"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Riċerka u spazju), 26 ta' Novembru 2021
Riżultati ewlenin
Riċerka
Governanza futura taż-ŻER & Patt għar-riċerka u l-innovazzjoni
Il-ministri approvaw konklużjonijiet dwar il-governanza ssimplifikata taż-Żona Ewropea tar-Riċerka (ŻER), inkluż aġenda ta' politika taż-ŻER għall-2022-2024, u adottaw Patt għar-riċerka u l-innovazzjoni (R&I) fl-Ewropa, li jistabbilixxi mekkaniżmu ta' koordinazzjoni msaħħaħ.
Għandi l-pjaċir inħabbar li lestejna l-"istampa sħiħa" taż-Żona Ewropea tar-Riċerka l-ġdida. Bl-introduzzjoni ta' dan il-mudell ta' governanza f'diversi livelli, nistgħu nwettqu ż-ŻER il-ġdida. Il-konklużjonijiet tal-Kunsill tal-lum u l-Patt jipprovdu azzjonijiet konkreti li ser jgħinuna nirreaġixxu b'mod aktar effiċjenti għall-isfidi tas-soċjetà.
Simona Kustec, Ministru għall-Edukazzjoni, ix-Xjenza u l-Isport tas-Slovenja
Skont il-Patt il-ġdid għar-riċerka u l-innovazzjoni, l-istati membri jimpenjaw ruħhom għal: i) sett ta' prinċipji u valuri komuni tal-UE għar-riċerka u l-innovazzjoni; ii) oqsma ta' prijorità kondiviżi għall-azzjoni; iii) investimenti u riformi, u iv) proċess simplifikat ta' koordinazzjoni u monitoraġġ tal-politika.
L-azzjonijiet speċifiċi taż-ŻER li jinsabu fl-aġenda ta' politika taż-ŻER 2022-2024 ser jiġu implimentati fuq bażi volontarja mill-istati membri, flimkien mal-Kummissjoni Ewropea u f'kooperazzjoni mal-pajjiżi assoċjati mal-programm "Orizzont Ewropa", flimkien ma' organizzazzjonijiet tar-riċerka, akkademiċi u tan-negozju, kif ukoll ma' pajjiżi sħab oħra fejn applikabbli.
Ir-riċerka u l-innovazzjoni fil-kisba tal-objettivi transsettorjali
Il-ministri tal-UE kellhom dibattitu ta' orjentazzjoni dwar ir-riċerka u l-innovazzjoni fil-kisba tal-objettivi transsettorjali. Matul l-interventi tagħhom, il-ministri ffukaw fuq kif il-pajjiżi tagħhom jorganizzaw koordinazzjoni transsettorjali għal inizjattivi Ewropej taħt il-pakkett "lesti għall-mira ta' 55%", il-Bauhaus Ewropea l-Ġdida u l-HERA. Il-biċċa l-kbira tal-istati membri semmew li jinsabu fi triqithom sew fl-inklużjoni tar-riċerka u l-innovazzjoni f'dawn l-inizjattivi, u spjegaw x'passi konkreti ħadu s'issa.
Ħafna ministri semmew l-importanza ta' struttura ta' governanza tajba, u enfasizzaw li l-finanzjament għar-riċerka u l-innovazzjoni għandu jintuża għall-finijiet it-tajba. Ħafna ministri semmew li huma jikkunsidraw il-kooperazzjoni mal-partijiet ikkonċernati, bħax-xjenzati u s-settur privat, ta' importanza ewlenija.
Il-presidenza Slovena aġġornat lill-ministri dwar is-sitwazzjoni attwali tan-negozjati dwar ir-regolament li jistabbilixxi l-impriżi konġunti taħt Orizzont Ewropa, li ġie adottat fid-19 ta' Novembru 2021, kif ukoll dwar is-sħubija Ewropea dwar il-metroloġija, li ġiet adottata fit-18 ta' Novembru 2021.
Ir-regolament li jistabbilixxi l-impriżi konġunti taħt Orizzont Ewropa jikkomplementa l-qafas eżistenti ta' Orizzont Ewropa billi jinvolvi sħab pubbliċi u privati fi sħubijiet Ewropej. Huma ser jindirizzaw l-isfidi u l-prijoritajiet globali li jeħtieġu massa kritika u viżjoni fit-tul. Dan ir-regolament ser jidħol fis-seħħ fit-30 ta' Novembru 2021.
Id-deċiżjoni dwar l-involviment tal-Unjoni Ewropea fis-Sħubija Ewropea dwar il-metroloġija hija waħda mill-oqsma ta' prijorità fil-pakkett ta' proposti għal sħubijiet Ewropej istituzzjonalizzati taħt Orizzont Ewropa. Il-metroloġija hija l-istudju tal-kejl, u din id-deċiżjoni ser tiżgura li l-istandards tal-kejl fl-istati membri ikunu kollha allinjati. Din id-deċiżjoni ser tidħol fis-seħħ fit-30 ta' Novembru 2021.
Dawn iż-żewġ atti, flimkien mar-regolament dwar l-istabbiliment tal-Impriża Konġunta għall-Computing ta' Prestazzjoni Għolja Ewropew (EuroHPC) li ġie adottat fit-13 ta' Lulju 2021, jiffinalizzaw il-pakkett ta' tliet atti legali li jistabbilixxu sħubijiet Ewropej istituzzjonalizzati.
Avvenimenti u attivitajiet ewlenin matul il-presidenza Slovena
Il-presidenza aġġornat lill-ministri rigward id-dikjarazzjoni ta' Ljubljana dwar il-ġeneru fir-riċerka u l-innovazzjoni. Id-dikjarazzjoni, li ġiet ippreżentata mill-presidenza Slovena fit-8 u d-9 ta' Lulju 2021, tissottolinja l-importanza tal-ugwaljanza bejn il-ġeneri, u tal-integrazzjoni tal-ugwaljanza bejn il-ġeneri fir-riċerka u l-innovazzjoni.
Il-presidenza kellha l-pjaċir tħabbar li d-dikjarazzjoni ġiet approvata minn 35 parti, inkluż l-istati membri, il-Kummissjoni Ewropea, il-pajjiżi assoċjati, il-pajjiżi tal-adeżjoni u pajjiżi terzi.
Il-ministri ngħataw ukoll informazzjoni rigward il-konferenza dwar l-Azzjonijiet Marie Skłodowska-Curie dwar "Iċ-ċirkolazzjoni tal-imħuħ u l-karrieri tar-riċerkaturi", li saret fil-15 u s-16 ta' Novembru. Il-presidenza Slovena aġġornat lill-ministri dwar il-Konferenza taż-ŻER "Lejn soċjetà responsabbli mmexxija mill-għarfien tat-tielet Millennju, li saret fis-26 u s-27 ta' Ottubru f'Brdo, is-Slovenja, u dwar l-"Inizjattiva dwar il-Pirati tal-Plastik", kampanja li għandha l-għan li twassal għal sensibilizzazzjoni dwar il-ħtieġa għal futur aktar nadif u aktar ekoloġiku. Ħabbret ukoll avveniment relatat mal-Forum Strateġiku Ewropew għall-Infrastrutturi tar-Riċerka, li ser isir fis-7 ta' Diċembru.
Il-Kummissjoni Ewropea pprovdiet informazzjoni dwar il-Forum Strateġiku Ewropew għall-Infrastrutturi tar-Riċerka (ESFRI), u d-delegazzjoni Franċiża ppreżentat il-programm ta' ħidma tagħha għall-presidenza Franċiża li jmiss.
Il-Kunsill approva l-konklużjonijiet dwar "spazju għal kulħadd", filwaqt li saħqu fuq l-importanza tal-parteċipazzjoni tal-partijiet ikkonċernata mill-istati membri kollha fis-settur spazjali u tat-tisħiħ tar-rabtiet bejn is-settur spazjali u dak mhux spazjali.
Il-presidenza Slovena enfasizzat ir-rwol importanti li l-ispazju jista' jkollu fir-rispons għall-isfidi globali. Huma enfasizzaw li dan jista' jżid ir-reżiljenza soċjali u l-kapaċità ta' rkupru mill-kriżijiet. Il-presidenza temmen li l-konklużjonijiet huma dikjarazzjoni qawwija li tenfasizza l-importanza tal-involviment tal-partijiet ikkonċernati u l-kooperazzjoni tal-istati membri biex l-ekonomija Ewropea tibqa' kompetittiva.
L-iżvilupp sostenibbli fit-tul u l-finanzjament ta' "Spazju Ġdid"
Il-ministri qasmu l-ħsibijiet tagħhom dwar il-finanzjament u dwar l-iżvilupp sostenibbli fit-tul ta' "Spazju Ġdid".
Ħafna ministri laqgħu approċċ Ewropew għall-immaniġġjar tat-traffiku fl-ispazju. L-istati membri laqgħu b'mod ġenerali l-inizjattiva CASSINI, li hija fond Ewropew ta' €1 biljun li jagħti spinta lin-negozji ġodda u l-innovazzjoni spazjali. Il-biċċa l-kbira tal-istati membri saħqu fuq il-ħtieġa li jiġu appoġġati l-SMEs u n-negozji ġodda fis-settur spazjali, kif ukoll fuq l-importanza tas-sostenibbiltà tal-ispazju extratmosferiku.
Il-presidenza Slovena ppreżentat ir-rapport tagħha dwar l-immaniġġjar tat-traffiku fl-ispazju, li jenfasizza l-użu sostenibbli tal-ispazju ekstratmosferiku u ambjent sikur u sigur kemm għall-assi kif ukoll għan-nies.
Ir-rapport tal-presidenza dwar l-immaniġġjar tat-traffiku fl-ispazju huwa ta' importanza sinifikanti għall-presidenza Slovena, b'mod partikolari fid-dawl tal-avvenimenti reċenti li jinvolvu test distruttiv bis-satellita, li jenfasizza l-problema tal-iskart spazjali.
Ir-rapport iwitti t-triq għall-adozzjoni possibbli ta' pożizzjoni tal-UE taħt il-presidenza Franċiża.
Fuq l-aġenda tal-ministri għall-ispazju kien hemm ukoll il-punt "il-bini ta' sistema tal-UE ta' komunikazzjoni sikura globali bbażata fl-ispazju" u taħt liema punt il-presidenza infurmat lill-ministri dwar il-konferenza tal-UE "Konnettività sigura" li saret fl-10 ta' Novembru 2021. L-inizjattiva ta' konnettività sigura tista' tkun it-tielet proġett ewlieni wara Galileo u Copernicus. L-għan tagħha huwa li tipprovdi aċċess għall-broadband għal kulħadd, u li tiżgura komunikazzjonijiet reżiljenti għall-utenti tal-gvern u setturi speċifiċi bħall-finanzi, l-enerġija u t-trasport.
Marbuta mal-punt tal-aġenda dwar il-konnettività sikura, il-Kummissjoni Ewropea pprovdiet informazzjoni dwar il-proposta futura tagħha "Il-bini ta' sistema tal-UE ta' komunikazzjoni sikura globali bbażata fl-ispazju", li hija skedata għat-tieni kwart tal-2022.
Id-delegazzjoni Franċiża ppreżentat il-programm ta' ħidma tagħha għall-Presidenza li jmiss.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Għandi l-pjaċir inħabbar li lestejna l-"istampa sħiħa" taż-Żona Ewropea tar-Riċerka l-ġdida. Bl-introduzzjoni ta' dan il-mudell ta' governanza f'diversi livelli, nistgħu nwettqu ż-ŻER il-ġdida. Il-konklużjonijiet tal-Kunsill tal-lum u l-Patt jipprovdu azzjonijiet konkreti li ser jgħinuna nirreaġixxu b'mod aktar effiċjenti għall-isfidi tas-soċjetà.
