Kunsill Affarijiet Ekonomiċi u Finanzjarji, 12 ta' Marzu 2024

Riżultati prinċipali

Investimenti u riformi soċjali

Il-ministri għall-affarijiet ekonomiċi u finanzjarji ngħaqdu mal-ministri għall-impjiegi u l-affarijiet soċjali f'dibattitu dwar l-investimenti soċjali u r-riformi għal ekonomiji reżiljenti.

Huwa ċar li l-produttività hija mutur b'saħħtu tal-kompetittività u ninnutaw li t-tkabbir medju tal-produttività staġna fl-UE matul l-aħħar għaxar snin. L-investimenti u r-riformi soċjali huma mezz kruċjali biex inniedu mill-ġdid il-produttività tagħna. Għalhekk, jeħtieġ li b'mod urġenti niffukaw aktar fuq l-innovazzjoni, ir-riċerka u l-iżvilupp, l-edukazzjoni tajba, it-titjib tal-ħiliet, it-taħriġ mill-ġdid, u l-politiki attivi tas-suq tax-xogħol fl-UE. Vincent Van Peteghem, Viċi Prim Ministru u Ministru għall-Finanzi tal-Belġju

Il-ministri ddiskutew dawk li qiesu bħala l-effetti pożittivi tar-riformi soċjali u l-investimenti fuq it-tkabbir ekonomiku u s-sostenibbiltà fiskali, u qasmu eżempji ta' riformi reċenti fl-impjiegi u riformi soċjali fil-pajjiżi tagħhom li kkontribwew għal potenzjal ogħla ta' tkabbir.

Irriflettew ukoll fuq kif il-kooperazzjoni bejn il-flussi ta' ħidma tal-ECOFIN u tal-EPSCO tista' tissaħħaħ iktar biex jiġi vvalutat aħjar l-impatt tal-investimenti u r-riformi soċjali fuq it-tkabbir ekonomiku, is-sostenibbiltà fiskali u l-koeżjoni soċjali fil-kuntest tas-Semestru Ewropew.

• Nota tal-presidenza għas-sessjoni konġunta

Faċilità għall-Irkupru u r-Reżiljenza

Il-ministri kellhom skambju ta' fehmiet dwar is-sitwazzjoni attwali tal-implimentazzjoni tal-Faċilità għall-Irkupru u r-Reżiljenza (RRF). Il-Kummissjoni ppreżentat l-evalwazzjoni ta' nofs it-terminu tagħha tal-RRF, filwaqt li qieset il-progress miksub fl-implimentazzjoni tal-faċilità s'issa.

Il-Kunsill jipprevedi li jkollu diskussjoni aktar estensiva u japprova konklużjonijiet biex jipprovdi direzzjoni u impetu politiku għall-bqija tal-perjodu ta' implimentazzjoni tal-RRF, f'April.

• Evalwazzjoni ta' nofs it-terminu tal-Kummissjoni tal-RRF
• Pjan ta' rkupru għall-Ewropa (informazzjoni ġenerali)
• REPowerEU: il-politika tal-enerġija fil-pjanijiet għall-irkupru u r-reżiljenza tal-pajjiżi tal-UE (informazzjoni ġenerali)

L-aggressjoni tar-Russja kontra l-Ukrajna

Il-Kunsill ħa nota tas-sitwazzjoni attwali tal-impatt ekonomiku u finanzjarju tal-aggressjoni tar-Russja kontra l-Ukrajna. Il-Kummissjoni aġġornat lill-ministri dwar is-sitwazzjoni ekonomika u baġitarja fl-Ukrajna.

• Solidarjetà tal-UE mal-Ukrajna (informazzjoni ġenerali)
• Ir-rispons tal-UE għall-invażjoni tal-Ukrajna mir-Russja (informazzjoni ġenerali)

Segwitu tal-G20

Il-Presidenza u l-Kummissjoni infurmaw lill-ministri dwar ir-riżultati ewlenin tal-laqgħa tal-G20 tal-ministri għall-finanzi u l-gvernaturi tal-Bank Ċentrali li saret fit-28 u d-29 ta' Frar 2024 f'São Paulo, il-Brażil.

Il-laqgħa kienet l-ewwel waħda taħt il-Presidenza Brażiljana tal-G20. Kien fiha diskussjonijiet dwar ir-rwol tal-politiki ekonomiċi fl-indirizzar tal-inugwaljanzi, l-ekonomija globali, it-tassazzjoni internazzjonali, id-dejn globali u l-finanzjament għall-iżvilupp sostenibbli.

• Sit web tal-G20

Baġit tal-Unjoni Ewropea

Il-Kunsill approva l-linji gwida tiegħu għall-baġit tal-UE għall-2025. Il-linji gwida approvati jipprovdu gwida politika lill-Kummissjoni fit-tħejjija tal-baġit għas-sena d-dieħla.

• Baġit 2025: Il-Kunsill jaqbel dwar linji gwida għall-baġit tal-UE tas-sena d-dieħla (stqarrija għall-istampa, 12 ta' Marzu 2024)
• Abbozz ta' konklużjonijiet tal-Kunsill dwar il-linji gwida baġitarji għall-2025
• Il-baġit annwali tal-UE (informazzjoni ġenerali)
• Konklużjonijiet tal-Kunsill Ewropew, 1 ta' Frar 2024

Il-Kunsill adotta wkoll rakkomandazzjoni dwar il-kwittanza li għandha tingħata lill-Kummissjoni fir-rigward tal-implimentazzjoni tal-baġit tal-UE għall-2022. Il-Kunsill irrakkomanda lill-Parlament Ewropew biex jagħti l-kwittanza.

• Abbozz ta' rakkomandazzjoni tal-Kunsill dwar il-kwittanza li għandha tingħata lill-Kummissjoni fir-rigward tal-implimentazzjoni tal-baġit ġenerali tal-Unjoni Ewropea għas-sena finanzjarja 2022
• Dikjarazzjonijiet
• Abbozz ta' rakkomandazzjonijiet tal-Kunsill dwar il-kwittanza li għandha tingħata lill-korpi stabbiliti taħt it-TFUE u t-Trattat Euratom fir-rigward tal-implimentazzjoni tal-baġit għas-sena finanzjarja 2022
• Abbozz ta' rakkomandazzjonijiet tal-Kunsill dwar il-kwittanza li għandha tingħata lill-impriżi konġunti fir-rigward tal-implimentazzjoni tal-baġit għas-sena finanzjarja 2022
• Abbozz ta' rakkomandazzjonijiet tal-Kunsill dwar il-kwittanza li għandha tingħata lill-aġenziji eżekuttivi fir-rigward tal-implimentazzjoni tal-baġit għas-sena finanzjarja 2022

Servizzi finanzjarji

Il-Presidenza ppreżentat is-sitwazzjoni attwali tan-negozjati dwar il-proposti leġiżlattivi fil-qasam tas-servizzi finanzjarji. Il-Kummissjoni infurmat lill-ministri dwar is-sitwazzjoni attwali tal-implimentazzjoni tal-leġiżlazzjoni f'dan il-qasam.

• Progress fi proposti leġiżlattivi attwali fil-qasam tas-servizzi finanzjarji

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Finanzi diġitali (informazzjoni ġenerali)
• Swieq kapitali Ewropej (informazzjoni ġenerali)

Relazzjonijiet bejn l-UE u l-Iżvizzera

Il-Kunsill awtorizza lill-Kummissjoni biex tinnegozja, f'isem l-UE, pakkett wiesa' ta' miżuri mal-Iżvizzera bħala l-bażi għal relazzjonijiet futuri bejn l-UE u l-Iżvizzera. Huwa approva wkoll id-direttivi korrispondenti għan-negozjati.

L-għan tan-negozjati huwa li jiġu mmodernizzati u approfonditi r-relazzjonijiet bilaterali bejn l-UE u l-Iżvizzera, li tiġi żgurata kompetizzjoni ġusta bejn il-kumpaniji tal-UE u dawk Żvizzeri li joperaw fis-suq intern, u li tiġi ggarantita l-protezzjoni tad-drittijiet taċ-ċittadini tal-UE fl-Iżvizzera.

• UE-Żvizzera: Il-Kunsill jadotta mandat għal negozjati dwar relazzjoni futura (stqarrija għall-istampa, 12 ta' Marzu 2024)