"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri kellhom l-ewwel skambju ta' fehmiet dwar il-Kunsill Ewropew tas-16 u s-17 ta' Diċembru, meta l-mexxejja ser jerġgħu jiddiskutu l-koordinazzjoni tar-rispons għall-pandemija tal-COVID-19 u jieħdu kont tal-ħidma li saret fil-Kunsill dwar it-tisħiħ tat-tħejjija kollettiva tagħna, il-kapaċità ta' rispons u r-reżiljenza għal kriżijiet futuri.
Il-Kunsill Ewropew ser jerġa' jħares ukoll lejn l-iżviluppi fil-prezzijiet tal-enerġija kif maqbul f'Ottubru.
Wara l-ikla informali f'Brdo u l-laqgħa tal-Kunsill Affarijiet Barranin, il-mexxejja ser jipprovdu gwida dwar l-abbozz ta' Boxxla Strateġika u l-kooperazzjoni bejn l-UE u n-NATO.
Huma ser iħejju s-Summit UE-UA f'konformità mal-Aġenda tal-Mexxejja.
Is-sitwazzjoni tal-migrazzjoni kif ukoll l-iżviluppi fil-fruntiera mal-Belarussja ser jinżammu taħt rieżami mill-qrib u l-mexxejja ser jerġgħu lura għal dawn il-kwistjonijiet fil-livell tal-Kunsill Ewropew kif meħtieġ.
Konklużjonijiet dwar ir-reżiljenza u r-rispons għall-kriżijiet
Il-ministri approvaw konklużjonijiet dwar it-tisħiħ tat-tħejjija, il-kapaċità ta' rispons u r-reżiljenza għal kriżijiet futuri.
Bdejna naħdmu biex insaħħu l-istat ta' tħejjija tal-UE għall-kriżijiet fl-ewwel jum tal-presidenza tagħna. Il-konklużjonijiet tal-lum maqbula mill-istati membri huma pass importanti 'l quddiem fit-triq komuni tagħna biex nibnu Ewropa aktar reżiljenti flimkien.
Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja
Il-Kunsill Ewropew ta' Ġunju stieden lill-presidenza biex tmexxi 'l quddiem il-ħidma fil-Kunsill biex jissaħħu l-istat tat-tħejjija, il-kapaċità ta' rispons u r-reżiljenza kollettivi tal-Unjoni għal kriżijiet futuri u biex jitħares il-funzjonament tas-suq intern.
Fil-laqgħa informali tagħhom f'Brdo pri Kranju fit-23 ta' Lulju, il-ministri għall-Affarijiet Ewropej kellhom diskussjoni dwar it-tisħiħ tar-reżiljenza tal-Unjoni u appoġġaw l-isforzi tal-presidenza Slovena lejn rispons aktar komprensiv għall-kriżijiet.
Il-presidenza kkonkludiet li hija ser tħejji konklużjonijiet għall-Kunsill Affarijiet Ġenerali fid-dawl tad-dibattitu tal-ministri.
Inħoloq Grupp ta' Ħidma ad hoc biex iħejji speċifikament abbozz ta' konklużjonijiet tal-Kunsill.
Tkabbir u l-proċess ta' stabilizzazzjoni u ta' assoċjazzjoni
Il-ministri ħadu kont tas-sitwazzjoni attwali u kellhom skambju ta' fehmiet dwar it-tkabbir u l-proċess ta' stabbilizzazzjoni u ta' assoċjazzjoni. Il-presidenza ssottolinjat l-importanza li jitkompla t-tkabbir u l-proċess ta' stabbilizzazzjoni u ta' assoċjazzjoni.
Hija l-prijorità tagħna bħala presidenza li nippruvaw immexxu 'l quddiem it-tkabbir u l-proċess ta' stabbilizzazzjoni u ta' assoċjazzjoni. Il-politika tat-tkabbir tal-UE hija l-politika ewlenija li għandha setgħa trasformattiva fir-reġjun tal-Balkani tal-Punent. Huwa għalhekk li l-progress fit-triq lejn l-UE għandu jiġi sfruttat.
Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja
L-iskambju fost il-ministri sar wara s-Summit tal-Balkani tal-Punent, il-pubblikazzjoni tal-pakkett tat-tkabbir mill-Kummissjoni u d-diskussjonijiet fil-Kunsill Affarijiet Barranin dwar il-Balkani tal-Punent.
Il-ministri rriflettew dwar kif l-aħjar imexxu t-tkabbir 'il quddiem.
Il-Kunsill laħaq ftehim fl-aħħar semestru dwar l-applikazzjoni tal-metodoloġija msaħħa tat-tkabbir għall-Montenegro u għas-Serbja, li jagħmilha possibbli li jsiru l-ewwel konferenzi intergovernattivi "politiċi" maż-żewġ pajjiżi f'Ġunju.
F'Settembru wkoll il-Kunsill ta l-approvazzjoni finali għal kważi €14.2 biljun ta' assistenza finanzjarja ta' qabel l-adeżjoni għall-perjodu 2021–2027 favur is-sħab tal-Balkani tal-Punent u t-Turkija.
Il-ministri kellhom diskussjoni speċifika għall-pajjiż fil-qafas tad-djalogu annwali dwar l-istat tad-dritt b'enfasi fuq is-sitwazzjoni fil-Kroazja, l-Italja, Ċipru, il-Latvja u l-Litwanja. Dan kien it-tielet ċiklu ta' diskussjonijiet speċifiċi għall-pajjiż wara dawk f'Novembru 2020 u April 2021.
L-istat tad-dritt huwa pedament u dak li jiggarantixxi d-drittijiet u l-libertajiet tagħna. Din id-diskussjoni ppermettiet li niffaċċaw sfidi qabel ma jsiru problematiċi. Aħna żammejna l-impenn tagħna li nagħmlu d-djalogu dwar l-istat tad-dritt aktar b'saħħtu u aktar strutturat, filwaqt li nirrispettaw bis-sħiħ il-prinċipji tal-oġġettività, in-nondiskriminazzjoni u t-trattament ugwali tal-istati membri kollha. Din id-diskussjoni speċifika għall-pajjiż hija opportunità għalina lkoll biex naqsmu l-aħjar prattiki.
Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja
Il-ministri ddedikaw madwar nofs siegħa għal kull wieħed mill-ħames stati membri, billi bdew b'introduzzjoni qasira mill-Kummissjoni bbażata fuq l-astratti u s-sejbiet ewlenin tal-kapitolu rispettiv speċifiku għall-pajjiż tar-rapport tagħha dwar l-istat tad-dritt tal-2021. Imbagħad, kull waħda mill-ħames delegazzjonijiet ippreżentat l-iżviluppi ewlenin u l-aspetti partikolari tal-qafas nazzjonali tal-istat tad-dritt tagħha. Dan kien segwit minn sensiela ta' kummenti li fihom delegazzjonijiet oħra qasmu l-esperjenzi u l-aħjar prattiki tagħhom fir-rigward tal-iżviluppi msemmija.
Il-ministri għall-affarijiet Ewropej kellhom diskussjoni dwar ir-relazzjonijiet bejn l-UE u r-Renju Unit. Huma ffukaw b'mod partikolari fuq it-taħditiet li għaddejjin mar-Renju Unit rigward soluzzjonijiet prattiċi fil-Protokoll dwar l-Irlanda/l-Irlanda ta' Fuq biex jiġu indirizzati d-diffikultajiet li qed jesperjenzaw in-nies fl-Irlanda ta' Fuq.
Il-Viċi President tal-Kummissjoni Ewropea Maroš Šefčovič aġġorna lill-ministri dwar l-aħħar żviluppi, inkluż il-laqgħa tiegħu ma' David Frost fid-19 ta' Novembru, u l-ministri tennew l-appoġġ tagħhom għall-approċċ tal-Kummissjoni Ewropea.
L-UE tenfasizza l-ħtieġa li ssir bidla għal mod orjentat lejn ir-riżultati u li jitwettqu l-kwistjonijiet imqajma mill-partijiet ikkonċernati tal-Irlanda ta' Fuq. Huwa essenzjali li l-bidla reċenti fit-ton issa twassal għal soluzzjonijiet tanġibbli konġunti fil-qafas tal-Protokoll. Il-presidenza enfasizzat ukoll li l-għaqda fost l-istati membri tibqa' pedament tar-relazzjonijiet u n-negozjati tal-UE mar-Renju Unit.
Il-Kummissjoni ppreżentat il-programm ta' ħidma tagħha għall-2022. Dan il-kontribut ser jikkontribwixxi għall-iżvilupp tad-dikjarazzjoni konġunta dwar il-prijoritajiet leġiżlattivi għall-2022 li ser jintlaħaq qbil dwarhom mit-tliet istituzzjonijiet aktar tard din is-sena.
Fl-2016, il-Kunsill, il-Parlament Ewropew, u l-Kummissjoni qablu li jsaħħu l-programmazzjoni annwali u pluriennali tal-Unjoni permezz tal-Ftehim Interistituzzjonali dwar it-Tfassil Aħjar tal-Liġijiet.
Skont dan il-ftehim, il-Kummissjoni għandha tidħol fi djalogu mal-Kunsill u mal-Parlament, kemm qabel kif ukoll wara l-adozzjoni tal-programm ta' ħidma annwali tagħha.
Il-Kunsill adotta l-baġit tal-UE għall-2022 wara qbil li ntlaħaq mal-Parlament Ewropew fis-16 ta' Novembru 2021. Il-baġit tas-sena d-dieħla jistabbilixxi l-impenji totali għal €169.5 biljun u l-pagamenti għal €170.6 biljun. Il-baġit tas-sena d-dieħla jirrifletti b'mod qawwi l-prijoritajiet ewlenin tal-UE: l-irkupru ekonomiku, il-ġlieda kontra t-tibdil fil-klima, u t-tranżizzjonijiet ekoloġiċi u diġitali. Dan iħalli wkoll biżżejjed riżorsi taħt il-limiti massimi tan-nefqa tal-qafas finanzjarju pluriennali 2021-2027 biex l-UE tkun tista' tirreaġixxi għal ħtiġijiet imprevedibbli.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Bdejna naħdmu biex insaħħu l-istat ta' tħejjija tal-UE għall-kriżijiet fl-ewwel jum tal-presidenza tagħna. Il-konklużjonijiet tal-lum maqbula mill-istati membri huma pass importanti 'l quddiem fit-triq komuni tagħna biex nibnu Ewropa aktar reżiljenti flimkien.
