Il-Kunsill jieħu azzjoni biex tingħata spinta lis-suċċess tat-tfal fl-iskola madwar l-UE

Il-ministri għall-edukazzjoni tal-UE qablu dwar miżuri biex jonqos il-porzjon ta' dawk li jitilqu kmieni mill-edukazzjoni u t-taħriġ u biex jitnaqqas il-progress insuffiċjenti fil-qari, il-matematika u x-xjenza. Rakkomandazzjoni dwar il-perkorsi għas-suċċess fl-iskola tappella lill-istati membri biex jiżviluppaw strateġiji għas-suċċess fl-iskola u biex jimminimizzaw l-effetti tal-istatus soċjoekonomiku fuq l-eżiti tal-edukazzjoni u t-taħriġ.

L-iskola u l-edukazzjoni huma l-pedament tas-suċċess u s-sodisfazzjon fil-ħajja. Huwa għalhekk li ma nistgħux nippermettu li t-tfal tagħna jitilqu kmieni mill-iskola jew jispiċċaw it-taħriġ u l-edukazzjoni mingħajr profiċjenza fil-ħiliet bażiċi. Il-benesseri huwa fattur ewlieni biex jitnaqqas it-tluq bikri mill-iskola u biex jiżdied l-għarfien tat-tfal fil-qari, il-matematika u x-xjenza.

Vladimír Balaš, ministru Ċek għall-Edukazzjoni, iż-Żgħażagħ u l-Isport

Titjib fir-rata tat-tluq bikri mill-iskola

Ir-rakkomandazzjoni adottata llum tissostitwixxi rakkomandazzjoni tal-Kunsill tal-2011 dwar politiki biex jitnaqqas it-tluq bikri mill-iskola. Mill-2010, ir-rata ta' dawk li jitilqu kmieni naqset bi 3.9 punti perċentwali. Madankollu, b'medja ta' 9.7% fl-2021 madwar l-UE, il-porzjoni għadu ogħla mill-objettiv tal-UE ta' 9%. Skont il-Monitor tal-Edukazzjoni u t-Taħriġ tal-2021, ir-rata ta' progress insuffiċjenti hija ta' 22.5% fil-qari, 22.9% fil-matematika u 22.3% fix-xjenza.

Il-benesseri bħala element ewlieni għas-suċċess fl-iskola

Peress li r-riċerka tenfasizza li l-benesseri emozzjonali, soċjali u fiżiku fl-iskola huwa importanti biex jissaħħu l-possibbiltajiet tat-tfal u taż-żgħażagħ li jirnexxu fl-edukazzjoni u fil-ħajja, ir-rakkomandazzjoni trid li l-istati membri jagħtu attenzjoni speċjali lill-benesseri fl-iskola. L-importanza li jiġi indirizzat il-benesseri biex tingħata spinta għas-suċċess fl-iskola kompliet tiżdied hekk kif il-pandemija tal-COVID-19 kellha effetti detrimentali fuq is-saħħa mentali u l-benesseri tal-istudenti b'mod ġenerali.

Prevenzjoni, intervent u kumpens

Ir-rakkomandazzjoni tiffoka fuq l-istudenti fuq naħa waħda iżda anki fuq l-għalliema, il-ħarrieġa u l-persunal tal-iskejjel. Hija tissuġġerixxi li jiġu kkumbinati miżuri ta' prevenzjoni, intervent u kumpens. Il-miżuri ta' kumpens għandhom l-għan li jinvolvu mill-ġdid lin-nies li jkunu telqu mill-edukazzjoni, pereżempju billi jsaħħu l-gwida u l-konsulenza dwar il-karriera.

Kuntest

Ir-rakkomandazzjoni hija kkumbinata ma' qafas ta' politika li jservi bħala għodda ta' referenza għal dawk li jfasslu l-politika u għall-prattikanti nazzjonali, reġjonali u lokali fl-edukazzjoni u t-taħriġ sabiex jiġi ispirat rispons ta' politika sistemiku biex jiġu żgurati eżiti edukattivi aħjar għall-istudenti kollha.

• Rakkomandazzjoni tal-Kunsill dwar il-Perkorsi għas-Suċċess fl-Iskola