Comhairle na nGnóthaí Eacnamaíocha agus Airgeadais, 21/02/2017, 21 Feabhra 2017

Príomhthorthaí

Seachaint cánach corparáide - Neamhréireanna hibrideacha

Tháinig an Chomhairle ar chomhaontú maidir lena seasamh i ndáil le rialacha a bhfuil sé mar aidhm acu deireadh a chur le ‘neamhréireanna hibrideacha’ le córais chánach tríú tíortha.

Tá an dréacht-treoir ar an mbeart is déanaí de roinnt beart a ceapadh chun cosc a chur le seachaint cánach cuideachtaí móra.

Tríd an dréacht-treoir sin, cuirfear cosc orthu sochar a bhaint as difríochtaí idir dhá dhlínse cánach nó níos mó chun a ndliteanas cánach foriomlán a laghdú.

Agus beidh sí ina cabhair le moltaí OECD 2015 a chur chun feidhme ina ndírítear ar chreimeadh an bhoinn don cháin chorparáide agus ar aistriú brabúis (BEPS).

“Tá an tAontas ar thús cadhnaíochta sa troid i gcoinne seachaint cánach”, a dúirt Edward Scicluna, Aire Airgeadais Mhálta, ag a bhfuil Uachtaránacht na Comhairle faoi láthair. “Is mian linn cur chun feidhme comhleanúnach a áirithiú i ndlí an Aontais ar phlean gníomhaíochta BEPS de chuid OECD.”

Tugtar aghaidh ar neamhréireanna hibrideacha sa togra maidir le tíortha nach bhfuil san Aontas, ós rud é go gcumhdaítear éagothromaíochtaí laistigh den Aontas sa ‘treoir le haghaidh seachaint cánach’ a glacadh i mí Iúil 2016.

Liosta de chuid an Aontais de dhlínsí neamhchomhoibríocha

Bhreathnaigh an Chomhairle ar an obair a rinneadh ar liosta de chuid an Aontais de dhlínsí tríú tíortha neamhchomhoibríocha i gcúrsaí cánachais.

Leanann an tionscnamh seo straitéis sheachtrach an Aontais i leith cánachais agus beidh sé ina chabhair d’iarrachtaí leanúnacha chun calaois chánach a chosc.

“Tá sé mar aidhm againn liosta de chuid an Aontais a chur le chéile chun dea-chleachtais atá infheidhme san Aontas cheana a chur chun cinn,” a dúirt an tUasal Scicluna. “Beidh dlínsí faoi réir scagtha. Cuirfear san áireamh ar an liosta iad má chinntear nach bhfuil a mbeartais chánach ag teacht lenár gcaighdeáin íosta.”

Meastar go gcuirfidh an Chomhairle bailchríoch ar an liosta de dhlínsí neamhchomhoibríocha roimh dheireadh 2017.

Tá an obair á déanamh i gcomhthráth le fóram domhanda OECD maidir le trédhearcacht agus malartú faisnéise chun críoch cánach.

Saincheisteanna maidir le buiséad an Aontais

Shocraigh an Chomhairle a tosaíochtaí maidir le buiséad an Aontais do 2018 agus d’iarr sí go mbeidh buiséad réalaíoch ann ag a mbeidh an chothromaíocht cheart idir comhdhlúthú fioscach agus infheistíochtaí nua atá fabhrach d’fhás agus do phoist.

Ina theannta sin, d’iarr na hairí go ndéanfar foráil i mbuiséad 2018 maidir le hacmhainní leordhóthanacha le leanúint de thacú le tosaíochtaí traidisiúnta agus le tosaíochtaí atá ag teacht chun cinn laistigh den Aontas, is é sin, cuidiú le téarnamh eacnamaíoch, aghaidh a thabhairt ar dhúshláin dhaonnúla agus slándála agus gealltanais a rinneadh a chomhlíonadh.

Ina theannta sin, mhol an Chomhairle do Pharlaimint na hEorpa urscaoileadh a thabhairt don Choimisiún i leith chur chun feidhme bhuiséad an Aontais do 2015.