħna biex jirnexxu u għal kontijiet tal-konsumatur aktar baxxi mal-UE kollha.
Michael Damianos, Ministru għall-Enerġija, il-Kummerċ u l-Industrija tar-Repubblika ta' Ċipru
Il-ministri ffukaw fuq tliet kwistjonijiet: l-ippjanar integrat tal-infrastruttura tal-enerġija bbażat fuq xenarju komuni, il-finanzjament u l-kondiviżjoni tal-kostijiet tal-grilji u l-esplorazzjoni ta' modi biex jitħaffef l-għoti tal-permessi, filwaqt li jitħares l-ambjent u jiġu rispettati l-kompetenzi tal-pajjiżi tal-UE.
Pjan ta' azzjoni dwar l-enerġija affordabbli: sena wara
Il-Kunsill evalwa l-progress li sar fil-pjan ta' azzjoni dwar l-enerġija affordabbli, li ġie ppreżentat mill-Kummissjoni sena ilu u li għandu l-għan li jnaqqas il-kostijiet tal-enerġija.
Matul l-iskambju ta' fehmiet, il-ministri għall-enerġija ppreżentaw miżuri meħuda fil-livell nazzjonali biex jindirizzaw il-prezzijiet għoljin tal-enerġija b'mod effettiv u eżaminaw toroq possibbli 'l quddiem biex jindirizzaw din il-kwistjoni fuq terminu qasir, b'mod partikolari fid-dawl taż-żieda fil-prezzijiet tal-gass u taż-żejt wara s-sitwazzjoni fir-reġjun tal-Golf.
Il-ministri ssottolinjaw il-ħtieġa għal interventi mmirati fuq terminu qasir biex tingħata għajnuna lir-reġjuni u s-setturi affettwati mill-volatilità tal-prezzijiet, filwaqt li jiġu ppreservati sinjali ta' investiment fit-tul għat-teknoloġiji rinnovabbli u b'livell baxx ta' emissjonijiet tal-karbonju meħtieġa għat-tranżizzjoni tal-enerġija. Il-prevedibbiltà regolatorja għall-investimenti kienet ukoll element ewlieni tad-diskussjoni, b'ħafna stati membri jitkellmu favur li nibnu fuq is-sistemi u l-mekkaniżmi diġà eżistenti tal-UE, bħas-sistema għall-iskambju ta' kwoti tal-emissjonijiet u d-disinn attwali tas-suq tal-elettriku.
Sigurtà tal-enerġija: tagħlimiet meħuda mill-Ukrajna u l-Moldova
Il-ministri qasmu l-fehmiet tagħhom dwar it-tisħiħ tat-tħejjija tal-UE permezz ta' tagħlimiet tekniċi u operazzjonali kondiviżi mal-Ukrajna u l-Moldova. Huma esploraw ukoll modi kif jippromwovu s-sigurtà reċiproka tal-enerġija u l-kooperazzjoni bejn l-UE u s-sħab tagħha, billi jiffaċilitaw il-flussi bidirezzjonali tal-enerġija.
Magħhom ingħaqdu l-Ministru għall-Enerġija tal-Moldova, Dorin Junghietu u l-Ewwel Viċi Prim Ministru tal-Ukrajna – Ministru għall-Enerġija tal-Ukrajna, Denys Shmyhal.
Waqt l-ikla ta' nofsinhar, id-Direttur ad interim tal-ACER, Volker Zuleger, u d-Direttur Ġenerali tad-Direttorat għall-Proġetti tal-BEI, Laura Piovesan, ingħaqdu mal-ministri biex jiddiskutu modi kif jitħaffu l-investimenti fl-enerġija nadifa għall-kompetittività Ewropea.
Diskussjonijiet oħra
Matul il-laqgħa, il-ministri ġew infurmati wkoll dwar il-kwistjonijiet li ġejjin:
L-Awstrija ġibdet l-attenzjoni tal-Kunsill għat-titjib tal-ordni tal-mertu, it-trasparenza u miżuri biex jiġi indirizzat it-trasferiment tal-ETS fil-prezzijiet tal-elettriku ta' ġurnata bil-quddiem tal-UE.
L-Ungerija u s-Slovakkja infurmaw dwar l-implikazzjonijiet tal-interruzzjonijiet fuq il-pipeline taż-żejt ta' Druzhba għas-sigurtà tal-provvista taż-żejt.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
