Kunsill Impjiegi, Politika Soċjali, Saħħa u Affarijiet tal-Konsumatur (Saħħa), 29 ta' Marzu 2022

Riżultati ewlenin

Wara aġġornament dwar ir-rispons tal-Unjoni għall-konsegwenzi tal-gwerra fl-Ukrajna fuq is-saħħa, il-ministri qasmu l-fehmiet tagħhom dwar l-isfidi li jmiss tal-istrateġija ta’ solidarjetà tal-UE fir-rigward it-tilqim.

Is-sitwazzjoni sanitarja u umanitarja fl-Ukrajna

Il-Kummissjoni infurmat lid-delegazzjonijiet dwar is-sitwazzjoni sanitarja u umanitarja fl-Ukrajna u dwar l-azzjonijiet meħuda mill-Unjoni, li jinkludu partikolarment l-istabbiliment ta' mekkaniżmu ta' solidarjetà għat-trasferiment ta' pazjenti Ukreni, l-aċċess għat-tilqim kontra l-mard infettiv, b'mod partikolari għat-tfal, u inizjattivi relatati mas-saħħa mentali.

Il-ministri tennew l-impenn tagħhom li jappoġġaw lill-Ukrajna u l-popolazzjoni tagħha mil-lat ta' saħħa, u anke lill-istati membri tal-Unjoni bi fruntieri mal-Ukrajna li jinsabu fl-ewwel linja biex jiżguraw il-kura medika tar-refuġjati Ukreni.

• Vidjokonferenza informali tal-ministri għas-saħħa, 15 ta' Marzu 2022
• Nilqgħu lil dawk li qed jaħarbu mill-gwerra fl-Ukrajna: Inħejju l-Ewropa biex tkun tista' tissodisfa l-ħtiġijiet (Kummissjoni Ewropea)

L-istrateġija ta' solidarjetà tal-UE dwar it-tilqim

Sentejn wara t-tifqigħa tal-pandemija u sena wara t-tnedija tal-kampanji ta' tilqim fl-Unjoni, l-istati membri ddiskutew l-aġġornament tal-istrateġija tagħhom fir-rigward tal-akkwist tal-vaċċini u d-donazzjoni tagħhom biex jindirizzaw l-isfidi l-ġodda relatati mat-tilqim kontra l-COVID-19.

Is-sitwazzjoni epidemjoloġika marbuta mal-imxija tas-SARS-CoV-2 fl-Ewropa u madwar id-dinja qed titjieb u, fl-istess ħin, il-provvista tal-vaċċini issa qed taqbeż id-domanda kemm fl-istati membri kif ukoll fil-pajjiżi riċevituri tad-donazzjonijiet tal-Unjoni.

L-UE hija impenjata li tagħti 700 miljun doża sa nofs l-2022 biex tappoġġa l-mira stipulata mid-WHO li titlaqqam 70% tal-popolazzjoni tad-dinja. F'Marzu 2022, l-istati membri kienu diġà pprovdew aktar minn 400 miljun doża ta' vaċċini kontra l-COVID-19 lill-pajjiżi li l-aktar kellhom bżonnhom, u b'hekk l-UE kienet l-akbar donatur fid-dinja.

Il-kondiviżjoni tal-vaċċini mal-pajjiżi li għandhom bżonnhom tibqa' objettiv ewlieni tal-istrateġija tal-Unjoni dwar it-tilqim, iżda l-implimentazzjoni tagħha mistennija tevolvi biex issir aktar effettiva.

Xi bidliet li jistgħu jsiru fl-istrateġija ġenerali tal-UE dwar it-tilqim huma:

• l-adattament tal-kuntratti tax-xiri tal-vaċċini filwaqt li jitqies il-proporzjon kbir tal-popolazzjoni Ewropea mlaqqma bl-ewwel doża u r-riżerva ta' dożi miżmuma mill-istati membri;
• l-ottimizzazzjoni tal-iskedi tal-konsenja tad-donazzjoni tad-dożi u l-ġestjoni tal-ħażniet, flimkien mal-COVAX;
• djalogu regolari mal-intrapriżi biex ikunu jistgħu jsiru dawn l-adattamenti.

L-istati membri enfasizzaw ukoll l-importanza li dawn il-lievi jiġu evalwati fid-dawl ta' għarfien espert u monitoraġġ xjentifiċi kondiviżi fil-livell tal-Unjoni.

Fl-aħħar nett, l-Istati Membri insistew dwar il-ħtieġa li jkun hemm, malajr kemm jista' jkun, definizzjoni ta' strateġija komuni ta' tilqim, b'mod partikolari fir-rigward tal-possibbiltà ta' aċċess usa' għar-raba' doża.

• Solidarjetà dinjija matul il-pandemija tal-COVID-19 (informazzjoni ġenerali)

Ir-rispons Ewropew għall-mard rari (ikla ta' ħidma informali)

Aktar minn 30 miljun ċittadin Ewropew huma affettwati minn marda rari; 95% minnhom għadhom ma rċevewx trattament jew ma għandhomx kura personalizzata.

F'dan il-kuntest, il-ministri ddiskutew l-opportunità li jissaħħu l-kooperazzjoni u l-koordinazzjoni bejn l-istati membri u fil-livell tal-UE fil-qasam tal-mard rari. Il-Presidenza xtaqet torganizza dan id-dibattitu għax tqis li t-tisħiħ tal-azzjoni tal-Unjoni f'dan il-qasam huwa eżempju konkret tal-kontribut tal-Unjoni għas-saħħa pubblika għaċ-ċittadini Ewropej.

Il-kooperazzjoni bejn l-istati membri u l-istituzzjonijiet mediċi dwar il-mard rari diġà hija kruċjali biex jiġu megħjuna l-pazjenti kkonċernati, iżda għodod oħra jistgħu jkomplu jtejbu l-azzjoni tal-Unjoni. B'mod partikolari, il-ministri ddiskutew ir-rwol tal-ispazju Ewropew futur tad-data dwar is-saħħa fil-ġlieda kontra l-mard rari. L-aċċess għal data ta' kwalità għolja u f'qafas sigur dwar is-saħħa jista' għalhekk jikkontribwixxi biex jitħaffef l-aċċess għal terapiji ġodda, aktar siguri u aktar personalizzati.

Affarijiet oħra

Il-Presidenza għaddiet xi informazzjoni dwar id-Deċiżjoni adottata reċentement mill-Kunsill li tawtorizza l-ftuħ ta' negozjati f'isem l-Unjoni bil-ħsieb ta' ftehim internazzjonali dwar il-prevenzjoni, it-tħejjija u r-rispons għall-pandemiji u ta' emendi supplimentari għar-Regolamenti Internazzjonali tas-Saħħa.

• Trattat internazzjonali dwar il-prevenzjoni u t-tħejjija għall-pandemiji (informazzjoni ġenerali)
• Il-Kunsill jagħti l-approvazzjoni tiegħu biex jinbdew in-negozjati dwar trattat internazzjonali dwar il-pandemiji (stqarrija għall-istampa, 3 ta' Marzu 2022)

Il-Presidenza rrapportat dwar id-diversi konferenzi organizzati fil-qasam tas-saħħa minn Jannar 2022. Hija semmiet il-konferenzi dwar ir-reżiljenza tas-sistema tas-saħħa (18 ta' Jannar), is-saħħa diġitali (2 ta' Frar), is-saħħa globali (9 ta' Frar), il-mard rari (28 ta' Frar) u r-reżistenza għall-antibijotiċi (7 ta' Marzu) kif ukoll il-Kunsill informali tal-EPSCO fi Grenoble (10 ta' Frar) dwar il-bini ta' Unjoni tas-saħħa pubblika.

Fl-aħħar nett, il-Presidenza informat lill-ministri dwar in-negozjati li għaddejjin bejn il-Kunsill u l-Parlament Ewropew bil-ħsieb li jintlaħaq ftehim dwar pożizzjoni komuni fir-rigward ta' Regolament dwar theddid transkonfinali serju għas-saħħa.

Il-Kunsill adotta wkoll, mingħajr diskussjoni, il-punti fil-lista ta' punti A mhux leġiżlattivi.

Il-Kunsill adotta Regolament li jemenda r-Regolament (KE) Nru 138/2004 fir-rigward tal-kontijiet ekonomiċi reġjonali għall-agrikoltura.

• Ftehim dwar il-ġbir ta' data agrikola reġjonali (stqarrija għall-istampa, 29 ta' Novembru 2021),
• Regolament tal-Parlament Ewropew u tal-Kunsill li jemenda r-Regolament (KE) Nru 138/2004 fir-rigward tal-kontijiet ekonomiċi reġjonali għall-agrikoltura.