An Chomhairle Iompair, Teileachumarsáide agus Fuinnimh, 13 Meitheamh 2014

Comhaontú sa Chomhairle maidir leis an treoir i ndáil le hathrú indíreach maidir le talamhúsáid

Ag cruinniú i dtaca le beartais fuinnimh a tionóladh an 13 Meitheamh 2014 tháinig an Chomhairle ar chomhaontú polaitiúil maidir leis an treoir i ndáil le hathrú indíreach maidir le talamhúsáid agus rinne sí saincheisteanna tábhachtacha fuinnimh a phlé lena n-áirítear slándáil fuinnimh agus praghsanna fuinnimh

Athrú indíreach maidir le talamhúsáid

Leis an dréacht-treoir i ndáil le hathrú indíreach maidir le talamhúsáid (ILUC) dírítear ar íoslaghdú a dhéanamh ar an éifeacht a bhíonn ag athruithe indíreacha maidir le talamhúsáid ar astaíochtaí gás ceaptha teasa agus cosnaítear na hinfheistíochtaí a rinneadh cheana i dtáirgeadh bithbhreoslaí.

Cuirtear san áireamh sa téacs a chomhaontaigh an Chomhairle feiniméan ILUC agus tugtar aghaidh air, tosaítear ag athrú chuig bithbhreoslaí a mbaineann rioscaí ILUC níos lú leo agus soláthraítear dearcadh infheistíochta níos soiléire, agus na hinfheistíochtaí a rinneadh cheana á gcosaint i gcomhthráth.

Go luath i ndiaidh don Chomhairle teacht ar chomhaontú polaitiúil déanfaidh sí a seasamh ar an gcéad léamh a ghlacadh go foirmiúil.

An toradh ar an gcruinniú a bhí ag Comhairle Eorpach mhí an Mhárta

Rinne na hairí breithniú ar thoradh Chomhairle Eorpach mhí an Mhárta 2014 maidir le trí réimse:

• an dul chun cinn a rinneadh i dtaca leis an margadh inmheánach fuinnimha thabhairt chun críche
• an teachtaireacht a thug an Coimisiún uaidh, arna tharraingt suas ar iarraidh ón gComhairle Eorpach i mí an Mhárta 2014 i dtaca le straitéis na hEorpa maidir le slándáil fuinnimh
• díospóireacht bheartais maidir le gnéithe na mbeartas i dtaca leis an gcreat aeráide agus fuinnimh 2030

Cuirfear toradh na díospóireachta faoi bhráid Uachtarán na Comhairle Eorpaí mar ullmhúchán don chéad chruinniú eile a bheidh ag an gComhairle Eorpach an 26-27 Meitheamh. Táthar ag súil go dtabharfar cinneadh deiridh i nDeireadh Fómhair 2014 maidir leis an gcreat.

Ábhair eile ar an gclár oibre

Ghlac an Chomhairle conclúidí maidir le praghsanna agus costais fuinnimh, le tomhaltóirí leochaileacha a chosaint agus leis an iomaíochas. Cumhdaítear trí réimse sna conclúidí: an margadh inmheánach fuinnimh, an ghné sheachtrach agus tomhaltóirí.

Mar thoradh ar chur i láthair maidir leis an méid a thit amach le déanaí i réimse an chaidrimh sheachtraigh i dtaca le fuinneamh, bhí díospóireacht bheartais ag na hairí ar luach na gcreataí iltaobhacha fuinnimh.

Ar na hábhair eile a pléadh le linn chruinniú na Comhairle bhí:

• cúrsaí fuinnimh a bhaineann leis an staid san Úcráin
• clár oibre uachtaránacht nua na hIodáile