"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 21/01/2020, 21 ta' Jannar 2020
Riżultati ewlenin
Tassazzjoni diġitali
Il-ministri għall-finanzi kellhom skambju ta’ fehmiet dwar l-isfidi tat-taxxa li jirriżultaw mid-diġitalizzazzjoni. Huma evalwaw il-progress miksub fil-kuntest tal-OECD, kemm fir-riallokazzjoni tal-profitti tan-negozji diġitalizzati (il-"Pilastru 1") kif ukoll fir-riforma ġenerali tat-tassazzjoni korporattiva internazzjonali (il-"Pilastru 2").
Fl-aħħar xhur, l-OECD wettqet ħidma intensiva bil-għan li jinkiseb qbil dwar l-arkitettura ta’ soluzzjoni globali fil-laqgħa tagħha tad-29 u t-30 ta’ Jannar 2020.
Id-diġitalizzazzjoni ġabet bidliet fundamentali fil-mod kif joperaw il-kumpaniji, li jeħtiġilna nadattaw ir-regoli tagħna, b’mod partikolari fil-qasam tat-tassazzjoni. Din hija kwistjoni globali li teħtieġ soluzzjoni globali. Hu għalhekk li l-UE hija impenjata li tinvolvi ruħha b’mod attiv u pożittiv fin-negozjati li għaddejjin tal-OECD.
Zdravko Marić, ministru għall-finanzi tal-Kroazja
Id-dibattitu kkonferma li l-aħjar triq 'il quddiem hija soluzzjoni internazzjonali dwar it-tassazzjoni diġitali, peress li din tevita l-frammentazzjoni u miżuri unilaterali. Il-ministri rrikonoxxew li l-OECD kienet qed taħdem bi skadenza stretta sabiex jintlaħaq kunsens globali sa tmiem l-2020, u ħafna enfasizzaw l-importanza li jittieħed vantaġġ tajjeb mix-xejra politika attwali.
Il-presidenza kkonkludiet li ser tkompli tattendi l-laqgħat internazzjonali dwar din il-kwistjoni. Hija ser torganizza diskussjonijiet tekniċi fil-Kunsill sabiex tħejji, kemm jista’ jkun, negozjati li jseħħu fl-OECD u tindirizza l-preokkupazzjonijiet tal-istati membri.
Jeħtieġ li s-sistemi tat-tassazzjoni jevolvu biex ikunu xierqa għall-era diġitali
Patt Ekoloġiku Ewropew
Il-ministri ddiskutew l-aspetti finanzjarji u ekonomiċi tal-Patt Ekoloġiku Ewropew. Il-Kummissjoni ppreżentat il-komunikazzjoni tagħha dwar il-Pjan ta’ Investiment għal Ewropa Sostenibbli ppubblikata fl-14 ta’ Jannar.
Il-pjan għandu l-għan li jimmobilizza mill-inqas EUR 1 triljun ta’ investimenti matul l-għaxar snin li ġejjin. Il-Kummissjoni tipproponi li dan jinkiseb billi jintuża l-baġit tal-UE, permezz ta’ "Fond għal Tranżizzjoni Ġusta", kif ukoll permezz ta' finanzjament privat bl-ingranaġġ ta' garanziji tal-programm InvestEU. Il-pjan jipprevedi wkoll rwol akbar għall-Bank Ewropew tal-Investiment fil-finanzjament ta' proġetti sostenibbli.
Matul id-dibattitu, il-ministri enfasizzaw l-importanza u r-rilevanza tal-Patt Ekoloġiku Ewropew u r-rieda tagħhom li jeżaminaw, bħala kwistjoni ta’ prijorità, l-azzjonijiet konkreti li għandhom jitressqu mill-Kummissjoni fix-xhur li ġejjin fl-ambitu tal-patt.
Il-Kunsill beda l-proċess annwali tas-"Semestru Ewropew" għall-monitoraġġ tal-politiki ekonomiċi, tal-impjieg u fiskali tal-istati membri.
Il-Kummissjoni ppreżentat il-Pakkett tal-Ħarifa tagħha ppubblikat fis-17 ta’ Diċembru 2019, li jinkludi:
ir-rapport tagħha dwar l-istrateġija annwali għat-tkabbir sostenibbli, li jenfasizza l-isfidi ewlenin għall-2020,
ir-"rapport dwar il-mekkaniżmu ta’ twissija" għall-2020 u
l-abbozz ta' rakkomandazzjoni tal-Kunsill dwar il-politiki ekonomiċi taż-żona tal-euro.
Huwa ppjanat li l-Kunsill japprova r-rakkomandazzjoni u jadotta konklużjonijiet dwar iż-żewġ rapporti fil-laqgħa tal-Ecofin tat-18 ta’ Frar 2020. Ir-rakkomandazzjoni mbagħad ser tiġi approvata mill-Kunsill Ewropew fil-laqgħa tiegħu ta' Marzu.
Is-Semestru Ewropew 2020 ser jintemm f'Lulju bl-adozzjoni ta' rakkomandazzjonijiet speċifiċi għall-pajjiżi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-diġitalizzazzjoni ġabet bidliet fundamentali fil-mod kif joperaw il-kumpaniji, li jeħtiġilna nadattaw ir-regoli tagħna, b’mod partikolari fil-qasam tat-tassazzjoni. Din hija kwistjoni globali li teħtieġ soluzzjoni globali. Hu għalhekk li l-UE hija impenjata li tinvolvi ruħha b’mod attiv u pożittiv fin-negozjati li għaddejjin tal-OECD.