"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
An Chomhairle Iompair, Teileachumarsáide agus Fuinnimh
Físchomhdháil neamhfhoirmiúil na n-airí iompair, 21 Aibreán 2026
Na príomhthorthaí
Tháinig airí iompair an Aontais le chéile le haghaidh físchomhdháil neamhfhoirmiúil i bhfianaise a bhfuil ag titim amach sa Mheánoirthear. Bhí seisiún tuairimíochta ag na hairí maidir leis an mbealach chun tionchar na géarchéime a mhaolú agus cobhsaíocht agus athléimneacht na gcóras iompair ar fud an Aontais a chinntiú.
Cé go bhfuil slándáil soláthair an Aontais fós cobhsaí faoi láthair, tá praghsanna arda fuinnimh ag cur brú méadaitheach ar earnáil agus ar chóras iompair an Aontais. Cuideoidh seisiún an lae inniu le tograí gasta praiticiúla le haghaidh freagairt láidir chomhleanúnach Eorpach. Trí chomhordú agus dlúthpháirtíocht, tabharfaidh an Eoraip aghaidh ar an dúshlán sin.
Alexis Vafeades - Aire Iompair, Cumarsáide agus Oibreacha Phoblacht na Cipire
Cuireann costas méadaitheach an bhreosla brú ar oibreoirí iompair, a bhfuil go leor acu ag obair le corrlaigh chúnga cheana. Bíonn tionchar ag costais mhéadaithe fuinnimh ar an éileamh a bhíonn ann agus téann na costais ardaithe sin ar aghaidh chuig paisinéirí agus lasta araon, rud a chuireann isteach ar shreafaí lasta domhanda agus ar fheidhmiú mhargadh aonair an Aontais.
Dhírigh cruinniú an lae inniu ar roinnt príomhréimsí, lena gcuirtear san áireamh:
tionchar na géarchéime ar mhodhanna éagsúla iompair
Comhordú ar fud an Aontais chun ilroinnt a sheachaint agus chun freagairt chomhordaithe ar an ngéarchéim a chinntiú
bearta láithreacha chun leanúnachas an tsoláthair breosla a áirithiú agus chun athléimneacht na gcóras iompair a fheabhsú.
Cé nach bhfuil ganntanas láithreach breosla roimh an Aontas faoi láthair, chuir na hairí in iúl gur dúshlán atá ag dul i méid í luaineacht praghsanna. Tá tionchar ar leith ag an ardú ar phraghsanna breosla ar an iompar de bhóthar agus ar an eitlíocht. Bhí na hairí ar fad den tuairim go bhfuil sé ríthábhachtach faireachán a dhéanamh ar stoic bhreosla, go háirithe scaird-bhreosla, chun forbairtí a rianú agus le bheith ullamh má chuirtear isteach ar an soláthar.
Chuir na hairí in iúl freisin go dtacaíonn siad go láidir leis an mbosca uirlisí sealadach a fhoilseoidh an Coimisiún Eorpach go luath, arb é is aidhm dó aghaidh a thabhairt ar phraghsanna arda fuinnimh agus ar shaincheisteanna a d’fhéadfadh a bheith ann maidir le soláthar breosla. Mhol siad bearta spriocdhírithe sealadacha mar shampla státchabhair nó solúbthacht rialála, ar choinníoll go mbeidh siad comhréireach, go gcoinneoidh siad cothrom iomaíochta ar bun, agus nach gcuirfidh siad isteach ar mhargadh aonair an Aontais.
Leag an Chomhairle béim freisin ar a thábhachtaí atá sé na freagairtí gearrthéarmacha sin a bheith i gcomhréir le spriocanna fadtéarmacha an Aontais, go háirithe an spleáchas ar bhreoslaí iontaise a laghdú, dlús a chur leis an leictriú, agus an t-aistriú chuig breoslaí malartacha.
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
