"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Il-presidenza ppreżentat il-prijoritajiet tagħha fil-qasam tal-Kunsill tal-Affarijiet Ġenerali u l-ministri kellhom skambju ta' fehmiet dwar is-sitwazzjoni tal-istat tad-dritt fl-Ungerija, il-Portugall, ir-Rumanija u s-Slovenja.
Il-presidenza Pollakka nzertat fi żminijiet ta' taqlib. Ir-riskji huma reali, għalhekk ir-responsabbiltajiet tagħna huma serji. Ser naħdmu qatigħ ma' ministri oħra tal-UE f'dan il-Kunsill dwar it-tkabbir, ir-relazzjonijiet bejn l-UE u r-Renju Unit u ser inniedu t-taħditiet dwar il-baġit pluriennali tal-UE. It-tkabbir tal-UE huwa kruċjali u ninsabu ħerqana li naċċelleraw dan il-proċess, kemm fid-direzzjoni tal-Lvant – l-Ukrajna, il-Moldova – kif ukoll fil-Balkani tal-Punent.
Adam Szłapka, Ministru tal-Polonja għall-Unjoni Ewropea
Prijoritajiet tal-presidenza
Il-presidenza Pollakka ppreżentat il-prijoritajiet għall-mandat tagħha. Il-prijorità ewlenija hija s-sigurtà fis-7 dimensjonijiet tagħha: dik esterna, interna, tal-informazzjoni, ekonomika, tal-enerġija, tal-ikel u tas-saħħa. F'dan il-kuntest, il-presidenza Pollakka stabbiliet il-prijoritajiet ġenerali li ġejjin għas-semestru tagħha:
id-difiża u s-sigurtà
il-protezzjoni tan-nies u tal-fruntieri
ir-reżistenza għall-interferenza barranija u d-diżinformazzjoni
l-iżgurar tas-sigurtà u l-libertà tan-negozju
it-tranżizzjoni tal-enerġija
agrikoltura kompetittiva u reżiljenti
is-sigurtà tas-saħħa
Fir-rigward tal-konfigurazzjoni tal-Kunsill Affarijiet Ġenerali, il-ħidma ser tiffoka fuq is-salvagwardja tal-istat tad-dritt, it-tkabbir tal-UE u r-riformi interni, il-ġlieda kontra l-manipulazzjoni tal-informazzjoni u l-interferenza minn barranin, it-tisħiħ tar-reżiljenza demokratika fl-UE u fil-viċinat tagħha, l-iżvilupp tal-kooperazzjoni mar-Renju Unit, u l-istabbiliment ta' bażi għan-negozjati tal-Qafas Finanzjarju Pluriennali (QFP) il-ġdid.
Bħala parti mid-djalogu annwali dwar l-istat tad-dritt, il-ministri kellhom skambju estensiv ta' fehmiet dwar is-sitwazzjoni tal-istat tad-dritt fl-Ungerija, il-Portugall, ir-Rumanija u s-Slovenja.
Dan kien il-ħdax-il ċiklu ta' diskussjonijiet speċifiċi għall-pajjiż wara dawk li saru f'Novembru 2020, April u Novembru 2021, April u Diċembru 2022, Marzu u Ottubru 2023, u Jannar, Mejju, u Novembru 2024.
Matul id-dibattitu u għal kull stat membru, il-Kummissjoni ppreżentat is-sejbiet ewlenin tal-kapitolu speċifiku għall-pajjiż rispettiv fir-rapport tagħha tal-2024 dwar l-istat tad-dritt. L-istat membru kkonċernat imbagħad ippreżenta żviluppi nazzjonali ewlenin u aspetti partikolari tal-qafas nazzjonali tal-istat tad-dritt tiegħu. Dan kien segwit minn sensiela ta' kummenti u mistoqsijiet li fihom delegazzjonijiet oħra kellhom l-opportunità li jaqsmu l-esperjenzi u l-aħjar prattiki tagħhom fir-rigward tal-iżviluppi msemmija.
Diskussjoni oħra speċifika għall-pajjiż hija mistennija li ssir fil-Kunsill Affarijiet Ġenerali tas-27 ta' Mejju 2025 li tiffoka fuq is-Slovakkja, il-Finlandja, l-Iżvezja u l-Belġju.
Id-delegazzjoni Franċiża qajmet il-kwistjoni tal-integrità tal-proċessi elettorali fl-Ewropa, b'mod partikolari fil-kuntest ta' theddida dejjem akbar ta' interferenza barranija.
Id-delegazzjoni Ċeka ppreżentat dokument informali li jissottolinja l-importanza li tkompli tavvanza l-integrazzjoni gradwali tal-Ukrajna u tal-Moldova fis-suq uniku tal-UE.
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
