Kunsill Affarijiet Ekonomiċi u Finanzjarji, 12 ta' April 2024

Riżultati prinċipali

Faċilità għall-Irkupru u r-Reżiljenza

Il-ministri kellhom skambju ta' fehmiet u adottaw konklużjonijiet dwar l-implimentazzjoni tal-Faċilità għall-Irkupru u r-Reżiljenza (RRF).

Il-konklużjonijiet iqisu l-progress li nkiseb bl-implimentazzjoni tal-RRF u jservu bħala gwida politika għall-Kummissjoni u l-istati membri fil-kuntest tal-evalwazzjoni ta' nofs it-terminu tal-RRF li l-Kummissjoni ppreżentat lill-Kunsill fil-21 ta' Frar 2024.

• Fond għall-irkupru: il-Kunsill japprova konklużjonijiet dwar l-evalwazzjoni ta' nofs it-terminu (stqarrija għall-istampa, 11 ta' April 2024)
• Evalwazzjoni ta' nofs it-terminu tal-RRF mill-Kummissjoni
• Pjan ta' rkupru għall-Ewropa (informazzjoni ġenerali)

L-aggressjoni tar-Russja kontra l-Ukrajna

Il-Kunsill ħa nota tas-sitwazzjoni attwali tal-impatt ekonomiku u finanzjarju tal-aggressjoni tar-Russja kontra l-Ukrajna. Il-ministri rċevew aġġornament mill-Kummissjoni dwar is-sitwazzjoni ekonomika u baġitarja fl-Ukrajna, inkluż l-implimentazzjoni tal-Faċilità għall-Ukrajna.

• Solidarjetà tal-UE mal-Ukrajna (informazzjoni ġenerali)
• Ir-rispons tal-UE għall-invażjoni tal-Ukrajna mir-Russja (informazzjoni ġenerali)
• Il-Faċilità għall-Ukrajna (informazzjoni ġenerali)

G20

Il-Kunsill approva l-mandat tal-UE għal-laqgħa tal-ministri għall-finanzi u l-gvernaturi tal-banek ċentrali tal-G20 tas-17 u t-18 ta' April 2024. Il-Kunsill approva wkoll dikjarazzjoni tal-UE għall-Kumitat Monetarju u Finanzjarju Internazzjonali.

• Is-sit web tal-G20

Affarijiet oħrajn

Taħt affarijiet oħra, il-Kap Prosekutur Ewropew ippreżentat il-ħidma tal-Uffiċċju tal-Prosekutur Pubbliku Ewropew (UPPE), b'mod partikolari fir-rigward tal-identifikazzjoni u t-tressiq quddiem il-ġustizzja ta' networks kriminali fuq skala kbira li wettqu frodi tal-VAT nazzjonali u tranżnazzjonali. Hija rringrazzjat lill-awtoritajiet tat-tassazzjoni u doganali tal-istati membri għall-għajnuna siewja tagħhom fir-rappurtar ta' suspetti ta' frodi. Dan wassal biex jinkixfu u jiżżarmaw networks kriminali transfruntieri li għamlu ħsara lill-baġit tal-UE kif ukoll lill-baġits nazzjonali b'ammont li wassal għal €11-il biljun.

L-UPPE huwa l-ewwel uffiċċju ta' prosekuzzjoni indipendenti u deċentralizzat tal-UE. Huwa għandu s-setgħa li jinvestiga, iħarrek u jressaq quddiem il-ġustizzja reati kriminali kontra l-baġit tal-UE, bħall-frodi, il-korruzzjoni jew il-frodi transfruntiera serja tal-VAT.

• L-uffiċċju tal-prosekuzzjoni pubblika indipendenti tal-UE

Punti mingħajr diskussjoni

Taħt punti mingħajr diskussjoni, il-Kunsill adotta deċiżjoni għal assistenza makrofinanzjarja urġenti għal żmien qasir għal ammont globali ta' €1 biljun f'self lill-Eġittu biex jgħin lill-pajjiż jistabbilizza l-ekonomija tiegħu.

Il-Kunsill adotta deċiżjoni li żżid l-ishma tal-UE fil-kapital tal-Bank Ewropew għar-Rikostruzzjoni u l-Iżvilupp (BERŻ). Din iż-żieda fil-kapital għandha tiżgura l-appoġġ tal-Bank għar-reżiljenza u r-rikostruzzjoni fl-Ukrajna lil hinn mill-2023 u t-tkomplija tal-appoġġ fil-pajjiżi kollha tal-operat tiegħu.

Il-Kunsill adotta wkoll l-atti leġiżlattivi u mhux leġiżlattivi l-oħra fuq il-lista ta' punti A hawn taħt.