Sustanzi kimiċi

L-aħħar aħbarijiet

Fis-17 ta' Ġunju 2026, il-Kunsill u l-Parlament Ewropew laħqu ftehim proviżorju dwar is-simplifikazzjoni tar-regoli relatati mal-klassifikazzjoni, l-imballaġġ ut-tikkettar tas-sustanzi kimiċi, il-prodotti kożmetiċi u l-prodotti fertilizzanti.

Il-ftehim inaqqas il-piżijiet amministrattivi bla bżonn, jappoġġa l-innovazzjoni u ċ-ċirkolarità, u jżomm standards għolja ta' protezzjoni tal-konsumaturi u tal-ambjent.

Dawk id-dispożizzjonijiet huma l-parti li fadal tal-pakkett "Omnibus VI", li jissimplifika r-regoli fil-qasam tal-prodotti kimiċi, filwaqt li jinżamm livell għoli ta' protezzjoni għall-konsumaturi u l-ambjent.

REACH

Mill-2007, ir-regolament Ewropew dwar ir-reġistrazzjoni, l-evalwazzjoni, l-awtorizzazzjoni u r-restrizzjoni ta' sustanzi kimiċi (REACH) stabbilixxa proċeduri għall-ġbir u l-valutazzjoni tal-informazzjoni dwar il-proprjetajiet u l-perikli tas-sustanzi kimiċi, minn dawk użati fil-proċessi industrijali għal dawk fil-ħajja tagħna ta' kuljum (żebgħa, ħwejjeġ, oġġetti tal-plastik).

Il-kumpaniji kollha li jimmanifatturaw, jimportaw, jiddistribwixxu jew jużaw sustanzi kimiċi bħala materja prima jew prodotti lesti jridu:

jirreġistraw dawn is-sustanzi mal-Aġenzija Ewropea għas-Sustanzi Kimiċi (ECHA)
jidentifikaw u jimmaniġġaw ir-riskji marbuta ma' dawn is-sustanzi

Wara li jevalwaw l-informazzjoni riċevuta, l-ECHA u l-istati membri jistgħu jirrestrinġu jew jipprojbixxu l-użu ta' sustanzi speċifiċi jekk ir-riskji involuti ma jkunux jistgħu jiġu ġestiti.

Klassifikazzjoni, imballaġġ u tikkettar

Mill-2009, ir-regolament dwar il-klassifikazzjoni, it-tikkettar u l-imballaġġ tas-sustanzi kimiċi żgura li l-kumpaniji jistgħu jiddeskrivu u jittikkettaw is-sustanzi kimiċi perikolużi tagħhom bl-użu tal-istess kriterji fl-istati membri kollha tal-UE qabel ma jqegħduhom fis-suq.

F'Ottubru 2024, il-Kunsill adotta regoli ġodda biex:

jiċċaraw it-tikkettar għas-sustanzi kimiċi
itejbu il-proċeduri biex tingħata informazzjoni dwar il-perikli relatati mas-sustanzi kimiċi introdotti fis-suq tal-UE
iħaffu l-proċedura biex jiġu identifikati sustanzi perikolużi
jinkludu rekwiżiti speċifiċi għal prodotti kimiċi li jistgħu jerġgħu jimtlew

Fis-17 ta' Novembru 2025, il-Kunsill ta l-approvazzjoni finali tiegħu għall-posponiment tar-regoli dwar ir-regolament CLP. Dan il-mekkaniżmu ta' posponiment jipposponi d-data tal-applikazzjonijiet għar-regolament għall-1 ta' Jannar 2028.

Fis-16 ta' Ġunju 2026, il-koleġiżlaturi qablu li jipposponu d-data tal-applikazzjoni tar-regoli tas-CPL għall-1 ta' Jannar 2030. Huma qablu wkoll dwar:

is-simplifikazzjoni tar-regoli tat-tikkettar, billi jiġu bbażati fuq kriterji ġenerali ta' leġġibbiltà aktar milli fuq speċifikazzjonijiet dettaljati, bl-eċċezzjoni unika ta' daqs minimu speċifiku tat-tipa għall-prodotti mmirati lejn il-pubbliku ġenerali
derogi speċifiċi tat-tikkettar għall-imballaġġ żgħir
l-estensjoni tal-perjodu tranżitorju għall-obbligi tat-tikkettar mill-ġdid meta s-sustanzi fil-prodotti jiġu kklassifikati mill-ġdid għal livell ogħla ta' periklu, biex jitnaqqsu l-kostijiet ta' konformità għall-industrija

Sustanzi kimiċi: il-Kunsill jadotta regolament dwar il-klassifikazzjoni, it-tikkettar u l-imballaġġ (stqarrija għall-istampa, 14 ta' Ottubru 2024)

Sustanzi kimiċi speċifiċi

Fertilizzanti

Minn Lulju 2022, ir-regolament dwar il-prodotti fertilizzanti żgura li l-prodotti fertilizzanti tal-UE (eż. fertilizzanti, tejjieba tal-ħamrija, materjali għat-tkabbir) li jkollhom il-"markatura CE" jistgħu jinbiegħu liberament madwar l-UE kollha wara li jissodisfaw rekwiżiti speċifiċi.

Ir-regoli, fost affarijiet oħra:

jistabbilixxu limiti armonizzati għal firxa ta' kontaminanti, bħall-kadmju, li jinsabu f'fertilizzanti minerali
għandhom l-għan li jagħtu spinta lill-produzzjoni u l-użu ta' fertilizzanti organiċi

Fit-22 ta' Lulju 2024, il-Kunsill adotta regolament għat-tikkettar diġitali għall-prodotti fertilizzanti tal-UE.

Ir-regolament għandu l-għan li jtejjeb il-leġġibbiltà tat-tikketti, li jwassal għal użu aktar effiċjenti tal-fertilizzanti, u li jissimplifika l-obbligi tat-tikkettar għall-fornituri.

Ir-regoli l-ġodda ser:

jippromwovu l-użu usa' tat-tikkettar diġitali
itejbu l-informazzjoni disponibbli għall-bdiewa u għal konsumaturi oħra, inkluż gruppi vulnerabbli jew persuni b'kompetenzi diġitali limitati
inaqqsu l-ispejjeż u l-impronta ambjentali tal-produtturi

Deterġenti

Mill-2005, ir-regolament dwar id-deterġenti stabbilixxa r-regoli li d-deterġenti jeħtieġ li jikkonformaw magħhom sabiex jiġu introdotti fis-suq intern u jiċċaqilqu liberament fih. Jeħtieġ li dawn:

ikun fihom sapun li huwa kompletament bijodegradabbli
jindikaw l-informazzjoni dwar l-ingredjent u d-dożaġġ fuq it-tikketta tagħhom

Fit-8 ta' Diċembru 2025, il-Kunsill ta l-approvazzjoni finali tiegħu għal regoli ġodda tal-UE biex id-deterġenti jsiru aktar sikuri għan-nies u għall-ambjent.

Il-leġiżlazzjoni l-ġdida:

iżżid il-bijodegradabbiltà tal-aġenti tensjoattivi fid-deterġenti, b'mod partikolari fir-riti li jiksu l-kapsuli
tgħin fit-tnaqqis ta' sustanzi li jagħmlu l-ħsara
ittejjeb l-informazzjoni fuq it-tikketti (pereżempju billi jiġu inklużi l-fwejjaħ allerġeniċi u l-preservattivi), u jagħmel l-informazzjoni mill-manifatturi disponibbli għall-awtoritajiet u għall-persunal mediku
tintroduċi t-tikkettar diġitali u l-passaport diġitali tal-prodotti għad-deterġenti u l-aġenti tensjoattivi
tipprojbixxi l-ittestjar fuq l-annimali għad-deterġenti u l-aġenti tensjoattivi
tinkoraġġixxi prattiki ġodda sostenibbli bħall-bejgħ ta’ rikariki ta’ deterġenti

Fis-16 ta' Ġunju 2026, il-koleġiżlaturi qablu li jipposponu d-data tal-applikazzjoni tar-regolament dwar il-fertilizzanti għall-1 ta' Jannar 2030. Huma fasslu wkoll emendi addizzjonali rigward ir-reġistrazzjoni u l-awtorizzazzjoni tal-komponenti tal-fertilizzanti, u inkarigaw lill-Kummissjoni biex tesplora kriterji ġodda għar-reġistrazzjoni ta' materjali li jistgħu jintużaw fil-fertilizzanti, sabiex tiġi appoġġata l-innovazzjoni fis-settur.

Il-protezzjoni tal-konsumatur u l-ambjent: il-Kunsill japprova r-regolament dwar id-deterġenti u l-aġenti tensjoattivi (stqarrija għall-istampa, 8 ta' Diċembru 2025)

Kożmetiċi

Ir-regolament dwar il-kożmetiċi ilu mill-2013 jiżgura s-sikurezza tal-prodotti kożmetiċi (eż. it-toothpaste, il-fwieħa, prodotti għall-protezzjoni mix-xemx) introdotti fis-suq tal-UE, filwaqt li jippromwovi l-innovazzjoni fis-settur.

Ir-regoli tal-UE, fost affarijiet oħra:

jeħtieġu r-reġistrazzjoni tal-prodotti kożmetiċi kollha introdotti fis-suq tal-UE
jagħtu attenzjoni speċjali fuq ċerti prodotti kożmetiċi (eż. interferenti endokrinali, prodotti taż-żebgħa tax-xagħar) b'riskju akbar għas-saħħa jew b'kumplessità xjentifika akbar
jistabbilixxu projbizzjoni globali għall-ittestjar fuq l-annimali għal skopijiet kożmetiċi

Fis-16 ta' Ġunju 2026, il-koleġiżlaturi qablu dwar:

l-adattament tat-tul tal-perjodi tranżizzjonali għat-tneħħija gradwali tas-sustanzi karċinoġeniċi, mutaġeniċi jew tossiċi għar-riproduzzjoni (CMR) b'mod proporzjonali għar-riskji sottostanti tagħhom
il-ħtieġa għal gwida tal-Kummissjoni dwar sustanzi alternattivi li jistgħu jissostitwixxu sustanza CMR fi prodott
iż-żamma tan-notifika estensiva għan-nanomaterjali fil-prodotti kożmetiċi, li trid tintbagħat qabel l-introduzzjoni fis-suq

Kożmetiċi (Kummissjoni Ewropea)

Materjal organiku persistenti u li jniġġes

Materjal organiku persistenti li jniġġes (POPs) jikkonsisti minn sustanzi partikolarment dannużi. Dawn jistgħu jinstabu fi skart li ġej minn xi prodotti għall-konsumatur bħal tessuti reżistenti għall-ilma, għamara, plastik u tagħmir elettroniku.

Biex tintlaħaq ekonomija ċirkolari, fejn l-iskart ser jintuża dejjem aktar bħala materja prima sekondarja, huwa essenzjali li jiġu stabbiliti limiti ġodda għall-preżenza ta' POPs fl-iskart.

Il-Kunsill adotta regolament għal dan l-għan f'Ottubru 2022.

Il-Kunsill jadotta formalment aktar restrizzjonijiet għal ''sustanzi kimiċi ta' dejjem'' fl-iskart (stqarrija għall-istampa, 24 ta' Ottubru 2022)

Strateġija dwar is-sustanzi kimiċi

L-industrija tal-kimika hija r-raba' l-akbar settur tal-manifattura fl-UE, b'29 000 kumpanija jipprovdu 1.2 miljun impjieg dirett u jappoġġaw 19-il miljun impjieg tul il-ktajjen tal-provvista.

F'Marzu 2021, il-Kunsill adotta konklużjonijiet li japprovaw l-istrateġija tal-UE dwar is-sustanzi kimiċi għas-sostenibbiltà ppreżentata mill-Kummissjoni.

L-istrateġija tistabbilixxi viżjoni fit-tul għall-politika tal-UE dwar is-sustanzi kimiċi biex tgħin lill-UE u l-istati membri tagħha:

jipproteġu aħjar is-saħħa tal-bniedem
isaħħu l-kompetittività tal-industrija tal-kimika
jappoġġaw ambjent ħieles mis-sustanzi tossiċi

L-istrateġija tinkludi wkoll regoli dwar il-pakkett "sustanza waħda, valutazzjoni waħda", li l-Kunsill adotta fit-13 ta' Novembru 2025. Ir-regoli ser jissimplifikaw il-valutazzjonijiet tas-sikurezza dwar is-sustanzi kimiċi u b'hekk jagħmluha aktar faċli li tiġi kondiviża d-data, jiġu identifikati r-riskji u tiġi xprunata l-innovazzjoni lejn sustanzi kimiċi sikuri u sostenibbli. Dan, min-naħa tiegħu, ser jipproteġi aħjar saħħet in-nies u l-ambjent minn sustanzi kimiċi ta' ħsara.