"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Konklużjonijiet dwar it-tkabbir u l-proċess ta' stabbilizzazzjoni u ta' assoċjazzjoni
Il-ministri approvaw il-konklużjonijiet tal-Kunsill dwar it-tkabbir u l-proċess ta' stabbilizzazzjoni u ta' assoċjazzjoni.
Ninsab kuntent li flimkien mal-ministri u s-segretarji tal-istat sħabna qbilna b'mod unanimu dwar il-konklużjonijiet tal-Kunsill dwar it-tkabbir u l-proċess ta' stabbilizzazzjoni u ta' assoċjazzjoni. Is-Slovenja, bħala l-Presidenza tal-Kunsill, ilha taħdem biex tagħti spinta ġdida lit-tkabbir tal-UE u appoġġat lill-pajjiżi tal-Balkani tal-Punent fl-isforzi tagħhom biex joqorbu lejn l-UE. Ser inkomplu nibnu fuq l-impenn komuni tagħna u nħabirku b'mod attiv għall-kontinwazzjoni kredibbli tal-proċess ta' tkabbir. L-isfidi li qed jiffaċċaw il-Balkani tal-Punent huma wkoll l-isfidi li qed tiffaċċa l-UE, u huwa kruċjali li nindirizzawhom flimkien, peress li aħna naqsmu r-responsabbiltà għall-futur komuni tagħna.
Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja
Id-diskussjoni saret fid-dawl tal-komunikazzjoni annwali tal-Komunikazzjoni tal-Kummissjoni dwar il-politika ta' tkabbir tal-UE u r-rapporti dwar il-Montenegro, is-Serbja, it-Turkija, ir-Repubblika tal-Maċedonja ta' Fuq, l-Albanija, il-Bożnija-Ħerzegovina u l-Kosovo*.
Il-Kunsill evalwa l-progress li sar u vvaluta s-sitwazzjoni f'kull wieħed mill-pajjiżi kandidati u kandidati potenzjali, stabbilixxa linji gwida dwar il-prijoritajiet ta' riforma, u afferma mill-ġdid l-impenn tal-Kunsill għall-politika ta' tkabbir tal-Unjoni.
Fil-marġini tal-Kunsill Affarijiet Ġenerali, saru Konferenzi Intergovernattivi mal-Montenegro u s-Serbja fit-13 u l-14 ta' Diċembru.
Il-Kunsill Affarijiet Ġenerali kellu skambju ta' fehmiet dwar l-abbozz ta' konklużjonijiet bi tħejjija għal-laqgħa tal-mexxejja fis-16 ta' Diċembru fi Brussell. Il-Kunsill Ewropew ser jiddiskuti l-iżviluppi relatati mal-COVID-19, l-immaniġġar tal-kriżijiet u r-reżiljenza, il-prezzijiet tal-enerġija, is-sigurtà u d-difiża, il-migrazzjoni u s-sitwazzjoni fil-Belarussja u l-Ukrajna.
Dwar il-COVID-19, huma mistennija jiddiskutu s-sitwazzjoni epidemjoloġika attwali tal-pandemija u l-emerġenza ta' varjant ġdid tal-COVID-19, inkluż is-sitwazzjoni tat-tilqim u l-isforzi ta' koordinazzjoni.
Il-mexxejja tal-UE ser jiddiskutu wkoll id-dimensjoni esterna tal-migrazzjoni.
Il-Kunsill Ewropew ser jipprovdi gwida dwar l-abbozz ta' Boxxla Strateġika, li għandu l-għan li jipprovdi viżjoni strateġika komuni għas-sigurtà u d-difiża tal-UE u li ġie ppreżentat fid-9 ta' Novembru 2021.
Il-kwistjonijiet li ġejjin ser ikunu wkoll fuq l-aġenda: il-maniġġar ta' kriżijiet u r-reżiljenza, wara l-adozzjoni tal-konklużjonijiet mill-Kunsill Affarijiet Ġenerali fit-23 ta' Novembru 2021; l-iżvilupp fil-prezzijiet tal-enerġija fid-dawl tar-rapporti preliminari mħejjija mill-Aġenzija għall-Kooperazzjoni tar-Regolaturi tal-Enerġija (ACER) u l-Awtorità Ewropea tat-Titoli u s-Swieq (ESMA).
Il-mexxejja mistennija jiddiskutu s-sitwazzjoni fil-fruntiera tal-UE mal-Belarussja u l-fruntiera tar-Russja mal-Ukrajna, kif ukoll jevalwaw it-tħejjijiet għas-Summit bejn l-UE u l-Unjoni Afrikana fis-17 u t-18 ta' Frar 2022.
Il-presidenza infurmat lill-ministri dwar is-sitwazzjoni attwali fir-rigward tal-Konferenza dwar il-Futur tal-Ewropa, filwaqt li indikat l-isfidi li rriżultaw mis-sitwazzjoni epidemjoloġika attwali.
Il-Konferenza dwar il-Futur tal-Ewropa kienet waħda mill-prijoritajiet ċari tagħna u parti kbira minnha saret matul il-Presidenza Slovena tal-Kunsill. Iffaċċjajna sitwazzjoni epidemjoloġika diffiċli, iżda għamilna l-almu tagħna biex xorta npoġġu liċ-ċittadini fiċ-ċentru ta' dan il-proċess u niżguraw li leħinhom jinstema'. Ninsabu kuntenti li wasalna fi stadju fejn l-enfasi issa hija kompletament fuq is-sustanza fejn iċ-ċittadini jagħtu l-ewwel rakkomandazzjonijiet tagħhom u li inkludejna s-sħab tagħna tal-Balkani tal-Punent fil-Plenarja.
Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja
Is-sessjoni plenarja li jmiss tal-Konferenza mistennija ssir f'Jannar.
Il-ministri eżaminaw is-sitwazzjoni attwali rigward l-istat tad-dritt fil-Polonja, bħala parti mill-proċedura tal-Artikolu 7(1) TUE.
Seħħew żviluppi sinifikanti mill-aħħar seduta ta' smigħ tal-Polonja fil-Kunsill Affarijiet Ġenerali f'Ġunju li għadda. Il-Kummissjoni pprovdiet lill-ministri b'aġġornament u l-Polonja ppreżentat il-kummenti tagħha.
Il-presidenza Franċiża li jmiss ħabbret l-intenzjoni tagħha li torganizza seduta ta' smigħ formali matul il-mandat tagħha fl-ewwel nofs tas-sena d-dieħla.
Il-proċedura tal-Artikolu 7(1) TUE skattat għall-Polonja fl-20 ta' Diċembru 2017 meta l-Kummissjoni ppubblikat il-proposta motivata tagħha dwar l-istat tad-dritt fil-Polonja.
Il-Kunsill evalwa wkoll is-sitwazzjoni rigward ir-rispett għall-valuri tal-UE fl-Ungerija, bħala parti mill-proċedura tal-Artikolu 7(1) TUE.
Seħħew żviluppi sinifikanti fil-każ tal-Ungerija mill-aħħar seduta ta' smigħ fil-Kunsill Affarijiet Ġenerali f'Ġunju li għadda. Il-Kummissjoni pprovdiet lill-ministri b'aġġornament u l-Ungerija ppreżentat il-kummenti tagħha.
Il-presidenza Franċiża li jmiss ħabbret l-intenzjoni tagħha li torganizza seduta ta' smigħ formali matul il-mandat tagħha fl-ewwel nofs tas-sena d-dieħla.
Il-proċedura li tikkonċerna l-Ungerija skattat fit-12 ta' Settembru 2018 meta l-plenarja tal-Parlament Ewropew adottat riżoluzzjoni bi proposta motivata li titlob lill-Kunsill jiddetermina jekk kienx hemm riskju ċar ta' ksur serju mill-Ungerija tal-valuri msemmija fl-Artikolu 2 TUE.
L-Aġenzija tal-UE għad-Drittijiet Fundamentali ppreżentat ir-rapport "Antisemitism: overview of antisemitic incidents recorded in the European Union 2010-2020" (Antisemitiżmu: ħarsa ġenerali lejn l-inċidenti antisemitiċi rreġistrati fl-Unjoni Ewropea bejn l-2010 u l-2020), maħruġ fid-9 ta' Novembru.
Il-presidenza Slovena u l-presidenza Franċiża li jmiss ippreżentaw il-Pjan Direzzjonali tas-Semestru Ewropew 2022, wara l-pubblikazzjoni tal-pakkett tal-ħarifa mill-Kummissjoni fl-24 ta' Novembru.
Id-dokument ċentrali ta' dan il-pakkett huwa l-Istħarriġ Annwali dwar it-Tkabbir Sostenibbli (ASGS), li għal darb'oħra din is-sena ġie ppubblikat flimkien mal-pakkett li fadal: il-Proposta għal Rapport Konġunt dwar l-Impjiegi, ir-Rakkomandazzjoni dwar iż-żona tal-euro, ir-Rapport dwar il-Mekkaniżmu ta' Twissija, u l-opinjoni dwar l-abbozzi ta' pjanijiet baġitarji għall-istati membri taż-żona tal-euro.
L-objettiv tal-Pjan Direzzjonali huwa li jiżgura li l-konfigurazzjonijiet rilevanti kollha tal-Kunsill u l-korpi preparatorji tagħhom jaħdmu b'mod koordinat u konsistenti lejn it-tħejjija tal-Kunsill Ewropew.
Il-ministri approvaw id-Dikjarazzjoni Konġunta dwar il-prijoritajiet leġiżlattivi tal-UE għall-2022 matul seduta pubblika.
Wara l-approvazzjoni tad-Dikjarazzjoni Konġunta mill-Kunsill, il-presidenti tat-tliet istituzzjonijiet ser jiffirmawha fil-marġini tal-Kunsill Ewropew ta' Diċembru.
Il-ministri approvaw ukoll il-programm ta' tmintax-il xahar tal-Kunsill (1 ta' Jannar 2022 - 30 ta' Ġunju 2023).
Franza ser ikollha l-presidenza b'rotazzjoni tal-Kunsill minn Jannar sa Ġunju 2022, iċ-Ċekja minn Lulju sa Diċembru 2022 u l-Iżvezja minn Jannar sa Ġunju 2023.
Il-Kunsill adotta wkoll mingħajr diskussjoni il-punti li dehru fil-lista ta' punti A mhux leġiżlattivi.
* Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-opinjoni tal-QIĠ dwar id-dikjarazzjoni tal-indipendenza tal-Kosovo.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Ninsab kuntent li flimkien mal-ministri u s-segretarji tal-istat sħabna qbilna b'mod unanimu dwar il-konklużjonijiet tal-Kunsill dwar it-tkabbir u l-proċess ta' stabbilizzazzjoni u ta' assoċjazzjoni. Is-Slovenja, bħala l-Presidenza tal-Kunsill, ilha taħdem biex tagħti spinta ġdida lit-tkabbir tal-UE u appoġġat lill-pajjiżi tal-Balkani tal-Punent fl-isforzi tagħhom biex joqorbu lejn l-UE. Ser inkomplu nibnu fuq l-impenn komuni tagħna u nħabirku b'mod attiv għall-kontinwazzjoni kredibbli tal-proċess ta' tkabbir. L-isfidi li qed jiffaċċaw il-Balkani tal-Punent huma wkoll l-isfidi li qed tiffaċċa l-UE, u huwa kruċjali li nindirizzawhom flimkien, peress li aħna naqsmu r-responsabbiltà għall-futur komuni tagħna.
