"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Suq intern u industrija), 25 ta' Novembru 2021
Riżultati ewlenin
Att dwar is-Swieq Diġitali
Il-Kunsill qabel unanimament dwar approċċ ġenerali rigward il-proposta għal Att dwar is-Swieq Diġitali(DMA), li għandha l-għan li toħloq kondizzjonijiet ekwivalenti ta' kompetizzjoni, bi drittijiet u obbligi ċari għal pjattaformi online kbar.
Bil-qbil tal-Kunsill kemm rigward l-Att dwar is-Swieq Diġitali kif ukoll rigward l-Att dwar is-Servizzi Diġitali, aħna wettaqna waħda mill-prijoritajiet ewlenin tal-presidenza tagħna. Nemmnu li, aħna, l-Unjoni Ewropea qed immexxu bl-eżempju bir-regolamentazzjoni tas-suq diġitali, li ser twassal għal spazju diġitali aktar kompetittiv u ambjent tan-negozju aktar ġust.
Zdravko Počivalšek, Ministru għall-Iżvilupp Ekonomiku u t-Teknoloġija tas-Slovenja
Il-ministri enfasizzaw l-importanza tal-Att dwar is-Swieq Diġitali u ndikaw il-ħtieġa li jiġu rregolati pjattaformi online kbar u l-ħtieġa ta' proposta li tiżgura ċertezza legali u li tibqa' valida fil-futur.
Xi stati membri enfasizzaw li ma jixtiqux li din il-proposta tidgħajjef waqt in-negozjati mal-Parlament Ewropew, u l-parti l-kbira tal-ministri appoġġaw lill-Kummissjoni Ewropea bħala infurzatur uniku tar-regolamentazzjoni. L-importanza li l-SMEs jitħallew idaħħlu l-innovazzjonijiet tagħhom fis-suq u li jkun hemm kondizzjonijiet ekwivalenti għan-negozji kollha ssemmiet ukoll minn ħafna delegazzjonijiet.
Il-ministri qablu b'mod ġenerali li l-proposta tippreżenta kompromess ġust u bbilanċjat li jistabbilixxi mandat b'saħħtu għan-negozjati mal-Parlament Ewropew, li huma skedati li jibdew fl-2022.
Il-Kunsill qabel dwar approċċ ġenerali rigward il-proposta għal Att dwar is-Servizzi Diġitali(DSA). L-għan ewlieni tad-DSA huwa li l-utenti jinżammu sikuri minn oġġetti, kontenut u servizzi illegali, u li jiġu protetti d-drittijiet fundamentali tagħhom online. Il-proposta timmodernizza wkoll parti mid-direttiva dwar il-kummerċ elettroniku mill-2000.
L-Att dwar is-Servizzi Diġitali ser ibiddel l-isfera diġitali enormement, u ser joħloq spazju online aktar sikur u ġust għaċ-ċittadini tal-UE. Flimkien mad-DMA, il-proposta hija fil-qalba tal-istrateġija diġitali Ewropea u aħna konvinti li ser terġa' tikseb il-fiduċja taċ-ċittadini u żżid il-protezzjoni tal-konsumatur.
Mark Boris Andrijanič, Ministru għat-Trasformazzjoni Diġitali tas-Slovenja
Matul is-sessjoni pubblika, il-ministri esprimew l-appoġġ tagħhom għall-proposta u enfasizzaw l-importanza li jkun hemm spazju diġitali aktar sikur, ibbażat fuq il-prinċipju ta' "dak li huwa illegali offline, għandu jkun ukoll illegali online".
Filwaqt li enfasizzaw l-importanza tal-innovazzjoni u l-ħtieġa ta' reazzjoni rapida filwaqt li tiġi salvagwardjata l-kwalità, il-ministri qablu b'mod ġenerali li t-test jikkostitwixxi kompromess ibbilanċjat.
Il-biċċa l-kbira tal-istati membri laqgħu l-protezzjoni msaħħa tal-minorenni, u diversi stati membri enfasizzaw l-importanza tal-prinċipju tal-pajjiż tal-oriġini.
Dan l-approċċ ġenerali ser ikun l-bażi għan-negozjati mal-Parlament Ewropew, li huma skedati li jibdew fl-2022.
Il-ministri kellhom dibattitu ta' orjentazzjoni dwar il-pjan ta' rkupru għall-Ewropa. Huma ddiskutew is-sitwazzjoni attwali tal-implimentazzjoni tal-pjanijiet nazzjonali għall-irkupru u r-reżiljenza mill-istati membri, kif ukoll approċċi għat-tħejjija tal-pjanijiet.
Il-ministri spjegaw l-isfidi li jipprevedu fl-implimentazzjoni tal-pjanijiet, bħan-nuqqas attwali ta' provvista fil-qasam tas-semikondutturi u l-materja prima, kif ukoll in-nuqqas attwali tas-suq tax-xogħol. Ħafna stati membri laqgħu l-Att dwar iċ-Ċipep li jmiss tal-Kummissjoni Ewropea u l-proposta għat-tieni IPCEI dwar il-mikroelettronika.
Il-Kummissjoni Ewropea aġġornat lill-ministri dwar komunikazzjoni dwar politika tal-kompetizzjoni li għandha tkun tajba għal sfidi ġodda. Din ir-reviżjoni tal-politika tal-kompetizzjoni ġiet adottata mill-Kummissjoni Ewropea fit-18 ta' Novembru. Hija tiddeskrivi l-kontribut tal-politika tal-kompetizzjoni u tar-rieżami tagħha għal tranżizzjoni ekoloġika u dik diġitali u għal suq uniku reżiljenti.
Il-presidenza Slovena pprovdiet aġġornament dwar is-sitwazzjoni attwali fl-eżami tal-elementi differenti tal-pakkett "lesti għall-mira ta'55%" ta' proposti leġiżlattivi relatati mal-klima.
Il-pakkett "lesti għall-mira ta' 55%" huwa sett ta' proposti interkonnessi adottati mill-Kummissjoni fl-14 ta' Lulju bl-għan li l-emissjonijiet netti tal-gassijiet b'effett ta' serra jitnaqqsu b'mill-inqas 55% sal-2030.
Il-Kunsill Kompetittività għandu rwol ewlieni x'jaqdi biex jiżgura li l-UE twettaq il-livell miftiehem ta' ambizzjoni li l-pakkett jipproponi, u jkun jista' jipprovdi gwida billi jindirizza sfidi u opportunitajiet għan-negozji li jirriżultaw mit-tranżizzjoni lejn in-newtralità klimatika.
Il-presidenza Slovena ppreżentat rapport ta' progress rigward l-eżami tal-proposta fir-rigward tar-rappurtar korporattiv dwar is-sostenibbiltà, li ġie adottat mill-Kummissjoni Ewropea fil-21 ta' April 2021. Id-direttiva proposta għandha l-għan li testendi u ssaħħaħ ir-regoli eżistenti dwar ir-rappurtar mhux finanzjarju, sabiex jiġi żgurat fluss konsistenti ta' informazzjoni dwar is-sostenibbiltà permezz tas-sistema finanzjarja u b'hekk tiġi ffaċilitata t-tranżizzjoni lejn ekonomija sostenibbli. Il-proposta hija mistennija li tiġi adottata fl-2022.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Regolament dwar is-sikurezza ġenerali tal-prodotti
Il-presidenza Slovena pprovdiet informazzjoni dwar is-sitwazzjoni attwali fl-eżami ta' dan il-fajl importanti dwar il-protezzjoni tal-konsumatur, li ġie adottat mill-Kummissjoni Ewropea fit-30 ta' Ġunju 2021. Ir-regolament dwar is-sikurezza ġenerali tal-prodotti jaġġorna u jimmodernizza l-qafas ġenerali għas-sikurezza tal-prodotti tal-konsumatur li mhumiex għall-ikel u huwa ta' importanza kbira għat-tisħiħ tas-suq uniku.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-presidenza Slovena ppreżentat rapport dwar il-progress li sar fir-rigward tal-proposta għal direttiva dwar il-kreditu għall-konsumatur. Il-proposta, li tressqet mill-Kummissjoni Ewropea fit-30 ta' Ġunju 2021, tfittex li żżid il-protezzjoni tal-konsumaturi finanzjarji, kif ukoll li tikkontribwixxi għal qafas legali tal-UE aktar armonizzat għall-forniment ta' servizzi finanzjarji għall-konsumatur fl-istati membri u bejniethom. Il-proposta hija mistennija li tiġi adottata fl-2022.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-presidenza infurmat lid-delegazzjonijiet dwar is-Summit tal-Innovaturi Next Generation EU li seħħ bejn is-26 u s-27 ta' Ottubru f'Ljubljana u dwar ir-riżultati ta' workshop dwar ir-riforma tar-restrizzjonijiet REACH, b'mod partikolari fl-oqsma tal-awtorizzazzjoni u r-restrizzjoni, li sar fi Brdo fid-9 ta' Novembru 2021.
Il-Kummissjoni Ewropea ppreżentat ir-rapport Annwali 2021 tan-Network tar-Rappreżentanti tal-SMEs u aġġornat lill-ministri dwar il-ħidma tal-Forum Industrijali.
Id-delegazzjoni Griega infurmat lill-ministri dwar it-tisħiħ tar-reżiljenza tas-settur tas-saħħa tal-UE u tas-settur farmaċewtiku, u d-delegazzjoni Żvediża ppreżentat dokument informali dwar pjan ta' azzjoni għas-settur tas-servizzi. Id-delegazzjoni Franċiża ppreżentat il-programm ta' ħidma tagħha għall-presidenza li jmiss.
Il-Kunsill adotta wkoll mingħajr diskussjoni il-punti li jidhru fil-listi ta' punti A mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Bil-qbil tal-Kunsill kemm rigward l-Att dwar is-Swieq Diġitali kif ukoll rigward l-Att dwar is-Servizzi Diġitali, aħna wettaqna waħda mill-prijoritajiet ewlenin tal-presidenza tagħna. Nemmnu li, aħna, l-Unjoni Ewropea qed immexxu bl-eżempju bir-regolamentazzjoni tas-suq diġitali, li ser twassal għal spazju diġitali aktar kompetittiv u ambjent tan-negozju aktar ġust.
L-Att dwar is-Servizzi Diġitali ser ibiddel l-isfera diġitali enormement, u ser joħloq spazju online aktar sikur u ġust għaċ-ċittadini tal-UE. Flimkien mad-DMA, il-proposta hija fil-qalba tal-istrateġija diġitali Ewropea u aħna konvinti li ser terġa' tikseb il-fiduċja taċ-ċittadini u żżid il-protezzjoni tal-konsumatur.