"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill adotta l-14-il pakkett ta' miżuri restrittivi ekonomiċi u individwali immirati lejn setturi ta' valur għoli tal-ekonomija Russa u li jagħmluha aktar diffiċli biex jiġu evitati s-sanzjonijiet tal-UE.
Il-Kunsill Affarijiet Barranin imbagħad iddiskuta l-aggressjoni Russa kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna Dmytro Kuleba, li aġġorna lill-kontropartijiet tiegħu tal-UE dwar l-aħħar żviluppi fuq il-post u l-ħtiġijiet l-aktar urġenti tal-Ukrajna.
Id-diskussjoni li segwiet iffokat fuq l-appoġġ militari tal-UE lill-Ukrajna.
Jeħtieġ li nipprovdu lill-Ukrajna b'aktar difiżi tal-ajru, b'aktar munizzjon u b'aktar appoġġ għall-iżvilupp tal-kapaċitajiet industrijali tagħha. Putin qed ikompli jattakka, u jimmira prinċipalment lejn l-infrastruttura tal-enerġija. Huwa ċar li Putin irid jagħti prova li l-Ukrajna hija vulnerabbli, u aħna rridu nagħtu prova li ser nappoġġaw lill-Ukrajna.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-ministri laqgħu d-deċiżjoni adottata l-ġimgħa li għaddiet dwar l-użu ta' profitti mhux mistennija minn assi Russi immobilizzati, li ser jiġu allokati għall-Faċilità Ewropea għall-Paċi. Dan ser jippermetti l-operazzjonalizzazzjoni rapida tal-profitti mhux mistennija li jirriżultaw mill-assi Russi immobilizzati fl-Ewropa bħala riżultat tal-miżuri restrittivi għall-benefiċċju tal-Ukrajna. Dan għandu jammonta għal €1.4 biljun disponibbli matul ix-xahar li jmiss.
Ir-Rappreżentant Għoli enfasizza li l-Kunsill kien qed jiffinalizza l-impenji ta' sigurtà tal-UE lill-Ukrajna, u li b'tali deċiżjoni l-UE ser tibgħat messaġġ ċar lir-Russja dwar id-determinazzjoni tagħha li tkompli tappoġġa lill-Ukrajna.
Is-sitwazzjoni fil-Lvant Nofsani
Il-Kunsill Affarijiet Barranin iddiskuta l-iżviluppi fil-Lvant Nofsani, b'enfasi fuq is-sitwazzjoni fuq il-post, inkluż is-sitwazzjoni umanitarja f'Gaża u t-tbatija tal-ostaġġi.
Ir-Rappreżentant Għoli enfasizza li tliet ġimgħat wara li l-President tal-Istati Uniti Biden ippreżenta l-pjan direzzjonali tiegħu għal waqfien mill-ġlied u kien irċieva appoġġ internazzjonali qawwi, b'mod partikolari l-appoġġ tal-UE, kien għad ma hemm l-ebda sinjal ta' waqfien possibbli mill-ġlied. Huwa enfasizza wkoll id-diffikultajiet insormontabbli għall-appoġġ umanitarju fin-nuqqas ta' tali waqfien mill-ġlied.
F'dan il-kuntest, il-Kunsill iddiskuta l-appoġġ għall-Awtorità Palestinjana u l-UNRWA, kif ukoll aġenziji oħra tan-NU.
Il-ministri ttrattaw ukoll it-tensjonijiet li qed jiżdiedu fil-fruntiera tat-Tramuntana ta' Iżrael u r-riskju serju ta' tixrid fir-reġjun. Ir-Rappreżentant Għoli esprima appoġġ għall-isforzi attivi ta' medjazzjoni, immexxija mill-Istati Uniti u Franza biex itaffu l-konfrontazzjoni bejn Iżrael u l-Hezbollah, u għal-Libanu u Ċipru li kienu mhedda mill-Hezbollah.
Fl-aħħar nett, il-Kunsill iddiskuta l-appoġġ tal-UE biex tinstab soluzzjoni politika għall-konflitt, u qabel li jsegwi u jintensifika l-kooperazzjoni mas-sħab internazzjonali biex jerġa' jitnieda proċess politiku lejn soluzzjoni ta' żewġ stati. Ġiet diskussa wkoll il-possibbiltà ta' Kunsill ta' Assoċjazzjoni ma' Iżrael.
Il-Balkani tal-Punent
Is-sitt Ministri għall-Affarijiet Barranin mill-pajjiżi sħab tal-Balkani tal-Punent mbagħad ingħaqdu mal-ministri għall-Affarijiet Barranin tal-UE biex ikollhom diskussjoni informali dwar impenn komuni aktar b'saħħtu dwar il-politika estera u ta' sigurtà waqt l-ikla ta' nofsinhar.
Aħna lesti li napprofondixxu aktar l-integrazzjoni gradwali u nespandu l-appoġġ tagħna lis-sħab tal-Balkani tal-Punent. U nistennew li dawn jingħaqdu magħna biex jiddefendu l-ordni internazzjonali bbażata fuq ir-regoli u b'mod partikolari l-Ukrajna, notevolment dwar il-miżuri meħuda sabiex tiġi miġġielda l-invażjoni Russa tal-Ukrajna. L-allinjament tagħhom mal-Politika Estera u ta' Sigurtà Komuni tagħna huwa espressjoni tal-għażla strateġika u l-impenn tagħhom għas-sħubija fl-UE. Iż-żamma ta' rabtiet mill-qrib mar-reġim ta' Putin mhijiex kompatibbli mal-bini ta' futur komuni mal-UE u fi ħdanha.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Georgia
Il-Kunsill Affarijiet Barranin iddiskuta l-Georgia, b'segwitu għall-iskambju ta' fehmiet li sar fil-Kunsill ta' Mejju. Il-Kunsill iddiskuta b'mod partikolari l-iżviluppi politiċi fil-pajjiż, inkluż l-adozzjoni u l-infurzar tal-liġi dwar it-trasparenza tal-influwenza barranija.
Jiddispjaċina li hemm diżinformazzjoni mifruxa dwar l-Unjoni Ewropea u l-valuri tagħha li ġejjin ukoll minn atturi uffiċjali. Smajna l-ilħna mill-Georgia fl-ogħla livell, li b'mod sorprendenti ddikjaraw li din il-liġi qed tqarreb il-pajjiż lejn l-Unjoni Ewropea. U rrid inkun ċar. Le. Din il-liġi u l-iżviluppi negattivi kollha madwarha qed ibiegħdu lill-Georgia mill-Unjoni Ewropea. [...] Ser inżidu l-appoġġ tagħna għas-soċjetà ċivili u l-media, ser niġġieldu d-diżinformazzjoni u nżidu l-appoġġ għall-proċess elettorali.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill iddiskuta modi possibbli ta' azzjoni f'każ ta' deterjorament tas-sitwazzjoni u ser ikompli jissorvelja s-sitwazzjoni u jadatta l-miżuri tal-UE kif meħtieġ.
Ir-reġjun tal-Lagi l-kbar u t-Tuneżija
Il-Kunsill Affarijiet Barranin kellu skambju ta' fehmiet dwar ir-Reġjun tal-Lagi l-Kbar fl-Afrika, inkluż il-kriżi li għaddejja fil-Lvant tar-Repubblika Demokratika tal-Kongo (RDK), u l-implikazzjonijiet reġjonali u ġeopolitiċi tagħha. Ir-Rappreżentant Għoli ħabbar li l-UE dalwaqt ser tinnomina mibgħut speċjali għar-reġjun biex jimplimenta l-istrateġija tal-UE.
Taħt ġrajjiet kurrenti, il-Kunsill ġie infurmat dwar l-iżviluppi politiċi fit-Tuneżija u ddiskuta l-ħtieġa li l-ewwel tiġi vvalutata b'mod kollettiv is-sitwazzjoni, u mbagħad jiġi kkunsidrat kif l-aħjar tiġi ġestita s-sħubija tal-UE mal-pajjiż u jinżamm l-appoġġ tal-UE għall-poplu Tuneżin.
Konklużjonijiet tal-Kunsill
Il-Kunsill approva konklużjonijiet dwar:
- l-Evalwazzjoni ta' Nofs it-Terminu tal-istrument ta' finanzjament estern tal-NDICI-Ewropa Globali
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
