"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Ekonomiċi u Finanzjarji, 05/12/2019, 5 ta' Diċembru 2019
Riżultati ewlenin
Azzjoni klimatika
Il-Kunsill adotta konklużjonijiet dwar il-qafas tal-UE għat-tassazzjoni fuq l-enerġija.
Id-Direttiva tal-UE dwar it-Tassazzjoni tal-Enerġija għandha rwol importanti fl-armonizzazzjoni tat-tassazzjoni fuq l-enerġija u l-funzjonament xieraq tas-suq intern tal-UE. Iżda r-rieżami tad-direttiva jista' jikkontribwixxi wkoll għall-objettivi ambjentali u jappoġġa t-transizzjoni lejn UE newtrali għall-klima.
Mika Lintilä, Ministru għall-finanzi tal-Finlandja
Il-Kunsill appoġġa l-aġġornament tal-qafas legali għat-tassazzjoni fuq l-enerġija li ser jikkontribwixxi għal objettivi usa' tal-politika ekonomika u ambjentali.
Il-Kunsill approva pjan ta' ħidma dwar l-azzjoni klimatika li ser jistabbilixxi diskussjonijiet ta' politika regolari dwar l-azzjoni klimatika fil-Kunsill ECOFIN. Il-ministri għall-finanzi ddiskutew ukoll l-aġenda futura għal finanzi sostenibbli.
Il-Kunsill adotta konklużjonijiet dwar prijoritajiet strateġiċi fil-ġlieda kontra l-ħasil tal-flus u l-finanzjament tat-terroriżmu.
Il-ġlieda kontra l-ħasil tal-flus u l-finanzjament tat-terroriżmu hija prijorità ewlenija għall-unjoni Ewropea. Ninsab kuntent li nistgħu naqblu dwar prijoritajiet ġodda ambizzjużi kontra l-ħasil tal-flus, li jipprovdu gwida politika ċara għall-Kummissjoni l-ġdida biex tmexxi din il-ħidma ‘l quddiem.
Mika Lintilä, Ministru għall-finanzi tal-Finlandja
Il-Kunsill jistieden lill-Kummissjoni biex tesplora aktar azzjonijiet possibbli li jistgħu jittieħdu biex jissaħħaħ il-qafas eżistenti, b'mod partikolari billi jiġu kkunsidrati:
modi biex tiġi żgurata kooperazzjoni aktar robusta u effettiva bejn l-awtoritajiet u l-korpi rilevanti involuti fil-ġlieda kontra l-ħasil tal-flus u l-finanzjament tat-terroriżmu, inkluż permezz tal-indirizzar ta' impedimenti dwar l-iskambju ta' informazzjoni bejniethom;
jekk xi aspetti jistgħux jiġu indirizzati aħjar permezz ta' regolament;
possibbiltajiet, vantaġġi u żvantaġġi tal-għoti ta' ċerti responsabbiltajiet u setgħat superviżorji lil korp tal-UE.
Hemm bżonn ta' aktar kooperazzjoni fil-ġlieda kontra l-ħasil tal-flus.
Unjoni tas-Swieq Kapitali
Il-Kunsill adotta konklużjonijiet li jistabbilixxu objettivi għal approfondiment ulterjuri tal-unjoni tas-swieq kapitali (CMU). Il-konklużjonijiet ser isawru l-format u l-kamp ta' applikazzjoni ta' pjan direzzjonali ġdid għal azzjoni futura biex jiġu integrati aktar is-swieq kapitali tal-istati membri tal-UE.
Il-Kunsill u l-Kummissjoni adottaw ukoll dikjarazzjoni konġunta dwar "stablecoins". Id-dikjarazzjoni tenfasizza l-opportunitajiet li jistabbilixxu l-istablecoins preżenti f'termini ta' ħlasijiet irħas u rapidi iżda wkoll l-isfidi u r-riskji li joħolqu.
Il-Kunsill u l-Kummissjoni jenfasizzaw li huma lesti jieħdu l-miżuri kollha meħtieġa biex jiżguraw standards xierqa tal-protezzjoni tal-konsumatur u kondizzjonijiet monetarji finanzjarji b'mod ordnat. Il-Kunsill u l-Kummissjoni jiddikjaraw li ma għandu jibda jopera l-ebda arranġament globali ta' stablecoins fl-Unjoni Ewropea qabel ma jkunu ġew identifikati u indirizzati b'mod adegwat l-isfidi u r-riskji legali, regolatorji u ta' sorveljanza.
Il-Kunsill ser jadotta konklużjonijiet dwar l-arkitettura finanzjarja Ewropea għall-iżvilupp.
Il-konklużjonijiet jenfasizzaw il-ħtieġa li l-arkitettura finanzjarja Ewropea għall-iżvilupp issir aktar b'saħħitha, aktar flessibbli, integrata, koerenti, strateġika, u li tirreaġixxi għat-tibdil fil-klima u għall-ħtiġijiet tal-iżvilupp. Dawn jappoġġaw il-miżuri ta' terminu qasir imressqa mir-rapport tal-Grupp ta' Persuni Għorrief u jiddeskrivu t-triq 'il quddiem għat-tħejjija ta' riflessjoni politika dwar riformi istituzzjonali futuri possibbli.
Lista tal-UE ta' ġurisdizzjonijiet li ma jikkooperawx
Il-Kunsill adotta konklużjonijiet u approva rapport ta' kull sitt xhur dwar il-progress miksub mill-Grupp dwar il-Kodiċi tal-Kondotta dwar it-tassazzjoni tal-intrapriżi mingħajr diskussjoni.
Ir-rapport jinkludi b'mod partikolari s-sitwazzjoni attwali dettaljata dwar il-lista tal-UE ta' ġurisdizzjonijiet li ma jikkooperawx għal finijiet ta' taxxa.
Din tinkludi wkoll gwida dwar aktar koordinazzjoni ta' miżuri difensivi nazzjonali fil-qasam tat-taxxa lejn ġurisdizzjonijiet li ma jikkooperawx (li jinsabu fl-anness 4 tar-rapport). Il-gwida tistieden lill-istati membri kollha biex japplikaw miżura difensiva leġislattiva fit-tassazzjoni fir-rigward tal-ġurisdizzjonijiet elenkati mill-1 ta' Jannar 2021, li għandha l-għan li tinkoraġġixxi l-konformità ta' dawk il-ġurisdizzjonijiet mal-kriterji ta' skrinjar tal-Kodiċi ta' Kondotta dwar it-tassazzjoni ġusta u t-trasparenza.
Il-Kunsill ħareġ deċiżjonijiet dwar l-Ungerija u r-Rumanija, li huma soġġetti għal proċeduri ta' devjazzjoni sinifikanti li għaddejjin bħalissa. Id-deċiżjonijiet jikkonfermaw li ma ttiħdux azzjonijiet effettivi. Il-Kunsill ta rakkomandazzjonijiet ġodda dwar miżuri li jikkoreġu d-devjazzjonijiet.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-Direttiva tal-UE dwar it-Tassazzjoni tal-Enerġija għandha rwol importanti fl-armonizzazzjoni tat-tassazzjoni fuq l-enerġija u l-funzjonament xieraq tas-suq intern tal-UE. Iżda r-rieżami tad-direttiva jista' jikkontribwixxi wkoll għall-objettivi ambjentali u jappoġġa t-transizzjoni lejn UE newtrali għall-klima.
