Kunsill Ambjent, 20/06/2016, 20 ta' Ġunju 2016

Riżultati ewlenin

Tibdil fil-klima

Il-Kunsill adotta dikjarazzjoni dwar ir-ratifika tal-Ftehim ta' Pariġi. Il-ftehim globali dwar it-tibdil fil-klima li huwa legalment vinkolanti ġie adottat f’Diċembru 2015 f’Pariġi. Huwa ser jidħol fis-seħħ wara ratifika minn 55 pajjiż li jirrappreżentaw mill-inqas 55% tal-emissjonijiet globali tal-gassijiet b'effett ta' serra.

Permezz ta’ din id-dikjarazzjoni rridu ngħaddu messaġġ politiku ċar dwar l-impenn tal-UE biex tindirizza t-tibdil fil-klima. Aħna determinati li nirratifikaw il-ftehim ta’ Pariġi kemm jista’ jkun malajr u biex naħdmu għall-implimentazzjoni effettiva tal-ftehim.” Sharon Dijksma, Ministru Netherlandiż għall-Ambjent

Il-Ministru Netherlandiż għall-Ambjent u President tal-Kunsill Ambjent, Sharon Dijksma, qalet: “Permezz ta’ din id-dikjarazzjoni rridu ngħaddu messaġġ politiku ċar dwar l-impenn tal-UE biex tindirizza t-tibdil fil-klima. Aħna determinati li nirratifikaw il-ftehim ta’ Pariġi kemm jista’ jkun malajr u biex naħdmu għall-implimentazzjoni effettiva tal-ftehim”.

• Dikjarazzjoni tal-Kunsill dwar ir-ratifika tal-Ftehim ta' Pariġi
• Kronoloġija - il-Ftehim ta’ Pariġi

Il-ministri ħadu nota wkoll tal-preżentazzjoni mill-Kummissjoni tal-proposta għall-konklużjoni tal-Ftehim ta’ Pariġi mill-UE.

Barra minn hekk, kellhom dibattitu ta’ orjentazzjoni dwar ir-rieżami ta’ wieħed mill-għodod prinċipali tal-UE biex jitnaqqsu l-emissjonijiet tal-gass b’effett serra u jindirizzaw it-tibdil fil-klima: l-iskema għan-negozjar ta’ emissjonijiet (ETS).

• Riforma tal-iskema tal-UE għall-iskambju tal-kwoti tal-emissjonijiet

Kwalità tal-arja

Il-ministri ħadu kont tad-diskussjonijiet dwar regoli ġodda u limiti għas-sustanzi li jniġġsu fl-arja, l-hekk imsejħa direttiva NEC. Il-presidenza infurmat lill-ministri dwar is-sitwazzjoni attwali tan-negozjati mal-Parlament Ewropew.

• Livelli massimi riveduti ta' emissjonijiet nazzjonali (Direttiva dwar il-Livelli Massimi ta' Emissjonijiet Nazzjonali)

Ekonomija ċirkolari

Il-Kunsill adotta konklużjonijiet dwar il-pjan ta’ azzjoni għal ekonomija ċirkolari. Dan il-pjan għandu l-għan li jnaqqas l-iskart u jżomm il-valur ta’ prodotti, materjali u riżorsi fl-ekonomija għall-itwal żmien possibbli. Il-konklużjonijiet jappoġġaw dan l-għan u juru impenn għal din it-transizzjoni lejn mudell aktar sostenibbli, pereżempju billi jitnaqqas l-użu tar-riżorsi, jiġi mħeġġeġ ir-riċiklaġġ u ġestjoni aħjar tal-iskart.

• Konklużjonijiet tal-Kunsill dwar il-pjan ta’ azzjoni tal-UE għall-ekonomija ċirkolari

Traffikar tal-organiżmi selvaġġi

Il-Kunsill adotta l-konklużjonijiet li jappoġġaw il-pjan ta' azzjoni tal-UE kontra t-traffikar ta' organiżmi selvaġġi. Il-Kunsill esprima tħassib serju dwar iż-żieda fit-traffikar illegali ta’ organiżmi selvaġġi u l-effett negattiv tiegħu fuq il-bijodiversità u l-iżvilupp sostenibbli. Il-konklużjonijiet jappellaw lill-atturi kollha biex iżidu l-isforzi tagħhom biex jiġġieldu dan ir-reat.