An Chomhairle um Thalmhaíocht agus um Iascach, 09/10/2017, 9 Deireadh Fómhair 2017

Na príomhthorthaí

Iascach

Tháinig an Chomhairle ar chomhaontú polaitiúil maidir leis na deiseanna iascaireachta i Muir Bhailt do 2018.

Tar éis caibidlíochta a mhair an lá ar fad, tháinig na hAirí ar chomhaontú maidir leis an uasmhéid éisc a cheadófar d’iascairí an Aontais a ghabháil an bhliain seo chugainn as an deich bpríomhchinn de stoic thráchtála i Muir Bhailt, méid dá ngairtear an “Ghabháil Iomlán is Incheadaithe” (TAC) fosta.

“Is fusa gaineamh a chur i ngad ná deiseanna iascaireachta a shocrú. Rinneamar é agus lánurraim á tabhairt do chuspóirí an chomhbheartais iascaigh, d'fhorálacha an phlean do Mhuir Bhailt agus do chomhairle eolaíoch. Tá an inbhuanaitheacht eacnamaíoch agus an inbhuanaitheacht chomhshaoil fite fuaite sa chomhaontú deiridh.”

Siim Kiisler,Aire Comhshaoil na hEastóine agus Uachtarán na Comhairle

Bhí malartú tuairimí ag na hAirí, fosta, maidir leis an seasamh a bheidh le glacadh ag an Aontas ag na comhairliúcháin bhliantúla idir an tAontas agus an Iorua faoi chuimsiú a gcomhaontaithe iascaigh dhéthaobhaigh, agus ag an gcruinniú bliantúil den Choimisiún Idirnáisiúnta um Chaomhnú Thuinníní an Atlantaigh (ICCAT) atá le bheith ar siúl ar an 14-21 Samhain 2017 i Maracó.

• TACanna agus deiseanna iascaireachta (cúlra faisnéise)

Talmhaíocht

Chuir an Coimisiún an Chomhairle ar an eolas faoi na forbairtí is déanaí sna margaí talmhaíochta is tábhachtaí. Bhí na hAirí ar aon tuairim, a bheag nó a mhór, le measúnú an Choimisiúin go raibh na margaíag téarnamh, ach d’athdhearbhaigh siad, fosta, gur gá súil ghéar a choinneáil amach anseo ar fhorbairtí bainteach le deireadh chuótaí siúcra an Aontais, le dálaí dúshlánacha aeráide i roinnt de na Ballstáit agus le fiabhras Afracach na muc, as measc nithe eile. I rith an phlé seo, bhí deis ann na hairí a chur ar an eolas faoin gcomhaontú saorthrádála le Mercosur.

Bhí malartú tuairimí ansin ar ról na talmhaíochta i gcur chun feidhme Chlár Oibre 2030 don Fhorbairt Inbhuanaithe agus na himpleachtaí a bhféadfadh a bheith ag an gclár sin maidir le talmhaíocht an Aontais, ag féachaint di go háirithe don chomhbheartas talmhaíochta a bheidh ann amach anseo.
Sa díospóireacht a bhí ann ina dhiaidh sin, bhí na hAirí den tuairim chéanna, go ginearálta, go bhfuil an talmhaíocht fíorthábhachtach chun roinnt spriocanna a bhaint amach maidir leis an bhforbairt inbhuanaithe agus go gcaithfear feabhas a chur ar a n-ionstraimí beartais amach anseo chun na spriocanna sin a bhaint amach agus chun aghaidh a thabhairt fosta ar na dúshláin úra a bhaineann leis an tslándáil bia agus leis anathrú aeráide.

“Féadfaidh an talmhaíocht cuidiú go mór chun fás inbhuanaithe cuimsitheach a ghiniúint, trí phoist a chruthú san earnáil agraibhia agus trína áirithiú go ndéanfar bainistiú inbhuanaithe ar acmhainní nádúrtha.”

Tarmo Tamm, Aire Gnóthaí Tuaithe na hEastóine agus Uachtarán na Comhairle

Ábhair eile ar an gclár oibre

Cuireadh na hAirí ar an eolas maidir le roinnt saincheisteanna eile, lena n-áirítear an obair leantach i ndáil leis an teagmhas fiprinil uibhe, maoiniú áis comhordúcháin mionúsáide an Aontais, an nós imeachta frith-fhóirdheontais agus frithdhumpála arna oscailt ag na Stáit Aontaithe i gcoinne ológa dubha boird na Spáinne, agus slabhraí soláthair inbhuanaithe nach mbíonn dífhoraoisiú mar thoradh orthu, agus staid chur chun feidhme chiste Eorpach muirí agus iascaigh.