Kunsill Agrikoltura u Sajd, 09/10/2017, 9 ta' Ottubru 2017

Riżultati ewlenin

Sajd

Il-Kunsill laħaq qbil politiku dwar opportunitajiet tas-sajd fil-Baħar Baltiku għall-2018.

Wara ġurnata sħiħa ta' negozjar, il-ministri qablu dwar il-kwantità massima ta' ħut li s-sajjieda tal-UE ser ikollhom permess li jaqbdu s-sena d-dieħla mill-għaxar stokkijiet kummerċjali prinċipali fil-Baħar Baltiku, kwantità li tissejjaħ ukoll "Qabdiet Totali Permissibbli" (TAC).

"L-istabbiliment tal-opportunitajiet tas-sajd hu eżerċizzju kważi impossibbli. Aħna wettaqnih b'rispett sħiħ lejn l-objettivi tal-Politika Komuni tas-Sajd, id-dispożizzjonijiet tal-pjan Baltiku u l-parir xjentifiku. Fil-ftehim finali s-sostenibbiltà ekonomika u ambjentali jmorru id f'id."

Siim Kiisler,il-ministru għall-ambjent tar-Repubblika tal-Estonja u l-president tal-Kunsill

Il-ministri kellhom ukoll skambju ta' fehmiet dwar il-pożizzjoni li għandha tittieħed mill-UE waqt il-konsultazzjonijiet annwali bejn l-UE u n-Norveġja fil-qafas tal-ftehim bilaterali tagħhom dwar is-sajd, u waqt il-laqgħa annwali tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT), skedata għal bejn l-14 u l-21 ta' Novembru 2017 fil-Marokk.

• TACs u opportunitajiet tas-sajd (informazzjoni ġenerali)

Agrikoltura

Il-Kummissjoni infurmat lill-Kunsill dwar l-aħħar żviluppi fis-swieq agrikoli l-aktar importanti. B'mod ġenerali, il-ministri qablu mal-valutazzjoni tal-Kummissjoni li s-swieq kienu fil-proċess li jirkupraw, iżda tennew mill-ġdid il-ħtieġa li jsegwu mill-qrib l-iżviluppi futuri marbuta, fost oħrajn, mat-tmiem tal-kwoti taz-zokkor tal-UE, kundizzjonijiet klimatiċi diffiċli f'diversi stati membri, u deni Afrikan tal-ħnieżer. Matul dan id-dibattitu l-ministri kellhom ukoll l-opportunità li jiġu infurmati dwar ftehim ta' kummerċ ħieles mal-Mercosur.

Il-Kunsill imbagħad kellu skambju ta' fehmiet dwar ir-rwol tal-agrikoltura fl-implimentazzjoni tal-aġenda 2030 għall-iżvilupp sostenibbli u l-implikazzjonijiet li din jista' jkollha għall-agrikoltura tal-UE, speċjalment b'ħarsa 'l quddiem lejn il-Politika Agrikola Komuni futura.
Fid-dibattitu sussegwenti l-ministri b'mod ġenerali qablu li l-agrikoltura hija kruċjali biex jintlaħqu għadd ta' għanijiet ta' żvilupp sostenibbli u li l-istrumenti ta' politika tagħha jridu jittejbu aktar fil-futur kemm biex jinkisbu riżultati f'dan ir-rigward kif ukoll biex jiġu ffaċċati l-isfidi ġodda marbuta mas-sigurtà tal-ikel u t-tibdil fil-klima.

"L-agrikoltura għandha kontribut sinifikanti x'tagħti biex tiġġenera tkabbir sostenibbli u inklużiv, billi toħloq impjiegi fis-settur agroalimentari u billi tiżgura l-ġestjoni sostenibbli tar-riżorsi naturali."

Tarmo Tamm, il-ministru għall-affarijiet rurali tar-Repubblika tal-Estonja u l-president tal-Kunsill

Suġġetti oħra fuq l-aġenda

Il-ministri ġew infurmati dwar għadd ta' kwistjonijiet oħra, inkluż is-segwitu għall-inċident tal-bajd ikkontaminat bil-fipronil, il-finanzjament tal-faċilità tal-UE għall-koordinazzjoni tal-użi minuri, il-proċediment kontra s-sussidji u antidumping li nfetaħ mill-Istati Uniti kontra ż-żebbuġ iswed tal-mejda Spanjol, katini ta' provvista sostenibbli u li ma jwasslux għal deforestazzjoni, u l-istat ta' implimentazzjoni tal-fond Ewropew għall-affarijiet marittimi u s-sajd.