Ir-relazzjonijiet tal-UE mal-Istati Uniti
L-UE u l-Istati Uniti għandhom l-aktar relazzjoni kummerċjali u ta' investiment bilaterali estensiva fid-dinja u jaħdmu flimkien biex jindirizzaw l-isfidi għas-sigurtà globali.
Kummerċ u investiment
Kummerċ bejn l-UE u l-Istati Uniti
Ir-relazzjoni trans-Atlantika hija arterja ewlenija tal-ekonomija dinjija. Flimkien, l-Unjoni Ewropea u l-Istati Uniti jirrappreżentaw kważi 30% tal-kummerċ dinji fi prodotti u servizzi u 43% tal-Prodott Domestiku Gross dinji (PDG, espress f'USD). L-UE u l-Istati Uniti għandhom l-aktar relazzjoni ekonomika integrata mill-qrib fid-dinja.
L-2025 kienet sena rekord oħra li fiha l-kummerċ bilaterali fi prodotti u servizzi laħaq €1.77 triljun (skont data proviżorja). Dan huwa aktar mill-PDG ta' Spanja. Kuljum, prodotti u servizzi b'valur ta' aktar minn €4.8 biljun jaqsmu l-Atlantiku.
Fl-2025, l-UE kellha surplus kummerċjali ta' €20 biljun mal-Istati Uniti, meta jitqiesu kemm il-prodotti kif ukoll is-servizzi.
Evoluzzjoni tal-kummerċ transatlantiku (2014-2025)
Grafika b'kolonni li turi kif il-kummerċ fi prodotti u servizzi bejn l-UE u l-Istati Uniti evolva bejn l-2015 u l-2025. Il-kummerċ kemm fi prodotti kif ukoll f'servizzi rdoppja u aktar f'dan il-perjodu. Fl-2015, il-kummerċ ammonta għal ftit aktar minn €856 biljun, filwaqt li fl-2025 laħaq €1.77 triljun.
Sors: l-Eurostat.
Kummerċ UE-Stati Uniti: fatti u ċifri
Dikjarazzjoni konġunta UE-Stati Uniti
Wara d-dikjarazzjoni konġunta bejn l-UE u l-Istati Uniti tal-21 ta' Awwissu 2025, f'Ġunju 2026 il-Kunsill adotta formalment żewġ regolamenti li jippromulgaw it-tnaqqis tat-tariffi tal-UE.
Ir-regolamenti jneħħu d-dazji doganali li fadal fuq il-prodotti industrijali tal-Istati Uniti, jagħtu aċċess preferenzjali għal ċerti prodotti agrikoli, u jestendu s-sospensjoni tad-dazji fuq l-importazzjonijiet tal-awwista (mill-pajjiżi kollha, mhux biss mill-Istati Uniti). Dawn huma akkumpanjati minn ilqugħ ta' protezzjoni msaħħaħ biex jiġu protetti l-produtturi, in-negozji u l-ħaddiema tal-UE.
Ir-regolamenti jinkludu mekkaniżmu ta' salvagwardja, mekkaniżmu ta' sospensjoni li jippermetti lill-UE tirreaġixxi jekk l-Istati Uniti jonqsu milli jirrispettaw l-impenji tagħhom, u klawżola ta' estinzjoni li skontha r-regolament ewlieni ser japplika sa tmiem l-2029 u r-regolament dwar l-awwista ser jiskadi f'Lulju 2030 sakemm ma titteħidx azzjoni ulterjuri.
Ir-regolamenti ser jidħlu fis-seħħ fil-jum wara l-pubblikazzjoni tagħhom fil-Ġurnal Uffiċjali. Ir-regolament dwar l-importazzjonijiet tal-awwista ser japplika b'mod retroattiv mill-1 ta' Awwissu 2025.
- Kummerċ UE-Stati Uniti: il-Kunsill u l-Parlament jilħqu ftehim biex jimplimentaw l-elementi tariffarji tad-dikjarazzjoni konġunta (stqarrija għall-istampa, 20 ta' Mejju 2026)
- Dikjarazzjoni konġunta dwar qafas bejn l-Istati Uniti u l-Unjoni Ewropea għal ftehim dwar kummerċ reċiproku, ġust u bbilanċjat (Kummissjoni Ewropea)
- Kummerċ bejn l-UE u l-Istati Uniti: il-Kunsill jagħti l-approvazzjoni finali għall-impenji tariffarji skont id-Dikjarazzjoni Konġunta (stqarrija għall-istampa, 25 ta' Ġunju 2026)
Investimenti
L-investimenti reċiproċi tal-UE u l-Istati Uniti huma l-akbar fid-dinja u jimmotivaw sostanzjalment ir-relazzjoni trans-Atlantika. Fl-2024, l-investimenti diretti barranin (IDB) reċiproċi fl-istokkijiet qabżu €4.8 triljun. Dan huwa kważi daqs il-valur tal-ekonomiji kollha ta' Franza u Spanja flimkien.
Mill-kumpaniji kollha tal-UE li jinvestu barra mill-pajjiż, madwar terz jinvestu fl-Istati Uniti, u mill-investimenti barranin kollha fl-UE, madwar terz jiġu mill-Istati Uniti.
L-investimenti totali tal-Istati Uniti fl-UE huma kważi erba' darbiet ogħla minn dak fir-reġjun Asja-Paċifiku. L-investiment dirett barrani tal-UE fl-Istati Uniti huwa madwar għaxar darbiet l-ammont ta' investiment tal-UE fl-Indja u ċ-Ċina flimkien.
Il-kummerċ u l-investiment bilaterali jappoġġaw miljuni ta' impjiegi fl-UE u fl-Istati Uniti. L-esportazzjonijiet tal-Istati Uniti ta' prodotti u servizzi lejn l-UE jappoġġaw 2.3 miljun impjieg fl-Istati Uniti, u l-investimenti tal-kumpaniji tal-UE fl-Istati Uniti jimpjegaw 3.4 miljun persuna.
Enerġija
Il-kooperazzjoni trans-Atlantika mill-qrib qdiet rwol kruċjali biex tiġi żgurata s-sigurtà tal-enerġija tal-UE wara l-gwerra ta' aggressjoni tar-Russja kontra l-Ukrajna. L-UE ssostitwiet uħud mill-importazzjonijiet tal-gass tar-Russja b'gass naturali likwifikat (LNG) tal-Istati Uniti.
Fl-2025, l-UE importat aktar minn 82.9 biljun metru kubu (bcm) ta' LNG mill-Istati Uniti. Dan jammonta għal 26.4% tal-importazzjoni totali tal-gass u kważi 58% tal-importazzjoni tal-LNG min-naħa tal-UE.
Importazzjonijiet tal-gass min-naħa tal-UE
Grafika li tqabbel il-provvista tal-gass mis-sħab ewlenin lejn l-UE fl-2021, l-2023 u l-2025.
L-importazzjonijiet mir-Russja naqsu minn aktar minn 150 biljun metru kubu (bcm) fl-2021 għal 38 bcm fl-2025. Dan kien prinċipalment ikkumpensat minn importazzjonijiet li qed jiżdiedu minn sħab oħra. L-importazzjoni min-Norveġja żdiedet minn 86.4 bcm fl-2021 għal 97.1 bcm fl-2025. L-importazzjonijiet mill-Istati Uniti żdiedu minn 21 bcm fl-2021 għal 82.9 bcm fl-2025, filwaqt li l-importazzjonijiet minn sħab oħra żdiedu minn 51.7 bcm fl-2021 għal 56.9 bcm fl-2025.
Sors: Bruegel
Iż-żewġ sħab trans-Atlantiċi jikkooperaw fil-Kunsill tal-Enerġija UE-Stati Uniti, forum għall-koordinazzjoni dwar kwistjonijiet strateġiċi tal-enerġija ta' interess reċiproku u għall-kooperazzjoni dwar ir-riċerka u l-iżvilupp.
L-indirizzar tal-isfidi globali tas-soċjetà
L-UE u l-Istati Uniti jaħdmu flimkien biex jindirizzaw l-isfidi għas-sigurtà dinjija bħat-terroriżmu, l-estremiżmu vjolenti, il-proliferazzjoni tal-armi nukleari u l-kriminalità tranżnazzjonali. Għandhom ukoll rabtiet mill-qrib fl-oqsma tas-sigurtà u d-difiża.
L-UE u l-Istati Uniti investew $600 biljun madwar id-dinja permezz tas-Sħubija tal-G7 għall-Infrastruttura u l-Investiment Globali, inkluż permezz tal-Global Gateway tal-UE.
Il-gwerra ta' aggressjoni tar-Russja kontra l-Ukrajna
Il-gwerra ta' aggressjoni tar-Russja kontra l-Ukrajna tikkostitwixxi ksur ċar tal-Karta tan-NU u tad-dritt internazzjonali. Hija sfida ewlenija, mhux biss għas-sovranità u l-integrità territorjali tal-Ukrajna, iżda wkoll għall-ordni internazzjonali bbażata fuq ir-regoli.
F'kooperazzjoni mill-qrib mas-sħab tagħhom tal-G7, l-UE u l-Istati Uniti jappoġġaw lill-Ukrajna u lill-poplu tagħha u qed jimplimentaw firxa ta' miżuri biex iżidu l-pressjoni fuq ir-Russja biex twaqqaf il-gwerra ta' aggressjoni tagħha kontra l-Ukrajna.
Solidarjetà mal-Ukrajna
L-UE tappoġġa bis-sħiħ lill-Ukrajna u lill-poplu tagħha, u ser tkompli tipprovdi appoġġ politiku, finanzjarju, ekonomiku, umanitarju, militari u diplomatiku.
L-UE u l-Istati Uniti jappoġġaw lill-Ukrajna fl-oqsma kollha, inkluż billi jipprovdu assistenza militari, ikomplu l-isforzi għall-paċi u d-diplomazija, iwettqu impenji ta' sigurtà u jappoġġaw ir-rikostruzzjoni u r-riformi (relatati mal-adeżjoni).
Mill-bidu tal-gwerra ta' aggressjoni tar-Russja, l-UE u l-istati membri tagħha pprovdew €215 biljun f'appoġġ għall-Ukrajna u l-poplu tagħha.
Solidarjetà tal-UE mal-Ukrajna
Sanzjonijiet kontra r-Russja
L-UE, l-Istati Uniti u sħab oħra tal-istess fehma imponew sanzjonijiet massivi u bla preċedent kontra r-Russja b'rispons għall-gwerra ta' aggressjoni kontra l-Ukrajna.
Il-miżuri huma mfassla biex idgħajfu l-bażi ekonomika tar-Russja, iċaħħduha minn teknoloġiji u swieq kritiċi u jnaqqsu b'mod sinifikanti l-kapaċità tagħha li tagħmel gwerra.
Is-sanzjonijiet tal-UE għandhom fil-mira s-setturi finanzjarji, kummerċjali, tal-enerġija, tat-trasport, tat-teknoloġija u tad-difiża tar-Russja, kif ukoll is-servizzi mogħtija lir-Russja jew lil ċittadini Russi. Għandhom ukoll fil-mira lil individwi u entitajiet responsabbli għal azzjonijiet li jdgħajfu jew jheddu l-integrità territorjali, is-sovranità jew l-indipendenza tal-Ukrajna.
L-individwi sanzjonati jinkludu l-President Russu, Vladimir Putin, u ministri, gvernaturi u politiċi lokali, membri tad-Duma tal-Istat Russu u tal-Kunsill tas-Sigurtà Russu, propagandisti, uffiċjali għolja u persunal militari.
L-UE tikkoordina mill-qrib il-politika ta' sanzjonijiet tagħha mal-Istati Uniti u ma' sħab oħra tal-G7 biex l-impatt u l-effettività tagħhom jiżdiedu.
Kooperazzjoni bejn il-persuni
L-UE u l-Istati Uniti jrawmu għadd ta' skambji bejn il-persuni u programmi akkademiċi, fosthom:
- Erasmus+ u Erasmus Mundus
- l-azzjonijiet Jean Monnet
- l-azzjonijiet Marie Skłodowska-Curie
- il-programm Fulbright-Schuman
- il-programm ta' żjarat tal-UE
- il-programm ta żjarat ta' mexxejja emerġenti bejn l-UE u l-Istati Uniti
Ara wkoll
Kummerċ bejn l-UE u l-Kanada: fatti u ċifri
Kummerċ UE-Messiku: fatti u ċifri
Ir-rwol tal-UE fil-kummerċ dinji
L-aħħar reviżjoni: 1 ta' Lulju 2026