Kunsill Ambjent, 17/10/2016, 17 ta' Ottubru 2016

Riżultati ewlenin

Klima: tnaqqis tal-emissjonijiet

Il-ministri ddiskutew leġislazzjoni ġdida biex titnaqqas l-emissjoni ta' gass b'effett ta' serra fis-setturi li mhumiex koperti mill-iskema għall-iskambju ta' kwoti tal-emissjonijiet (ETS), bħat-trasport, il-bini u l-iskart. Il-ministri kellhom dibattitu dwar it-triq 'il quddiem għall-proposti tal-Kummissjoni għal regolament dwar il-kondiviżjoni tal-isforzi u regolament dwar l-użu tal-art, tibdil fl-użu tal-art u l-forestrija (ir-regolament LULUCF). Huma enfasizzaw l-importanza ta' din il-leġislazzjoni għat-twettiq tal-impenn tal-UE skont il-Ftehim ta' Pariġi dwar it-tibdil fil-klima.

"Dawn l-aħħar ġimgħat li għaddew kienu bla preċedent għall-politiki dwar it-tibdil fil-klima, bir-ratifika tal-UE tal-Ftehim ta' Pariġi u l-emenda għall-Protokoll ta' Montreal li għadha kif ġiet adottata fix-xena internazzjonali. Issa, jeħtieġ li fl-UE nieħdu r-riedni f'idejna u nimplimentaw l-impenji internazzjonali tagħna. Għaldaqstant, jiena nilqa' l-ewwel dibattitu bejn il-ministri dwar il-kondiviżjoni tal-isforzi li tana ħjiel importanti li jiggwida l-ħidma futura tagħna fuq dawn l-inizjattivi kruċjali."

László Sólymos, Ministru Slovakk għall-Ambjent u President tal-Kunsill

Ilma

Il-Kunsill adotta konklużjonijiet dwar l-immaniġġar sostenibbli tal-ilma. Dawn huma parti minn dibattitu usa’ dwar il-politika futura tal-UE dwar l-ilma. It-test jindirizza l-isfidi marbuta mal-użu tal-art u mat-tibdil fil-klima. Dan iqis ukoll il-kuntest internazzjonali l-ġdid, inkluż il-Ftehim ta' Pariġi u l-Aġenda 2030 għall-Iżvilupp Sostenibbli.

"L-ilma huwa riżors prezzjuż u skars li huwa affettwat mill-użu tal-art u l-klima. Ninsab kuntent ferm li l-fokus tagħna fuq l-ilma ġie milqugħ daqshekk tajjeb fost l-istati membri. Illum, aħna bgħattna sinjal b'saħħtu, ċar u f'waqtu dwar l-intenzjoni soda tagħna li nindirizzaw dawk l-isfidi billi nimplimentaw b'mod sħiħ il-leġislazzjoni tal-UE dwar l-ilma u nilħqu l-objettivi tal-politika tagħna."

László Sólymos, Ministru Slovakk għall-Ambjent u President tal-Kunsill

• Konklużjonijiet tal-Kunsill dwar l-immaniġġar sostenibbli tal-ilma

Bijodiversità

Il-ministri qablu wkoll dwar il-konklużjonijiet tal-Kunsill dwar il-bijodiversità, qabel il-laqgħa tal-partijiet għall-Konvenzjoni dwar id-Diversità Bijoloġika u l-protokolli tagħha (Cancun, il-Messiku, 4–17 ta’ Diċembru 2016). Dawn il-konklużjonijiet ser ikunu l-bażi għall-pożizzjoni ta’ negozjar tal-UE waqt il-laqgħa.

"Il-bijodiversità hija essenzjali għall-għajxien tal-ġenerazzjoni tagħna u dawk futuri fuq din il-pjaneta u għall-funzjonament tal-ekosistemi. Bħala speċi aħna parti minn dawn l-ekosistemi u għandna bżonn naġixxu fuq livell internazzjonali biex inwaqqfu t-telfien tal-bijodiversità u nbiddlu r-rotta li mexjin fiha lejn livelli li huma perikolużi għall-bijodiversità. Bid-deċiżjonijiet li ħadna llum, aħna wrejna l-impenn tagħna għal eżitu b'suċċess tal-laqgħa internazzjonali importanti li ġejja dwar il-bijodiversità, fil-Messiku."

László Sólymos, Ministru Slovakk għall-Ambjent u President tal-Kunsill

• Konklużjonijiet tal-Kunsill dwar il-Konvenzjoni dwar id-Diversità Bijoloġika