Kunsill Affarijiet Barranin (Żvilupp), 21 ta' Novembru 2023, 21 ta' Novembru 2023

Riżultati prinċipali

Ġrajjiet Kurrenti

Il-Kunsill Affarijiet Barranin, fil-konfigurazzjoni tiegħu dwar l-iżvilupp, ġie infurmat dwar is-sitwazzjoni fl-Ukrajna, l-għajnuna lill-Palestina, l-implimentazzjoni tal-Pjan ta' Azzjoni dwar il-Ġeneru III u s-segwitu għas-Summit UE-CELAC.

Pilar Cancela Rodríguez - Segretarju tal-Istat għall-Kooperazzjoni Internazzjonali ta' Spanja - li ppresediet il-laqgħa f'isem ir-Rappreżentant Għoli Borrell, tat aġġornament dwar is-sitwazzjoni attwali tal-appoġġ tal-UE għar-rikostruzzjoni tal-Ukrajna, b'enfasi speċjali fuq l-aspetti tas-sigurtà u r-reżiljenza, u l-kuntest usa' tal-impenji tas-sigurtà tal-UE għall-Ukrajna filwaqt li enfasizza l-ħtieġa li l-Faċilità tiġi adottata malajr kemm jista' jkun biex jiġi żgurat finanzjament stabbli u prevedibbli għar-rikostruzzjoni tal-Ukrajna.

Il-ministri ġew aġġornati wkoll dwar ir-rieżami tal-Kummissjoni tal-kooperazzjoni għall-iżvilupp li għaddejja mal-Palestina. Huma enfasizzaw il-ħtieġa li jiġi żgurat l-aċċess għall-għajnuna umanitarja għall-istrixxa ta' Gaża.

Fl-okkażjoni tal-adozzjoni ta' rapport konġunt mis-Servizz Ewropew għall-Azzjoni Esterna u l-Kummissjoni Ewropea dwar l-evalwazzjoni ta' nofs it-terminu tal-Pjan ta' Azzjoni dwar il-Ġeneru III, il-Ministru Cancela Rodríguez, flimkien mal-Kummissarju għas-Sħubijiet Internazzjonali Jutta Urpilainen, infurmaw lill-ministri dwar l-implimentazzjoni tal-pjan matul l-ewwel sentejn tiegħu (2021-22) u ħabbru li ser jiġi estiż sal-2027.

Il-Ministru Cancela Rodríguez tat ukoll aġġornament qasir dwar is-Summit UE-CELAC li kien organizzat fi Brussell fis-17 u t-18 ta' Lulju 2023, filwaqt li laqgħet l-iffirmar tal-Programm ta' Assistenza Ewropa-Amerka Latina "EL PAcCTO" kontra l-Kriminalità Organizzata Tranżnazzjonali, li huwa l-element ewlieni fil-qasam tal-ġustizzja u s-sigurtà fil-kooperazzjoni tal-UE mal-Amerka Latina. Id-diskussjoni ttrattat ukoll is-sitwazzjoni attwali tal-Aġenda ta' Investiment tal-Global Gateway għall-Amerka Latina u l-Karibew.

Skambju informali mal-President tal-Bank Dinji Ajay Banga

L-iskambju sar permezz ta' vidjokonferenza fil-kuntest tar-riforma li għaddejja tal-banek multilaterali tal-iżvilupp, wara l-Laqgħat Annwali tal-Grupp tal-Bank Dinji u l-Fond Monetarju Internazzjonali (Marrakesh, 9-15 ta' Ottubru) u qabel il-COP28 dwar il-Klima f'Dubai (30 ta' Novembru - 12 ta' Diċembru). Dan serva bħala opportunità biex issir enfasi fuq il-viżjoni strateġika u l-ambizzjonijiet tal-President Banga għall-Bank Dinji, fuq it-tisħiħ tas-sħubijiet, inkluż mal-UE, u fuq it-tisħiħ tal-azzjoni dwar it-tibdil fil-klima u l-bijodiversità. Il-laqgħa ma' Ajay Banga kienet l-ewwel waħda fil-kariga tiegħu bħala President tal-Bank Dinji.

L-involviment ta' Tim Ewropa f'ambjenti kumplessi fl-Afrika

Waqt ikla ta' ħidma, il-Ministri kellhom skambju ta' fehmiet dwar l-involviment ta' Tim Ewropa f'ambjenti kumplessi fl-Afrika. Id-diskussjoni ffukat fuq il-"faxxa ta' instabbiltà" emerġenti mill-Golf tal-Guinea sal-Oċean Indjan, b'enfasi speċifika fuq is-Saħel, bl-għan li ssir ħidma lejn fehim komuni tal-isfidi f'dawk l-ambjenti u biex jiġu kondiviżi ideat għal approċċ koerenti ta' Tim Ewropa.

Il-ministri ttrattaw ukoll is-sitwazzjoni fil-Qarn tal-Afrika, li hija kkaratterizzata minn insigurtà akuta u ħtiġijiet umanitarji sinifikanti b'konflitti li għaddejjin fis-Sudan u s-Somalja. Il-ħtiġijiet umanitarji fl-Etjopja għadhom għoljin ukoll minħabba l-effetti ta' eventi klimatiċi, kunflitti u vjolenza interkomunali, u tifqigħat ta' mard.

Id-diskussjoni fost il-Ministri kkontribwiet għal fehim komuni tal-isfidi għall-involviment tal-UE f'ambjenti kumplessi u ffaċilitat l-iskambju ta' ideat inizjali għal approċċ koerenti, integrat iżda differenzjat ta' Tim Ewropa f'dawn il-pajjiżi.

Forum tal-Global Gateway

Barra minn hekk, taħt affarijiet oħra, il-Ministru Cancela Rodríguez u l-Kummissarju Urpilainen aġġornaw lill-Ministri dwar il-Forum tal-Global Gateway, li sar fi Brussell fil-25 u s-26 ta' Ottubru. Matul il-Forum, ġew iffirmati firxa ta' ftehimiet u impenji ta' investiment fl-oqsma tal-enerġija ekoloġika, ir-riċerka u l-edukazzjoni, il-materja prima kritika u l-kurituri tat-trasport ma' sħab minn madwar id-dinja.

Barra minn hekk, taħt Affarijiet oħra, il-Kummissarju Urpilainen laqgħet l-iffirmar, fil-15 ta' Novembru, tal-Ftehim ta' Samoa, li jissostitwixxi l-Ftehim ta' Cotonou

• Konklużjonijiet tal-Kunsill dwar l-Approċċ ta' Tim Ewropa (stqarrija għall-istampa, 21 ta' Novembru 2023)
• Konklużjonijiet tal-Kunsill dwar it-Tranżizzjoni Tripla: Tranżizzjoni soċjali, ekoloġika u diġitali (stqarrija għall-istampa, 21 ta' Novembru 2023)
• Konklużjonijiet tal-Kunsill dwar ir-Rapport Speċjali 14/2023 tal-Qorti Ewropea tal-Awdituri dwar il-Programmazzjoni tal-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali – Ewropa Globali
• Konklużjonijiet tal-Kunsill dwar ir-Rapport Speċjali 21/2023 tal-Qorti Ewropea tal-Awdituri rigward l-Inizjattiva Spotlight biex tintemm il-vjolenza kontra n-nisa u l-bniet