Caidreamh an Aontais leis na Stáit Aontaithe

An trádáil agus an infheistíocht

Ráiteas comhpháirteach ón Aontas Eorpach agus ó na Stáit Aontaithe

Tar éis an ráitis chomhpháirtigh ón Aontas agus ó na Stáit Aontaithe an 21 Lúnasa 2025, ghlac an Chomhairle dhá rialachán go foirmiúil i mí an Mheithimh 2026 lena n-achtaítear laghduithe taraife an Aontais.

Leis na rialacháin, cuirtear deireadh leis na dleachtanna custaim atá ann i gcónaí ar earraí tionsclaíocha de chuid na Stát Aontaithe, tugtar rochtain fhabhrach do tháirgí talmhaíochta áirithe, agus leathnaítear fionraí na ndleachtanna ar allmhairí gliomach (ó gach tír, ní hamháin ó na Stáit Aontaithe). Tá ráillí cosanta treisithe ag gabháil leo chun táirgeoirí, gnólachtaí agus oibrithe an Aontais a chosaint.

Áirítear sna rialacháin sásra coimirce, sásra fionraíochta lena gceadaítear don Aontas freagairt mura n-urramóidh na Stáit Aontaithe a ghealltanais, agus clásal éagtha faoina mbeidh feidhm ag an bpríomhrialachán go dtí deireadh 2029 agus faoina rachaidh an rialachán maidir le gliomaigh in éag i mí Iúil 2030 mura ndéanfar tuilleadh gníomhaíochta.

Tiocfaidh na rialacháin i bhfeidhm an lá tar éis lá a bhfoilsithe san Iris Oifigiúil. Beidh feidhm chúlghabhálach ag an rialachán a bhaineann le hallmhairí gliomach ón 1 Lúnasa 2025.

• An trádáil idir an tAontas agus na Stáit Aontaithe: an Chomhairle agus an Pharlaimint tagtha ar chomhaontú chun gnéithe taraife an ráitis chomhpháirtigh a chur chun feidhme (preaseisiúint, an 20 Bealtaine 2026)
• Ráiteas comhpháirteach ón Aontas Eorpach agus ó na Stáit Aontaithe maidir le comhaontú i ndáil le trádáil chómhalartach, chóir agus chothrom (an Coimisiún Eorpach)
• An trádáil idir an tAontas agus na Stáit Aontaithe: Formheas críochnaitheach tugtha ag an gComhairle maidir leis na gealltanais taraife faoin ráiteas comhpháirteach (preaseisiúint, an 25 Meitheamh 2026)

Infheistíochtaí

Is iad na hinfheistíochtaí frithpháirteacha a dhéanann an tAontas agus na Stáit Aontaithe na hinfheistíochtaí is mó ar domhan agus is spreagadh suntasach iad don chaidreamh trasatlantach. In 2024, os cionn €4.8 trilliún ba luach na n-infheistíochtaí díreacha coigríche frithpháirteacha i stoic. Tá sé sin beagnach cothrom le luach gheilleagair iomlána na Fraince agus na Spáinne le chéile.

As na cuideachtaí uile de chuid an Aontais a infheistíonn thar lear, déanann thart ar aon trian infheistíocht sna Stáit Aontaithe, agus as na hinfheistíochtaí coigríche uile san Aontas, tagann thart ar aon trian ó na Stáit Aontaithe.

Tá infheistíochtaí iomlán na Stát Aontaithe san Aontas tuairim is ceithre huaire níos airde ná i réigiún an Aigéin Chiúin agus na hÁise. Tá infheistíocht dhíreach choigríche an Aontais sna Stáit Aontaithe thart ar dheich n-oiread níos mó ná infheistíocht an Aontais san India agus sa tSín i dteannta a chéile.

Tacaíonn an trádáil agus an infheistíocht dhéthaobhach leis na milliúin post san Aontas agus sna Stáit Aontaithe. Tacaíonn onnmhairí earraí agus seirbhísí na Stát Aontaithe chuig an Aontas le 2.3 milliún post sna Stáit Aontaithe, agus tá 3.4 milliún duine fostaithe in infheistíochtaí chuideachtaí an Aontais sna Stáit Aontaithe.

Fuinneamh

Bhí ról ríthábhachtach ag an dlúthchomhar trasatlantach maidir le slándáil fuinnimh an Aontais a chinntiú tar éis chogadh foghach na Rúise ar an Úcráin. Úsáidtear gás nádúrtha leachtaithe (GNL) ó na Stát Aontaithe in ionad cuid d’allmhairí gáis na Rúise.

In 2025, d’allmhairigh an tAontas níos mó ná 82.9 billiún méadar ciúbach (bmc) de GNL ó na Stáit Aontaithe. Is ionann sin agus 26.4% d’allmhairí gáis iomlána an Aontais agus beagnach 58% d’allmhairí GNL.

Allmhairí gáis an Aontais

Oibríonn an dá chomhpháirtí thrasatlantacha obair as lámha a chéile sa Chomhairle Fuinnimh idir an tAontas agus na Stáit Aontaithe, ar fóram é le haghaidh comhordú maidir le saincheisteanna straitéiseacha fuinnimh comhleasa agus le haghaidh comhar maidir le taighde agus forbairt.

• Cá as a dtagann fuinneamh an Aontais?
• Praghsanna fuinnimh agus slándáil an tsoláthair

Dul i ngleic le dúshláin slándála

Oibríonn an tAontas agus na Stáit Aontaithe i gcomhar le chéile chun dul i ngleic le dúshláin slándála dhomhanda, cuir i gcás an sceimhlitheoireacht, an t-antoisceachas foréigneach, leathadh arm núicléach agus an choireacht thrasnáisiúnta. Déanann siad bainistíocht freisin ar naisc dlútha slándála agus cosanta.

Tá $600 billiún infheistithe ag an Aontas agus ag na Stáit Aontaithe ar fud an domhain trí Chomhpháirtíocht G7 um Bonneagar agus Infheistíocht Dhomhanda, lena n-áirítear trí Global Gateway an Aontais.

Cogadh foghach na Rúise ar an Úcráin

Is sárú follasach ar Chairt na Náisiún Aontaithe agus ar an dlí idirnáisiúnta é cogadh foghach na Rúise ar an Úcráin. Is dúshlán mór é, ní hamháin do cheannasacht agus d’iomláine chríochach na hÚcráine, ach don ord idirnáisiúnta riailbhunaithe freisin.

Tacaíonn an tAontas agus na Stáit Aontaithe, i ndlúthchomhar lena gcomhpháirtithe G7, leis an Úcráin agus lena muintir, agus tá raon beart á gcur chun feidhme acu chun tuilleadh brú a chur ar an Rúis stop a chur lena cogadh foghach ar an Úcráin.

An dlúthpháirtíocht leis an Úcráin

Smachtbhannaí i gcoinne na Rúise

Chuir an tAontas, na Stáit Aontaithe agus comhpháirtithe eile atá ar aon intinn leo smachtbhannaí ollmhóra nach bhfacthas a leithéid riamh ar an Rúis mar fhreagairt ar a cogadh foghach ar an Úcráin.

Is é is aidhm do na bearta bonn eacnamaíoch na Rúise a lagú, teicneolaíochtaí agus margaí criticiúla a bhaint di, agus srian suntasach a chur lena cumas cogadh a fhearadh.

Díríonn smachtbhannaí an Aontais ar earnálacha airgeadais, trádála, fuinnimh, iompair, teicneolaíochta agus cosanta na Rúise, chomh maith le seirbhísí a chuirtear ar fáil don Rúis nó do náisiúnaigh Rúiseacha. Díríonn siad freisin ar dhaoine aonair agus ar na heintitis atá freagrach as gníomhaíochtaí a bhaineann an bonn d’iomláine chríochach, de cheannasacht nó de neamhspleáchas na hÚcráine nó ar bagairt iad na gníomhaíochtaí sin ar an méid sin.

Ar na daoine ar cuireadh smachtbhannaí orthu, tá Vladimir Putin, Uachtarán na Rúise, airí, gobharnóirí agus polaiteoirí áitiúla, comhaltaí de Dhúma Stáit na Rúise agus de Chomhairle Slándála na Rúise, bolscairí, ardoifigigh agus pearsanra míleata.

Comhordaíonn an tAontas a bheartas smachtbhannaí go dlúth leis na Stáit Aontaithe agus le comhpháirtithe eile G7 chun a dtionchar agus a n-éifeachtacht a mhéadú.

• Smachtbhannaí an Aontais i gcoinne na Rúise
• Smachtbhannaí na Stát Aontaithe i gcoinne na Rúise (rialtas na Stát Aontaithe)

Comhar idir daoine

Cothaíonn an tAontas agus na Stáit Aontaithe roinnt malartuithe idir daoine agus cláir acadúla, lena n-áirítear:

• Erasmus+ agus Erasmus Mundus
• gníomhaíochtaí Jean Monnet
• gníomhaíochtaí Marie Skłodowska-Curie
• clár Fulbright-Schuman
• clár an Aontais um chuairteoirí
• an clár um chuairteoirí le haghaidh cheannairí an Aontais agus na Stát Aontaithe atá ag teacht chun cinn

Féach freisin

• An caidreamh idir an tAontas Eorpach agus na Stáit Aontaithe (an tSeirbhís Eorpach Gníomhaíochta Seachtraí)
• Ionadaíocht taidhleoireachta an Aontais Eorpaigh sna Stáit Aontaithe (an tSeirbhís Eorpach Gníomhaíochta Seachtraí)
• Caidreamh trádála an Aontais leis na Stáit Aontaithe (an Coimisiún Eorpach)