"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-gwerra ta' aggressjoni tar-Russja kontra l-Ukrajna
Il-Kunsill Affarijiet Barranin iddiskuta l-aggressjoni Russa kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna Andrii Sybiha, li aġġorna lill-kontropartijiet tiegħu tal-UE dwar l-aħħar żviluppi kemm fuq il-livell politiku kif ukoll is-sitwazzjoni fuq il-post.
Ir-Rappreżentant Għoli ħabbret appoġġ politiku wiesa' għal inizjattiva ta' difiża sa €40 biljun b'appoġġ għall-Ukrajna, u l-ħtieġa li issa ssir ħidma fuq id-dettalji qabel il-Kunsill Ewropew li jmiss fl-20 u l-21 ta' Marzu.
Ir-Rappreżentant Għoli tenniet il-pożizzjoni pożittiva tal-UE lejn it-taħditiet ta' Jeddah, inkluż il-proposti għal ftehim ta' waqfien mill-ġlied, u enfasizzat li issa l-mossa li jmiss f'idejn ir-Russja.
Dak li naraw bħalissa huwa li r-Russja ma tridx verament il-paċi, u […] ma tistax verament tiġi fdata. Huma ser jaħtfu din l-opportunità biex jippreżentaw kull tip ta' rikjesta, u dak li diġà qed naraw huwa li qed jippreżentaw talbiet li jirrappreżentaw l-għanijiet aħħarija tagħhom. Għalhekk ejja naraw kif tkompli tevolvi dis-sitwazzjoni.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill Affarijiet Barranin kellu skambju ta' fehmiet dwar il-Lvant Nofsani, u b'mod partikolari s-sitwazzjoni f'Iżrael u Gaża. Ir-Rappreżentant Għoli kkundannat il-politiċizzazzjoni tal-għajnuna umanitarja, u enfasizzat li l-għajnuna umanitarja għandha tilħaq lin-nies fil-bżonn f'Gaża.
Il-ministri laqgħu l-Pjan Għarbi għall-irkupru u r-rikostruzzjoni ta' Gaża ppreżentat fis-summit tal-Kajr fl-4 ta' Marzu bħala bażi tajba. Ir-Rappreżentant Għoli enfasizzat li hemm elementi li jeħtieġ li jiġu diskussi aktar, u li huwa importanti ħafna għall-Ewropej li l-Ħamas ma jkollu l-ebda rwol futur fil-bini mill-ġdid ta' Gaża.
Qabel id-disa'konferenza ta' Brussell, il-Kunsill Affarijiet Barranin iddiskuta l-aħħar żviluppi fis-Sirja fid-dawl tal-mewġa reċenti ta' vjolenza fir-reġjun kostali tas-Sirja.
Din hija l-pożizzjoni tagħna bħalissa: qed ngħinu lis-Sirja timxi 'l quddiem. Naturalment, irridu naraw li t-tmexxija attwali qed tieħu bis-serjetà kollha l-obbligu li dawk li kienu responsabbli għall-vjolenza jagħtu kont ta' għemilhom, u nixtiequ naraw ukoll aktar inklużività mill-gvern, minħabba li s-Sirja għandha ħafna gruppi differenti.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill kellu skambju ta' fehmiet dwar il-politika tal-UE lejn l-Iran, b'enfasi fuq diversi elementi bħal: l-appoġġ militari tal-Iran lir-Russja, id-detenzjonijiet arbitrarji tiegħu ta' ċittadini tal-UE, l-operazzjonijiet ibridi fl-UE, ir-rwol destabbilizzanti tiegħu fir-reġjun tal-Lvant Nofsani, kif ukoll il-kapaċitajiet nukleari tiegħu.
Il-Kunsill żied lil AI Azaim for Media Production mal-lista ta' persuni, gruppi, impriżi u entitajiet assoċjati mal-ISIL (Da'esh) u Al-Qaeda, li huma soġġetti għal miżuri restrittivi tal-UE.
Il-Kunsill elenka disa' persuni u entità waħda responsabbli għal ksur u abbużi tad-drittijiet tal-bniedem u għas-sostenn tal-konflitt armat, l-instabbiltà u l-insigurtà fir-Repubblika Demokratika tal-Kongo.
Il-Kunsill adotta deċiżjoni li tawtorizza lill-Kummissjoni Ewropea tieħu sehem, f'isem l-Unjoni, fin-negozjati għal strument internazzjonali li jistabbilixxi Kummissjoni Internazzjonali għat-Talbiet għall-Ukrajna.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
