"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur, 14 ta' Marzu 2022
Riżultati ewlenin
Il-Kunsill iddiskuta s-sitwazzjoni fl-Ukrajna u l-miżuri ta' appoġġ finanzjarju maqbula fil-livell Ewropew għall-akkoljenza tar-refuġjati.
Il-Kunsill adotta wkoll approċċ ġenerali dwar abbozz ta' direttiva dwar it-titjib tal-bilanċ bejn il-ġeneri fil-bordijiet korporattivi. Il-ministri approvaw ukoll konklużjonijiet dwar rapport speċjali mill-Qorti Ewropea tal-Awdituri dwar il-qgħad fit-tul, adottaw ir-rapport konġunt dwar l-impjiegi 2022 u approvaw il-konklużjonijiet dwar l-istrateġija annwali għat-tkabbir sostenibbli u r-rapport konġunt dwar l-impjiegi għall-2022.
Il-ministri ħadu sehem f'żewġ dibattiti ta' orjentazzjoni bil-għan li jikkontribwixxu għar-realizzazzjoni tal-potenzjal sħiħ tal-Unjoni fil-qasam tal-impjiegi, minn naħa waħda, dwar il-ġlieda kontra d-diskriminazzjoni fl-aċċess għall-impjiegi u dwar il-promozzjoni tad-diversità fid-dinja tax-xogħol, u, min-naħa l-oħra, dwar il-parteċipazzjoni sħiħa ta' persuni akbar fl-età fis-suq tax-xogħol.
Ukrajna
Il-persuni spostati minħabba l-kunflitt fl-Ukrajna għandhom jingħataw assistenza ta' akkoljenza kif ukoll ta' appoġġ, l-aċċess għas-suq tax-xogħol u għall-akkomodazzjoni, kif ukoll assistenza soċjali, b'attenzjoni partikolari għat-tfal u l-persuni b'diżabilità. Il-ministri kellhom skambju ta' fehmiet wara l-preżentazzjoni mill-Kummissjoni tal-inizjattiva tagħha tat-8 ta' Marzu 2022. Din l-inizjattiva, imsejħa CARE, għandha l-għan li ġġedded il-flessibbiltajiet u r-riallokazzjonijiet baġitarji introdotti fil-fondi soċjali Ewropej fl-2020 biex tiġi ffinanzjata din l-assistenza għar-refuġjati.
Il-bilanċ bejn il-ġeneri fil-bordijiet korporattivi
Peress li n-nisa jirrappreżentaw biss 30.6 % tal-membri tal-bordijiet u 8.5 % tal-presidenti tal-bordijiet fl-Unjoni Ewropea, il-Kunsill qed jagħmel progress lejn leġiżlazzjoni tal-UE li ttejjeb il-bilanċ bejn in-nisa u l-irġiel f'dawn il-korpi. Fil-laqgħa tagħhom fi Brussell, il-ministri qablu dwar il-pożizzjoni tagħhom dwar dan l-abbozz ta' direttiva, u wittew it-triq għal negozjati mal-Parlament Ewropew bil-ħsieb ta' qbil finali dwar it-test.
Id-Direttiva għandha l-għan li tistabbilixxi mira kwantitattiva għas-sess l-anqas irrappreżentat fil-bordijiet tal-kumpaniji elenkati. Meta kumpanija ma tilħaqx l-objettivi stabbiliti, ser tkun meħtieġa tagħmel ħatriet jew elezzjonijiet għad-diretturi billi tapplika kriterji ċari, ifformulati f'termini newtrali u mhux ambigwi.
Il-ftehim tal-lum fil-Kunsill huwa pass importanti 'l quddiem. Nappella biex jibdew malajr in-negozjati mal-Parlament Ewropew sabiex tintlaħaq adozzjoni finali ta' din id-direttiva li permezz tagħha jkun jista' jiġi indirizzat is-saqaf tal-ħġieġ li n-nisa ta' spiss wisq għadhom jiffaċċjaw fid-dinja tax-xogħol.
Elisabeth Borne, Ministru għax-Xogħol, l-Impjiegi u l-Inklużjoni ta' Franza
Il-ġlieda kontra d-diskriminazzjoni fir-reklutaġġ u l-promozzjoni tad-diversità fid-dinja tax-xogħol
Minkejja l-korp vast ta' regoli Ewropej biex jiġi żgurat it-trattament ugwali, aktar minn 50 % taċ-ċittadini Ewropej jemmnu li d-diskriminazzjoni tippersisti f'pajjiżhom. Id-diskriminazzjoni fuq il-post tax-xogħol hija dovuta b'mod partikolari għal sterjotipi persistenti, għarfien insuffiċjenti fost l-impjegaturi u l-ħaddiema dwar l-obbligi u d-drittijiet tagħhom, u implimentazzjoni insuffiċjenti ta' miżuri kontra d-diskriminazzjoni. Il-ministri kellhom skambju ta' fehmiet dwar dan is-suġġett u eżaminaw b'mod partikolari azzjonijiet oħra li jistgħu jkunu meħtieġa fil-livell tal-Unjoni għall-ġlieda kontra d-diskriminazzjoni fil-qasam tal-impjiegi. Barra minn hekk, huma kellhom skambju ta' fehmiet dwar ir-rwol u l-mezzi li għandhom jiġu allokati lill-awtoritajiet nazzjonali biex tiġi żgurata l-implimentazzjoni effettiva tar-regoli tal-Unjoni.
Il-promozzjoni tal-parteċipazzjoni sħiħa ta' persuni akbar fl-età fis-suq tax-xogħol
Filwaqt li r-rata ta' impjieg tal-persuni ta' bejn il-55 u l-64 sena hija biss ta' 59.6 % (skont id-data tal-Eurostat) il-ministri ddiskutew x'miżuri tista' tieħu l-UE biex tistimola l-parteċipazzjoni tagħhom fis-suq tax-xogħol u t-taħriġ, kif ukoll kif jistgħu jiġu adattati l-ambjent tax-xogħol u l-kundizzjonijiet tax-xogħol tagħhom sabiex ikun aktar faċli għalihom li jibqgħu jaħdmu.
Il-Presidenza fakkret li kultura ta' tagħlim tul il-ħajja u l-investiment fis-saħħa u s-sigurtà fuq il-post tax-xogħol huma żewġ fatturi ewlenin biex in-nies jibqgħu jaħdmu. F'dan ir-rigward, il-qafas strateġiku tal-UE dwar is-saħħa u s-sikurezza okkupazzjonali għall-perjodu 2021-2027 jenfasizza l-ħtieġa li l-ambjent tax-xogħol u l-kundizzjonijiet tax-xogħol jiġu adattati sabiex tiġi evitata l-esklużjoni professjonali.
Rapport Speċjali tal-Qorti Ewropea tal-Awdituri
Il-Kunsill approva konklużjonijiet dwar rapport speċjali mill-Qorti Ewropea tal-Awdituri dwar miżuri meħuda mill-2014 mill-Fond Soċjali Ewropew (FSE) għall-ġlieda kontra l-qgħad fit-tul. Ir-rapport jikkonkludi li l-miżuri tal-FSE mhux dejjem ġew adattati biex jindirizzaw il-ħtiġijiet speċifiċi tal-persuni qiegħda fit-tul. Il-konklużjonijiet, fost punti oħra, jappellaw lill-istati membri biex jipprovdu valutazzjonijiet u gwida individwali dettaljati lil dawk li qed ifittxu impjieg bl-użu tar-riżorsi kollha disponibbli, inkluż programmi ta' titjib tal-ħiliet u taħriġ mill-ġdid vokazzjonali, bil-għan li jgħinu fit-tneħħija tal-ostakli soċjali u psikoloġiċi għar-ritorn lura x-xogħol.
Fil-kuntest tas-Semestru Ewropew tal-2022, il-Kunsill adotta r-rapport konġunt dwar l-impjiegi għall-2022 u approva konklużjonijiet dwar l-istħarriġ annwali għat-tkabbir sostenibbli u r-rapport konġunt dwar l-impjiegi għall-2022. Fil-konklużjonijiet tagħhom, il-ministri jappellaw lill-istati membri biex iqisu l-prijoritajiet tal-istħarriġ annwali dwar it-tkabbir sostenibbli u r-rapport konġunt dwar l-impjiegi u biex iżidu l-isforzi tagħhom biex jimplimentaw il-prinċipji tal-Pilastru Ewropew tad-Drittijiet Soċjali.
Il-presidenza u l-Kummissjoni infurmaw lid-delegazzjonijiet dwar is-Summit Soċjali Tripartitiku li jmiss.
Il-Kummissjoni Ewropea infurmat lill-ministri dwar l-implimentazzjoni tal-pjan ta' azzjoni tal-UE kontra r-razziżmu, ir-rapport annwali dwar l-ugwaljanza bejn il-ġeneri, il-komunikazzjoni reċenti tagħha bit-titlu "pjan ta' azzjoni għall-iżvilupp tal-ekonomija soċjali u ta' solidarjetà", il-garanzija Ewropea għat-tfal u l-miri nazzjonali għall-impjiegi, il-ħiliet u t-tnaqqis tal-faqar taħt il-pjan ta' azzjoni tal-Pilastru Ewropew tad-Drittijiet Soċjali.
Il-presidenti tal-Kumitat tal-Impjiegi u tal-Kumitat tal-Protezzjoni Soċjali ppreżentaw il-programmi ta' ħidma tal-kumitat tagħhom għall-2022.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-ftehim tal-lum fil-Kunsill huwa pass importanti 'l quddiem. Nappella biex jibdew malajr in-negozjati mal-Parlament Ewropew sabiex tintlaħaq adozzjoni finali ta' din id-direttiva li permezz tagħha jkun jista' jiġi indirizzat is-saqaf tal-ħġieġ li n-nisa ta' spiss wisq għadhom jiffaċċjaw fid-dinja tax-xogħol.
