Kronoloġija - Intelliġenza artifiċjali

Il-Kunsill ta l-approvazzjoni finali tiegħu għal regolament ġdid li għandu l-għan li jirrazzjonalizza u jissimplifika ċerti regoli rigwardl-intelliġenza artifiċjali (IA).

L-elementi ewlenin tar-regolament il-ġdid huma:

• skeda ta' żmien fissa għall-applikazzjoni mdewma tar-regoli ta' riskju għoli: it-2 ta' Diċembru 2027 għal sistemi awtonomi tal-IA b'riskju għoli u t-2 ta' Awwissu 2028 għal sistemi tal-IA b'riskju għoli inkorporati fi prodotti
• dispożizzjoni ġdida fl-att dwar l-IA li tipprojbixxi prattiki tal-IA li jirrigwardaw il-ġenerazzjoni ta' kontenut sesswali u intimu mhux kunsenswali jew materjal ta' abbuż sesswali tat-tfal
• il-posponiment tal-iskadenza għall-istabbiliment ta' ambjent sperimentali regolatorju għall-IA mill-awtoritajiet kompetenti fil-livell nazzjonali sat-2 ta' Diċembru 2027 u perjodu ta' konċessjoni mnaqqas għall-fornituri biex jimplimentaw soluzzjonijiet ta' trasparenza għal kontenut iġġenerat artifiċjalment minn 6 xhur għal 3 xhur, bl-iskadenza l-ġdida stabbilita għat-2 ta' Diċembru 2026
• il-kjarifika tal-kompetenzi tal-Uffiċċju għall-IA għas-superviżjoni tas-sistemi tal-IA bbażati fuq mudelli tal-IA bi skop ġenerali fejn il-mudell u dik is-sistema jiġu żviluppati mill-istess fornitur

Dwarl-interazzjoni tar-regoli tal-IA mal-leġiżlazzjoni settorjali f'setturi bħall-apparati mediċi, il-ġugarelli, il-liftijiet u l-inġenji tal-ilma, il-liġi l-ġdida tipprevedi mekkaniżmu li jippermetti li jiġu solvuti sitwazzjonijiet fejn il-liġi settorjali jkollha rekwiżiti simili speċifiċi għall-IA għall-att dwar l-IA, billi tiġi limitata l-applikazzjoni ta' dan tal-aħħar f'dawk il-każijiet speċifiċi permezz ta' atti ta' implimentazzjoni.

L-adozzjoni tal-omnibus dwar l-IA hija riżultat ewlieni tal-pjan direzzjonali "Ewropa Waħda, Suq Wieħed".

• Intelliġenza Artifiċjali: il-Kunsill jagħti l-approvazzjoni finali biex jiġu ssimplifikati u razzjonalizzati r-regoli (stqarrija għall-istampa, 29 ta' Ġunju 2026)

Il-presidenza tal-Kunsill u n-negozjaturi tal-Parlament Ewropew laħqu ftehim proviżorju dwar proposta biex jiġu ssimplifikati ċerti regoli rigward l-intelliġenza artifiċjali (IA), parti mill-pakkett leġiżlattiv Omnibus VII.

Il-koleġiżlaturi:

• żiedu dispożizzjoni ġdida fl-att dwar l-IA li tipprojbixxi prattiki tal-IA li jirrigwardaw il-ġenerazzjoni ta' kontenut sesswali u intimu mhux kunsenswali jew materjal ta' abbuż sesswali tat-tfal
• introduċew skeda ta' żmien fissa għall-applikazzjoni mdewma tar-regoli ta' riskju għoli: it-2 ta' Diċembru 2027 għal sistemi awtonomi tal-IA b'riskju għoli u t-2 ta' Awwissu 2028 għal sistemi tal-IA b'riskju għoli inkorporati fi prodotti
• reġgħu daħħlu l-obbligu għall-fornituri li jirreġistraw is-sistemi tal-IA fil-bażi tad-data tal-UE għas-sistemi b'riskju għoli, meta jqisu li s-sistemi tagħhom huma eżentati mill-klassifikazzjoni bħala b'riskju għoli
• reġgħu daħħlu l-istandard ta' neċessità stretta għall-ipproċessar ta' kategoriji speċjali ta' data personali għall-fini li jiġu żgurati l-kxif u l-korrezzjoni tal-preġudizzji
• ipposponew l-iskadenza għall-istabbiliment ta'ambjenti ta' esperimentazzjoni regolatorjagħall-IA mill-awtoritajiet kompetenti fil-livell nazzjonali sat-2 ta' Diċembru 2027 u naqqsu l-perjodu ta' konċessjoni għall-fornituri biex jimplimentawsoluzzjonijiet ta' trasparenza għal kontenut iġġenerat artifiċjalment minn 6 xhur għal 3 xhur, bl-iskadenza l-ġdida stabbilita għat-2 ta' Diċembru 2026
• iċċaraw il-kompetenzi tal-Uffiċċju għall-IA għas-superviżjoni tas-sistemi tal-IA bbażati fuq mudelli tal-IA bi skop ġenerali fejn il-mudell u dik is-sistema jiġu żviluppati mill-istess fornitur

Fir-rigward tar-regoli tal-att dwar l-IA għall-IA industrijali u l-interazzjoni tagħhom mal-leġiżlazzjoni settorjali f'setturi, instab kompromess bejn il-koleġiżlaturi dwar mekkaniżmu li jippermetti li jiġu solvuti sitwazzjonijiet fejn il-liġi settorjali jkollha rekwiżiti simili speċifiċi għall-IA għall-att dwar l-IA, billi tiġi limitata l-applikazzjoni ta' dan tal-aħħar f'dawk il-każijiet speċifiċi permezz ta' atti ta' implimentazzjoni.

• Intelliġenza artifiċjali: il-Kunsill u l-Parlament jaqblu li jissimplifikaw ir-regoli (stqarrija għall-istampa, 7 ta' Mejju 2026)

Illum il-Kunsill qabel dwar il-pożizzjoni tiegħu dwar il-proposta biex jiġu ssimplifikati ċerti regoli dwar l-IA.

Il-proposta tifforma parti mill-hekk imsejjaħ pakkett leġiżlattiv "Omnibus VII" fl-aġenda ta' simplifikazzjoni tal-UE. Il-pakkett jinkludi proposti għal żewġ regolamenti li għandhom l-għan li jissimplifikaw il-qafas leġiżlattiv diġitali tal-UE u l-implimentazzjoni ta' regoli armonizzati dwar l-IA.

• Il-Kunsill jaqbel dwar pożizzjoni biex jiġu ssimplifikati r-regoli dwar l-Intelliġenza Artifiċjali (stqarrija għall-istampa, 13 ta' Marzu 2026)

Il-Kunsill approva l-att dwar l-intelliġenza artifiċjali (IA), liġi rivoluzzjonarja li għandha l-għan li tarmonizza r-regoli dwar l-intelliġenza artifiċjali. Il-leġiżlazzjoni ewlenija ssegwi approċċ "ibbażat fuq ir-riskju", li jfisser li aktar ma jkun għoli r-riskju li ssir ħsara lis-soċjetà, aktar ir-regoli jkunu stretti.

Din hija l-ewwel liġi ta' dan it-tip fid-dinja u tista' tistabbilixxi standard globali għar-regolamentazzjoni tal-IA. 

• Att dwar l-intelliġenza artifiċjali (IA): il-Kunsill jagħti l-approvazzjoni finali għall-ewwel regoli dinjija dwar l-IA (stqarrija għall-istampa, 21 ta' Mejju 2024)

Wara taħditiet "maratona" twal tliet ijiem , il-Kunsill u l-Parlament Ewropew laħqu ftehim proviżorju dwar il-liġi fid-9 ta' Diċembru 2023, wara xhur ta' negozjati.

L-att dwar l-IA jarmonizza r-regoli dwar is-sistemi tal-IA filwaqt li jiżguraw li dawn ikunu sikuri u jirrispettaw id-drittijiet fundamentali u l-valuri tal-UE.

It-test finali jeħtieġ li jiġi adottat formalment kemm mill-Kunsill kif ukoll mill-Parlament, bħala l-koleġiżlaturi tal-UE. L-att dwar l-IA għandu japplika mill-2026.

• Att dwar l-intelliġenza artifiċjali: il-Kunsill u l-Parlament jilħqu ftehim dwar l-ewwel regoli dinjija għall-IA (stqarrija għall-istampa, 7 ta' Diċembru 2023)

Il-Kunsill adotta l-pożizzjoni tiegħu ("approċċ ġenerali") dwar l-att dwar l-intelliġenza artifiċjali (IA). Ir-regolament propost il-ġdid għandu l-għan li jiżgura li s-sistemi tal-IA mqiegħda fis-suq tal-UE u użati fl-Unjoni jkunu sikuri u jirrispettaw il-liġi eżistenti dwar id-drittijiet fundamentali u l-valuri tal-Unjoni.

L-adozzjoni tal-approċċ ġenerali tippermetti lill-Kunsill jidħol f'negozjati mal-Parlament Ewropew ("trilogi") ladarba dan tal-aħħar jadotta l-pożizzjoni tiegħu bil-ħsieb li jintlaħaq qbil dwar ir-regolament propost.

• Att dwar l-intelliġenza artifiċjali: il-Kunsill jappella għall-promozzjoni ta' IA sikura li tirrispetta d-drittijiet fundamentali

Il-Kummissjoni ħarġet proposta għal regolament bil-għan li tarmonizza r-regoli dwar l-intelliġenza artifiċjali (att dwar l-IA) u pjan ikkoordinat li jinkludi ġabra ta' azzjonijiet konġunti għall-Kummissjoni u l-istati membri.

Dan il-pakkett ta' regoli għandu l-għan li jtejjeb il-fiduċja fl-intelliġenza artifiċjali u jrawwem l-iżvilupp u l-aġġornament tat-teknoloġija tal-IA.

• Proposta għal regolament tal-UE dwar l-IA (Kummissjoni Ewropea)

F'Ottubru 2020, il-mexxejja tal-UE ddiskutew it-tranżizzjoni diġitali. Fil-konklużjonijiet tiegħu, il-Kunsill Ewropew stieden lill-Kummissjoni biex:

• tipproponi modi biex jiżdiedu l-investimenti pubbliċi u privati Ewropej u nazzjonali fir-riċerka, l-innovazzjoni u l-isfruttar tal-intelliġenza artifiċjali
• tiżgura koordinazzjoni aħjar u aktar networks u sinerġiji bejn iċ-ċentri ta' riċerka Ewropej ibbażati fuq l-eċċellenza
• tipprovdi definizzjoni ċara u oġġettiva ta' sistemi ta' intelliġenza artifiċjali ta' riskju għoli

• Konklużjonijiet tal-Kunsill Ewropew, 1-2 ta' Ottubru 2020