An comhbheartas talmhaíochta (CBT): Íocaíochtaí díreacha tar éis 2013
Cad iad na hathruithe ar íocaíochtaí díreacha?
Íocaíochtaí díreacha (i.e. buntacaíocht ioncaim a thugtar d'fheirmeoirí mar chúiteamh ar na hearraí agus na seirbhísí poiblí a sholáthraíonn siad): Déanfar an tacaíocht a athdháileadh de réir a chéile laistigh de Bhallstáit nó de réigiúin, chun na difríochtaí is mó i leibhéil na tacaíochta a thugtar d'fheirmeoirí ar fud an Aontais a laghdú.
Bearradh na n-íocaíochtaí díreacha: Déanfar na híocaíochtaí díreacha le feirmeacha móra a laghdú 5% ar a laghad do mhéideanna thar €150 000 in aghaidh na bliana. An méid a choiglítear mar sin, fanfaidh sé sa Bhallstát agus úsáidfear é ar mhaithe le forbairt tuaithe.
An fheirmeoireacht ghlas
Maidir leis an bhfeirmeoireacht ghlas, áirítear na cleachtais seo a leanas mar chuid den athchóiriú ar CBT:
- íoslimistéar d'fhéarthailte buana a choinneáil
- trí chineál bairr ar a laghad a chur ag fás ar thalamh arúil
- íoslimistéar atá clúdaithe le gnéithe den tírdhreach amhail fálta agus locháin a choinneáil, nó stiallacha de thalamh branair, nó limistéir faoi fhoraois nó faoi bhairr a dhéanann maitheas do cháilíocht na hithreach agus an uisce
Déanfar míchothromaíochtaí i leibhéil na n-íocaíochtaí atá ann cheana idir na Ballstáit a chothromú go páirteach: Na Ballstáit sin ar lú a meáníocaíocht dhíreach reatha in aghaidh an heicteáir ná 90% de mheán an Aontais, gheobhaidh siad méadú de réir a chéile. Faoin mbliain 2019, ba cheart gur timpeall €196 in aghaidh an heicteáir a bheidh an t-íosleibhéal ar fud an Aontais. Is iad na Ballstáit sin ar mó a n-íocaíocht dhíreach ná meán an Aontais, a mhaoineoidh an cóineasú seo.
Déanfar na híocaíochtaí díreacha le feirmeoirí nua agus feirmeoirí óga (faoi bhun 40 bliain) a bhreisiú don chéad chúig bliana dá gcuid gníomhaíochta. Déanfar sin i dteannta na mbeart eile tacaíochta atá ar fáil faoi chláir forbartha tuaithe.
Amach anseo, na feirmeoirí sin nach bhfaigheann ach suim bheag in íocaíochtaí díreacha, beidh siad in ann tairbhe a bhaint as 'scéim na bhfeirmeoirí beaga' a bheidh níos simplí. Laghdófar leis sin an maorlathas d'fheirmeoirí beaga agus do na húdaráis náisiúnta araon.
Glasú: I gcás 30% de na híocaíochtaí díreacha, ní thabharfar amach iad ach amháin d'fheirmeoirí a chleachtann feirmeoireacht ghlas atá chun sochair na haeráide agus an chomhshaoil. Glacfar leis gan cheist go gcomhlíontar na coinníollacha maidir le glasú i gcás táirgeadh orgánach. Mura gcloítear leis na coinníollacha maidir le glasú, beidh pionóis i gceist.
Amach anseo, ní bhfaighidh ach 'feirmeoirí gníomhacha' maoiniú. Leis na rialacha nua, soiléirítear nach mbeidh úinéirí móra talún nach bhfuil aon fhíorghníomhaíocht feirmeoireachta ar bun acu ná cuideachtaí a bhfuil limistéir mhóra féarthailte acu (amhail aerfoirt) i dteideal íocaíochtaí feirmeoireachta a fháil.
Beidh solúbthacht breise ann do na Ballstáit ó thaobh a gclúdaigh náisiúnta a úsáid mar is áil leo: Beidh sé de cheart ag gach Ballstát suas le 15% dá gcuid cistí a athrú idir dhá cholún CBT. Na Ballstáit sin ar lú a gclúdaigh íocaíochtaí díreacha ná meán an Aontais, féadfaidh siad, fiú, suas le 25% dá gcistí dara colún a aistriú go dtí an chéad cholún.