"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin u Kunsill Affarijiet Barranin (Difiża), 21 ta' Marzu 2022
Riżultati ewlenin
Affarijiet barranin
L-aggressjoni Russa kontra l-Ukrajna
Il-ministri kellhom diskussjoni dwar l-aggressjoni militari Russa kontra l-Ukrajna. S'issa 13-il miljun ruħ jeħtieġu għajnuna umanitarja immedjata, u aktar minn 3.3 miljun ħarbu mill-pajjiż.
Il-ministri kienu magħqudin fl-appoġġ tagħhom għall-Ukrajna. Huma qablu li jkomplu jrażżnu u jiżolaw lir-Russja b'mod diplomatiku u fix-xena internazzjonali, u jikkundannaw id-delitti tal-gwerra tagħha, u l-ksur tad-dritt umanitarju internazzjonali.
L-UE ser tkompli tappoġġa lill-Ukrajna ekonomikament, finanzjarjament, u tappoġġa lill-forzi armati Ukreni. F'dan ir-rigward, il-ministri laħqu qbil politiku dwar 500 miljun euro addizzjonali li għandhom jiġu mobilizzati taħt il-Faċilità Ewropea għall-Paċi.
Dak li qed jiġri fl-Ukrajna huwa delitt tal-gwerra fuq skala enormi mwettaq mill-Forzi Armati Russi kontra l-poplu Ukren. Ma nistgħux ma nirreaġixxux. Huwa għalhekk li nilqgħu l-Kummissjoni ta' Inkjesta mwaqqfa mill-Kunsill tad-Drittijiet tal-Bniedem tan-NU. Nilqgħu wkoll l-investigazzjoni mill-Prosekutur tal-Qorti Kriminali Internazzjonali, u nfakkru fl-ordni mogħtija mill-Qorti Internazzjonali tal-Ġustizzja biex ir-Russja twaqqaf l-invażjoni tal-Ukrajna.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
L-UE tinsab lesta li tkompli ssaħħaħ il-miżuri restrittivi tagħha jekk is-sitwazzjoni teħtieġ dan, u timpenja ruħha mas-sħab internazzjonali.
Matul id-diskussjoni, il-Viċi Prim Ministru u l-Ministru għall-Affarijiet Barranin tal-Moldova Nicu Popescu ngħaqad mal-ministri.
Il-Moldova hija wieħed mill-pajjiżi l-aktar affettwati mill-aggressjoni Russa, fejn 13% tat-tfal fil-pajjiż huma refuġjati Ukreni, u hija wkoll wieħed mill-aktar mhedda. L-UE tieħu b'serjetà t-tħassib u l-ħtiġijiet tal-Moldova, u l-ministri enfasizzaw l-impenn tagħhom li kollettivament iżidu l-appoġġ tal-UE lill-pajjiż.
Mali
Il-Kunsill kellu skambju ta' fehmiet dwar is-sitwazzjoni fil-Mali.
L-awtoritajiet ta' tranżizzjoni fil-Mali mhux biss appellaw għall-irtirar tal-forzi Barkhane u Takuba mill-pajjiż, iżda ddeċidew ukoll li jikkooperaw mal-forzi merċenarji affiljati mar-Russja tal-Grupp Wagner, li huma magħrufa għall-atroċitajiet kull fejn ħadu sehem f'operazzjoni.
Il-Kunsill ikkonferma li l-missjoni ta' taħriġ militari tal-UE fil-Mali (EUTM Mali) bl-ebda mod ma tista' tkun involuta f'attivitajiet li jistgħu jdgħajfu r-reputazzjoni tal-UE.
Għal din ir-raġuni r-Rappreżentant Għoli talab bil-miktub għal garanziji li dawk l-unitajiet li qed jitħarrġu mill-UE ma jaħdmux jew ma jikkooperawx mal-Grupp Wagner. L-UE qed tistenna tweġiba mill-awtoritajiet tal-Mali u, f'każ li dawk il-garanziji ma jingħatawx, l-UE ma jkollha l-ebda għażla ħlief li tqis mill-ġdid il-preżenza tagħha fil-Mali.
Sadanittant l-UE tkompli tipprovdi għajnuna finanzjarja diretta lill-popolazzjoni fil-Mali u fis-Saħel b'mod aktar ġenerali, u ser testendi l-appoġġ tagħha għall-Burkina Faso u n-Niġer.
Konklużjonijiet tal-Kunsill
Il-Kunsill approva konklużjonijiet dwar il-Kamerun.
Il-ministri għall-affarijiet barranin u għad-difiża tal-UE f'sessjoni konġunta approvaw il-Boxxla Strateġika, pjan ta' azzjoni ambizzjuż biex tissaħħaħ il-politika ta' sigurtà u ta' difiża tal-UE sal-2030.
Meta ppreżentajt il-Boxxla f'Novembru li għadda, għidt li l-Ewropa tinsab fil-periklu. Issa, dan jidher b'mod ċarissimu. Din l-invażjoni mhux provokata u mhux ġustifikata timmarka "bidla tettonika". Ir-reazzjoni tagħna għall-gwerra wriet li aħna, bħala l-UE, nistgħu naġixxu b'mod sod u rapidu meta nkunu magħqudin. L-adozzjoni tal-lum tal-Boxxla tikkonferma dan.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Boxxla Strateġika tipprovdi valutazzjoni kondiviża tal-ambjent strateġiku li fih qed topera l-UE u tat-theddid u l-isfidi li qed tiffaċċa l-Unjoni. Għall-ewwel darba, id-dokument jagħmel proposti konkreti u azzjonabbli, b'kalendarju preċiż ħafna għall-implimentazzjoni, sabiex tittejjeb il-kapaċità tal-UE li taġixxi b'mod deċiżiv fi kriżijiet u biex tiddefendi s-sigurtà tagħha u ċ-ċittadini tagħha.
Il-Boxxla tenfasizza wkoll b'mod ċar l-importanza tar-relazzjoni trans-Atlantika u tar-rwol tan-NATO fid-difiża kollettiva. UE aktar b'saħħitha u aktar kapaċi fil-qasam tas-sigurtà u d-difiża ser tgħin biex tissaħħaħ is-sigurtà trans-Atlantika u n-NATO.
Il-Boxxla Strateġika issa mistennija li tiġi approvata mill-Kunsill Ewropew fl-24 u l-25 ta' Marzu 2022.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Dak li qed jiġri fl-Ukrajna huwa delitt tal-gwerra fuq skala enormi mwettaq mill-Forzi Armati Russi kontra l-poplu Ukren. Ma nistgħux ma nirreaġixxux. Huwa għalhekk li nilqgħu l-Kummissjoni ta' Inkjesta mwaqqfa mill-Kunsill tad-Drittijiet tal-Bniedem tan-NU. Nilqgħu wkoll l-investigazzjoni mill-Prosekutur tal-Qorti Kriminali Internazzjonali, u nfakkru fl-ordni mogħtija mill-Qorti Internazzjonali tal-Ġustizzja biex ir-Russja twaqqaf l-invażjoni tal-Ukrajna.
