Kunsill Affarijiet Ekonomiċi u Finanzjarji, 18 ta' Frar 2020

Riżultati ewlenin

Lista tal-UE ta' ġurisdizzjonijiet li ma jikkooperawx

Illum il-Kunsill adotta konklużjonijiet riveduti dwar il-lista tal-UE ta' ġurisdizzjonijiet li ma jikkooperawx għal finijiet ta' taxxa.

Il-ħidma fuq il-lista ta' ġurisdizzjonijiet li ma jikkooperawx għal finijiet ta' taxxa hija bbażata fuq proċess dettaljat ta' valutazzjoni, sorveljanza u djalogu ma' madwar 70 ġurisdizzjoni ta' pajjiżi terzi. Minn meta bdejna dan l-eżerċizzju, 49 pajjiż implimentaw ir-riformi tat-taxxa meħtieġa biex jikkonformaw mal-kriterji tal-UE. Dan huwa suċċess mingħajr dubju. Iżda hija wkoll ħidma li għadha għaddejja u proċess dinamiku fejn il-metodoloġija u l-kriterji tagħna qed jiġu riveduti b'mod kostanti. Zdravko Marić, Viċi Prim Ministru u Ministru għall-Finanzi tal-Kroazja

Minbarra t-tmien ġurisdizzjonijiet li kienu diġà elenkati, l-UE ddeċidiet ukoll li tinkludi l-ġurisdizzjonijiet li ġejjin fil-lista tagħha ta' ġurisdizzjonijiet li ma jikkooperawx għal finijiet ta' taxxa:

• il-Gżejjer Cayman;
• Palau;
• il-Panama;
• is-Seychelles.

Dawn il-ġurisdizzjonijiet ma implimentawx ir-riformi tat-taxxa li kienu impenjaw ruħhom li jwettqu sal-iskadenza maqbula.

L-Anness II tal-konklużjonijiet, li jkopri ġurisdizzjonijiet b'impenji pendenti, jirrifletti wkoll l-estensjonijiet tal-iskadenzi mogħtija lil 12-il ġurisdizzjoni biex dawn ikunu jistgħu jgħaddu r-riformi meħtieġa biex iwettqu l-impenji tagħhom. Il-biċċa l-kbira mill-estensjonijiet tal-iskadenzi jikkonċernaw pajjiżi fil-fażi tal-iżvilupp mingħajr ċentru finanzjarju li diġà għamlu progress sinifikanti fit-twettiq tal-impenji tagħhom.

Sittax-il ġurisdizzjoni (Antigua u Barbuda, l-Armenja, il-Bahamas, Barbados, il-Belize, il-Bermuda, il-Gżejjer Verġni Brittaniċi, Cabo Verde, il-Gżejjer Cook, Curaçao, il-Gżejjer Marshall, il-Montenegro, Nauru, Niue, Saint Kitts u Nevis, il-Vjetnam) irnexxielhom jimplimentaw ir-riformi kollha meħtieġa biex jikkonformaw mal-prinċipji ta' governanza tajba fil-qasam tat-taxxa tal-UE qabel l-iskadenza miftiehma u għalhekk tneħħew mill-Anness II.

• Tassazzjoni: Il-Kunsill jirrevedi l-lista tal-UE ta' ġurisdizzjonijiet li ma jikkooperawx (stqarrija għall-istampa, 18 ta' Frar 2020)

Semestru Ewropew

Il-Kunsill adotta t-testi li ġejjin relatati mal-proċess ta' koordinazzjoni tal-politika ekonomika tas-Semestru Ewropew 2020:

• Konklużjonijiet tal-Kunsill dwar l-istrateġija annwali għat-tkabbir sostenibbli għall-2020
• Konklużjonijiet tal-Kunsill dwar ir-"rapport dwar il-mekkaniżmu ta' twissija"
• Rakkomandazzjoni tal-Kunsill dwar il-politiki ekonomiċi taż-żona tal-euro

Ir-rakkomandazzjoni ser tkun adottata formalment mill-Kunsill Ewropew fil-laqgħa tiegħu ta' Marzu.

Is-Semestru Ewropew 2020 ser jintemm f'Lulju bl-adozzjoni ta' rakkomandazzjonijiet speċifiċi għall-pajjiżi.

• L-iskeda ta' żmien tal-Kunsill dwar l-eżerċizzju tas-Semestru Ewropew 2020

Analiżi tal-governanza ekonomika

Il-Kummissjoni ppreżentat il-komunikazzjoni tagħha dwar ir-rieżami tal-governanza ekonomika tal-UE, ippubblikata fil-5 ta' Frar.

Ir-rieżami jivvaluta kemm kien effettiv il-qafas ta' sorveljanza ekonomika biex jintlaħqu l-objettivi li ġejjin:

• li jiġu żgurati finanzi sostenibbli tal-gvern u tkabbir ekonomiku, kif ukoll jiġu evitati żbilanċi makroekonomiċi;
• il-faċilitazzjoni ta' koordinazzjoni aktar mill-qrib tal-politiki ekonomiċi; u
• il-promozzjoni tal-konverġenza fil-prestazzjoni ekonomika tal-istati membri

Il-pedamenti tal-arranġament attwali huma l-leġislazzjonijiet six-pack u two-pack li jindirizzaw il-vulnerabbiltajiet esposti mill-kriżijiet ekonomiċi u finanzjarji. Il-kuntest ekonomiku evolva materjalment minn mindu ġew stabbiliti r-regoli fl-2011 u fl-2013 rispettivament.

L-ekonomija Ewropea esperjenzat seba' snin ta’ tkabbir konsekuttiv. Bħalissa ebda stat membru mhu soġġett għall-parti korrettiva tal-Patt ta' Stabbiltà u Tkabbir, l-hekk imsejħa "proċedura ta' defiċit eċċessiv", meta mqabbla mal-24 stat membru fl-2011.

• Komunikazzjoni tal-Kummissjoni dwar ir-rieżami tal-governanza ekonomika tal-UE, 5 ta' Frar 2020

Baġit tal-UE

Il-Kunsill adotta linji gwida għall-baġit tal-UE għall-2021.

Il-Kunsill iqis li l-baġit li jmiss għandu jiżgura bbaġitjar prudenti u jħalli marġnijiet suffiċjenti taħt il-limiti massimi sabiex jiġu indirizzati ċirkostanzi mhux previsti. Fl-istess ħin għandhom jiġu allokati biżżejjed riżorsi għall-implimentazzjoni tal-programmi u l-azzjonijiet tal-Unjoni li jikkontribwixxu l-aktar lejn il-kisba tal-politiki tal-Unjoni. Barra minn hekk, il-baġit għandu jippermetti li l-impenji li diġà saru taħt il-QFP attwali jitħallsu fi żmien debitu, sabiex tiġi evitata kwalunkwe pretensjoni mhux imħallsa.

Il-ministri rrakkomandaw ukoll li l-Parlament Ewropew jagħti kwittanza lill-Kummissjoni għall-implimentazzjoni tal-baġit tal-UE għall-2018.

• Rakkomandazzjoni tal-Kunsill dwar il-kwittanza tal-baġit 2018
• Konklużjonijiet tal-Kunsill dwar il-linji gwida baġitarji għall-2021

Riformi tal-VAT

Il-Kunsill adotta żewġ riformi tar-regoli eżistenti dwar il-VAT.

L-ewwel riforma tikkonċerna l-identifikazzjoni ta' frodi fiskali fi transazzjonijiet transfruntieri ta' kummerċ elettroniku. Ir-regoli l-ġodda ser jippermettu lill-istati membri jiġbru, b'mod armonizzat, ir-rekords li l-fornituri ta' servizzi ta' pagament, bħall-banek, jagħmlu disponibbli b'mod elettroniku. Barra minn hekk, ser tiġi stabbilita sistema elettronika ċentrali ġdida għall-ħżin tal-informazzjoni dwar il-ħlas u għall-ipproċessar ulterjuri ta' din l-informazzjoni minn uffiċjali nazzjonali kontra l-frodi.

• Kummerċ elettroniku: Il-Kunsill jadotta regoli ġodda għall-iskambju tad-data dwar pagamenti tal-VAT (stqarrija għall-istampa, 18 ta' Frar 2020)

It-tieni riforma tikkonċerna r-regoli tal-VAT applikabbli għal negozji żgħar. Ir-regoli l-ġodda ser inaqqsu l-piżijiet amministrattivi u l-ispejjeż ta' konformità għall-impriżi ż-żgħar u jgħinu biex jinħoloq ambjent fiskali li ser jgħin lill-SMEs jikbru u jwettqu kummerċ transfruntier.

• VAT: Il-Kunsill jadotta regoli simplifikati għan-negozji ż-żgħar (stqarrija għall-istampa, 18 ta' Frar 2020)