Kunsill Affarijiet Barranin (Difiża), 14 ta' Novembru 2023

Riżultati prinċipali

Appoġġ tal-UE għall-Ukrajna

Il-Kunsill Affarijiet Barranin fil-konfigurazzjoni tad-difiża tiegħu ddiskuta l-appoġġ tal-UE għall-Ukrajna, wara messaġġ qasir bil-vidjo mill-Ministru għad-Difiża tal-Ukrajna, Rustem Umierov.

Ir-Rappreżentant Għoli ssottolinja l-ħtieġa li jintlaħaq qbil b'mod urġenti dwar aktar appoġġ militari lill-Ukrajna, biex jiġu indirizzati l-ħtiġijiet immedjati tagħha fir-rigward tad-difiża tal-ajru, it-taħriġ, il-munizzjon u t-tagħmir għax-xitwa, u b'hekk tkun tista' tiddefendi ruħha kontra l-aggressjoni Russa.

Id-diskussjoni ministerjali mbagħad iffukat fuq impenji ta' sigurtà aktar fit-tul, fid-dawl tal-konklużjonijiet tal-Kunsill Ewropew ta' Ottubru, li stiednu lir-Rappreżentant Għoli, abbażi ta' qafas li għandu jiġi approvat mill-Kunsill, jikkonsulta mal-Ukrajna, u jirrapporta lura lill-Kunsill Ewropew f'Diċembru.

Il-ministri kellhom diskussjoni dwar il-Missjoni ta' Assistenza Militari tal-UE b'appoġġ għall-Ukrajna (EUMAM Ukraine), li diġà laħqet l-objettiv tagħha li tħarreġ 30 000 suldat Ukren, u issa għandha l-għan li tħarreġ 10 000 oħra, u evalwaw l-isforzi tal-UE biex twassal munizzjon lill-Ukrajna, fil-qafas tal-inizjattiva ta' Marzu 2023.

F'dan il-kuntest, ir-Rappreżentant Għoli kkonferma li l-implimentazzjoni kienet għaddejja u li l-istati membri kienu impenjati u magħqudin fl-appoġġ lill-Ukrajna sakemm ikun meħtieġ.

L-objettiv ta' miljun rawnd ta' munizzjon jibqa' l-għan politiku, li stabbilejna flimkien mal-istati membri. Huwa ambizzjuż, iżda jibqa' l-għan tagħna u nkomplu nistinkaw għalih, billi kuljum nagħmlu dak kollu possibbli sabiex inwasslu aktar munizzjon malajr.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli enfasizza li l-Industrija Ewropea tad-Difiża għandha l-kapaċità li twassal munizzjon għall-Ukrajna, iżda teħtieġ prevedibbiltà. Għal din ir-raġuni, l-UE qablet dwar u nediet l-Att b'Appoġġ għall-Produzzjoni tal-Munizzjon (ASAP) u l-Kummissjoni Ewropea ser tippreżenta strateġija industrijali tad-difiża Ewropea fil-bidu tal-2024.

Ġrajjiet kurrenti

Taħt ġrajjiet kurrenti, il-Ministri għad-Difiża tal-UE ddiskutew il-progress dwar il-Kapaċità ta' Skjerament Rapidu tal-UE (RDC), riżultat ewlieni tal-Boxxla Strateġika li ser jippermetti lill-UE tiskjera sa 5 000 truppa biex tirrispondi għal theddid imminenti u tirreaġixxi għal sitwazzjonijiet ta' kriżi. L-RDC għandha ssir kompletament operattiva fl-2025 u, fid-dawl ta' dik l-iskadenza, ir-Rappreżentant Għoli ħeġġeġ lill-istati membri biex jikkontribwixxu b'aktar forzi u kapaċitajiet u jlaħħqu mal-iskeda ta' żmien maqbula.

Ir-Rappreżentant Għoli mbagħad aġġorna lill-Kunsill dwar il-missjonijiet u l-operazzjonijiet tal-Politika ta' Sigurtà u ta' Difiża Komuni (PSDK) tal-UE, u l-impatt fuqhom ta' ambjent ġeopolitiku li qed jinbidel. Id-dibattitu ffoka, fost l-oħrajn, fuq is-Saħel, fejn l-UE ser tappoġġa l-istati kostali tal-Golf tal-Guinea fir-rispons tagħhom għall-ġlieda kontra t-tixrid tat-theddida terroristika, u l-operazzjoni militari tal-UE fil-Bożnija-Ħerzegovina, fejn il-mandat tal-EUFOR ALTHEA ġie estiż għal sena oħra.

Konklużjonijiet tal-Kunsill u deċiżjonijiet oħra

Fit-13 ta' Novembru, il-Kunsill approva konklużjonijiet dwar l-istrateġija spazjali tal-UE għas-sigurtà u d-difiża.

Fl-istess jum, il-Kunsill adotta wkoll rakkomandazzjoni li tivvaluta l-progress li sar mill-istati membri parteċipanti biex jissodisfaw l-impenji vinkolanti fil-qafas tal-kooperazzjoni strutturata permanenti (PESCO).

• Spazju: il-Kunsill japprova konklużjonijiet dwar l-istrateġija spazjali tal-UE għas-sigurtà u d-difiża (stqarrija għall-istampa, 14 ta' Novembru 2023)
• Kooperazzjoni fil-Qasam tad-Difiża: il-Kunsill jivvaluta l-progress fil-PESCO u jniedi r-rieżami strateġiku tagħha (stqarrija għall-istampa, 14 ta' Novembru 2023)

Kolazzjon ta' ħidma informali mas-Segretarju Ġenerali tan-NATO Jens Stoltenberg

Il-Ministri għad-Difiża tal-UE kellhom kolazzjon ta' ħidma informali mas-Segretarju Ġenerali tan-NATO, Jens Stoltenberg, u ddiskutew ir-reżiljenza tal-infrastruttura kritika u l-kapaċità tal-UE u n-NATO li jirrispondu għal dan it-theddid ġdid, fl-isfond ta' diversi inċidenti reċenti ta' sigurtà fil-Baħar Baltiku.

Bord ta' Tmexxija tal-Aġenzija Ewropea għad-Difiża

Il-Ministri għad-Difiża tal-UE ltaqgħu fil-Bord ta' Tmexxija tal-Aġenzija Ewropea għad-Difiża (EDA) taħt il-presidenza tar-Rappreżentant Għoli Borrell fil-kapaċità tiegħu bħala Kap tal-Aġenzija eżatt qabel il-laqgħa tal-KAB Difiża.

Il-Bord ta' Tmexxija approva l-Prijoritajiet tal-Iżvilupp tal-Kapaċitajiet tal-UE għall-2023. Id-dokument iservi bħala linja bażi għall-ippjanar tad-difiża fl-UE kollha, u l-inizjattivi kollha tal-UE relatati mad-difiża. It-22 prijorità jirriflettu r-realtajiet militari osservati fl-Ukrajna, jappoġġaw l-objettivi tad-difiża tal-UE, u huma mfassla biex iwasslu għal proġetti konkreti.

Il-Ministri għad-Difiża tal-UE approvaw ukoll dikjarazzjoni konġunta dwar it-tisħiħ tal-aċċess tal-EDTIB għall-finanzjament u l-kapaċità tagħha li tikkontribwixxi għall-paċi, l-istabbiltà u s-sostenibbiltà fl-Ewropa. Id-dikjarazzjoni tenfasizza l-importanza li jissaħħaħ l-aċċess tal-EDTIB kemm għall-finanzjament pubbliku kif ukoll dak privat, meqjusa bħala kritiċi għas-sostenn tal-operazzjonijiet industrijali, it-trawwim tal-innovazzjoni, u t-tisħiħ tal-kompetittività.

• Il-Ministri għad-Difiża tal-UE jaqblu li jagħtu prijorità lil 22 kapaċità militari biex jissaħħu l-forzi armati Ewropej (stqarrija għall-istampa, 14 ta' Novembru 2023, sit web tal-EDA)
• Appell tal-Ministri għad-Difiża tal-UE għat-Tisħiħ tal-Aċċess mis-Settur tad-Difiża għall-Finanzi (stqarrija għall-istampa, 14 ta' Novembru 2023, sit web tal-EDA)