Kunsill Affarijiet Barranin, 18/03/2019, 18 ta' Marzu 2019

Riżultati ewlenin

Il-ħames anniversarju tal-annessjoni illegali tal-Krimea

Peress li l-laqgħa saret f'jum il-ħames anniversarju tal-annessjoni illegali tal-Krimea u Sevastopol, ir-Rappreżentant Għoli u l-ministri għall-affarijiet barranin ikkommemoraw l-avveniment billi tennew pubblikament l-elementi ewlenin tal-pożizzjoni tal-UE.

L-UE ddikjarat ripetutament li ma nirrikonoxxux dan il-ksur tad-dritt internazzjonali u mhux ser nirrikonoxxuh. L-UE hija solidali għalkollox mal-Ukrajna u tappoġġa s-sovranità u l-integrità territorjali tagħha. Federica Mogherini, Rappreżentant Għoli għall-Affarijiet Barranin u l-Politika ta’ Sigurtà

Ġrajjiet kurrenti

Ir-Rappreżentant Għoli u l-ministri għall-affarijiet barranin laqgħu b'sodisfazzjon ir-riżultati tat-tielet konferenza ta' Brussell dwar l-appoġġ għall-futur tas-Sirja u r-reġjun, li kienet l-opportunità biex jerġa' jiġi affermat l-appoġġ tal-UE għall-proċess politiku mmexxi min-NU u jingħata sinjal qawwi ta' appoġġ kontinwu għall-poplu Sirjan billi tiġi mmobilizzata b'suċċess l-għajnuna mill-komunità internazzjonali.

Ir-Rappreżentant Għoli infurmat lill-ministri bil-ħidma li għaddejja tal-Grupp Internazzjonali ta’ Kuntatt dwar il-Venezwela. Il-ministri għall-affarijiet barranin esprimew it-tħassib tagħhom hekk kif is-sitwazzjoni umanitarja tkompli tmur għall-agħar. Huma tennew il-ħtieġa urġenti li tinstab triq lejn proċess politiku.

Fost il-kwistjonijiet li ssemmew hemm ukoll l-iffirmar tal-ftehim ta' paċi fir-Repubblika Ċentru-Afrikana u l-miżuri tal-Istati Uniti mħabbra reċentement dwar il-Qorti Kriminali Internazzjonali.

Ċina

Il-Kunsill kellu skambju ta' fehmiet estensiv u komprensiv dwar iċ-Ċina u r-relazzjonijiet bejn l-UE u ċ-Ċina, qabel id-diskussjoni mal-Kunsillier tal-Istat Ċiniż u Ministru għall-Affarijiet Barranin Wang Li. Id-diskussjoni ser tikkontribwixxi għat-tħejjija tad-dibattitu fost il-Kapijiet ta' Stat jew ta' gvern waqt il-laqgħa tal-Kunsill Ewropew tal-21 u t-22 ta' Marzu, u qabel is-summit UE-Ċina li ser isir fid-9 ta' April 2019 fi Brussell.

Id-diskussjoni kienet ibbażata fuq il-komunikazzjoni konġunta mir-Rappreżentant Għoli u l-Kummissjoni bit-titlu "UE-Ċina: Perspettiva strateġika" li ġiet adottata fit-12 ta' Marzu. Il-Ministri laqgħu l-valutazzjoni li saret fil-komunikazzjoni konġunta u l-azzjonijiet proposti. Filwaqt li l-Istrateġija għaċ-Ċina għall-2016 tibqa' l-bażi għall-kooperazzjoni tal-UE maċ-Ċina, il-komunikazzjoni konġunta tagħti direzzjonijiet utli dwar kif jista' jiġi rfinut l-approċċ tal-Ewropa għaċ-Ċina biex dan ikun aktar realistiku, aktar assertiv u multidimensjonali.

Il-ministri għall-affarijiet barranin enfasizzaw l-importanza kruċjali tal-għaqda, is-solidarjetà u l-konsistenza fil-livell tal-UE għal impenn produttiv maċ-Ċina, billi hija biss UE magħquda li tista' tittratta b'mod effikaċi l-isfidi li tippreżenta ċ-Ċina llum. Huma insistew ukoll fuq il-valuri tal-UE, il-prinċipji tagħha kif ukoll salvagwardja tal-interessi strateġiċi tagħha fir-relazzjonijiet bejn l-UE u ċ-Ċina. Huma enfasizzaw l-importanza li jiġu rispettati d-drittijiet tal-bniedem u tad-djalogu bejn l-UE u ċ-Ċina dwar id-drittijiet tal-bniedem. Huma ssottolinjaw il-ħtieġa għal reċiproċità aħjar fir-relazzjonijiet ekonomiċi, kif ukoll l-iżvilupp ta' kondizzjonijiet ekwi u aċċess għas-suq ekwu għan-negozji tal-UE. Il-ministri rreferew ukoll għaċ-ċibersigurtà,l-iskrinjar tal-investiment u għall-ħtieġa li jiġu protetti l-infrastruttura u l-industrija kritiċi tal-UE.

Il-ministri sejħu għal approfondiment tal-kooperazzjoni maċ-Ċina f'oqsma bħall-multilateraliżmu, it-tibdil fil-klima, in-nonproliferazzjoni (fil-kuntest tal-Pjan ta' Azzjoni Komprensiv Konġunt - PAKK u fil-peniżola Koreana), iż-żamma tal-paċi u l-indirizzar tal-isfidi reġjonali fil-qasam tas-sigurtà.

Waqt l-ikla ta' nofsinhar ta' ħidma, il-ministri għall-affarijiet barranin kellhom diskussjoni miftuħa u estensiva mal-Kunsillier tal-Istat Ċiniż u Ministru għall-Affarijiet Barranin Wang Li. Qabel iż-żewġ laqgħat kien hemm djalogu strateġiku bejn l-UE u ċ-Ċina mmexxi mir-Rappreżentant Għoli u l-Kunsillier tal-Istat.

• Ir-relazzjonijiet tal-UE maċ-Ċina, informazzjoni ġenerali
• Komunikazzjoni Konġunta 2019 UE-Ċina – Perspettiva strateġika, stqarrija għall-istampa, 12 ta' Marzu 2019

Repubblika tal-Moldova

Il-Kunsill iddiskuta l-Moldova wara l-elezzjonijiet parlamentari tal-24 ta' Frar. Il-ministri għall-affarijiet barranin enfasizzaw l-importanza ta' proċess ta' formazzjoni tal-gvern trasparenti u kredibbli li għandu jirrifletti maġġoranza parlamentari ġenwina li tirrispetta l-eżitu tal-elezzjonijiet. Huma saħqu fuq l-importanza li ma jkunx hemm interferenza fil-proċess ta' formazzjoni u fakkru li l-UE ma tappoġġax partiti individwali u atturi politiċi speċifiċi, iżda valuri u prinċipji.

Il-Kunsill fakkar li l-bażi għall-kooperazzjoni tal-UE mal-Moldova hija l-implimentazzjoni tal-Ftehim ta' Assoċjazzjoni, inkluż impenn qawwi għall-aġenda ta' riforma u rispett għall-istat tad-dritt u l-prinċipji demokratiċi.

Il-ministri għall-affarijiet barranin ikkonfermaw l-importanza tal-prinċipju ta' kondizzjonalità biex titwassal l-assistenza makro-finanzjarja, li kellha titwaqqaf minħabba deterjorament serju fl-oqsma kollha tal-istat tad-dritt u fir-rispett tal-prinċipji demokratiċi. F'dan il-kuntest, huma enfasizzaw l-importanza kritika li jitwasslu benefiċċji tanġibbli liċ-ċittadini tal-Moldova u appoġġ kontinwu għas-soċjetà ċivili.

Jemen

Il-ministri fakkru li ma jista' jkun hemm ebda soluzzjoni militari għall-konflitt fil-Jemen u li l-unika triq 'il quddiem hija l-implimentazzjoni tal-ftehim ta' Stokkolma fl-intier tiegħu. Huma enfasizzaw il-ħtieġa li jinżamm il-momentum politiku u l-partijiet jingħataw spinta biex iżommu l-impenji tagħhom skont il-ftehim b'mod urġenti, kif ukoll il-ħtieġa li jsir progress immedjat fil-post.

Il-Kunsill tenna l-appoġġ sħiħ tal-UE għall-Mibgħut Speċjali tan-NU Martin Griffiths u l-isforzi tiegħu biex tinstab soluzzjoni politika dejjiema, sostenibbli, infurzabbli, inklużiva u nnegozjata f'qafas immexxi min-NU. Il-ministri għall-affarijiet barranin enfasizzaw b'mod partikolari l-importanza li n-nisa Jemeniti jiġu assoċjati bis-sħiħ mal-proċess politiku.

Il-Ministri esprimew tħassib bin-nuqqas ta' titjib fis-sitwazzjoni umanitarja diffiċli, b'mod partikolari fir-rigward tal-aċċess għall-għajnuna umanitarja. Il-Kunsill tenna li l-UE u l-istati membri tagħha ser ikomplu l-isforzi ta' assistenza umanitarja tagħhom u joffru l-appoġġ politiku skont kif meħtieġ.

• Konklużjonijiet tal-Kunsill dwar il-Jemen, 18 ta’ Frar 2019
• Relazzjonijiet tal-UE mal-Jemen (SEAE)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN