Kunsill Ewropew, 13-14/12/2018, 13 u 14 ta' Diċembru 2018

Riżultati ewlenin

Il-Kunsill Ewropew tat-13-14 ta' Diċembru 2018 iffoka fuq il-baġit fit-tul tal-UE, ir-relazzjonijiet esterni, il-migrazzjoni u s-suq uniku. Il-mexxejja tal-UE27 iddiskutew ukoll il-Brexit nhar il-Ħamis u ż-żona tal-euro nhar il-Ġimgħa.

• Konklużjonijiet tal-Kunsill Ewropew, 13-14/12/2018
• Konklużjonijiet tal-Kunsill Ewropew (Art. 50), 13/12/2018
• Kummenti mill-President Donald Tusk wara l-laqgħat tal-Kunsill Ewropew u tas-Summit tal-Euro, 14/12/2018
• Ittra mill-President Tusk lill-President Tajani li tirrapporta dwar l-eżitu tal-Kunsill Ewropew ta' Diċembru, 20 ta' Diċembru 2018

Fil-bidu tal-laqgħa, il-Kanċillier Sebastian Kurz, li jirrappreżenta l-presidenza Awstrijaka, ipprovda ħarsa ġenerali lejn il-progress fl-implimentazzjoni ta' konklużjonijiet ta' qabel tal-Kunsill Ewropew.

Baġit tal-UE għall-2021-2027

Il-Kunsill Ewropew kellu l-ewwel skambju sostanzjali ta' fehmiet dwar il-qafas finanzjarju pluriennali 2021-2027 abbażi ta' rapport ta' progress mill-presidenza tal-Kunsill. Huwa appella lill-presidenza li jmiss biex tkompli bil-ħidma intensiva mwettqa tul is-sena li għaddiet fuq il-QFP futur, il-baġit fit-tul tal-UE. Il-mexxejja għandhom l-għan li jilħqu qbil fil-Kunsill Ewropew fil-ħarifa tal-2019.

Relazzjonijiet esterni

Il-mexxejja tal-UE ddiskutew it-tħejjijiet għas-summit li jmiss mal-Lega tal-Istati Għarab fl-24 u l-25 ta' Frar 2019.

Il-Kanċillier Merkel u l-President Macron informaw lill-mexxejja dwar l-implimentazzjoni tal-ftehimiet ta' Minsk. Peress li ma sar ebda progress, il-Kunsill Ewropew ħa d-deċiżjoni politika li s-sanzjonijiet ekonomiċi kontra r-Russja jiġu prorogati.

Huwa esprima t-tħassib serju tiegħu dwar l-eskalazzjoni fl-Istretti ta' Kerch u l-Baħar ta' Azov. Appella għall-ħelsien immedjat tal-baħrin Ukreni kollha miżmuma kif ukoll ir-ritorn tal-bastimenti maħtufa u l-passaġġ ħieles għall-vapuri kollha mill-Istretti ta' Kerch.

Il-Kunsill Ewropew laqa' l-vot pożittiv fil-Parlament Ewropew dwar il-ftehim kummerċjali bejn l-UE u l-Ġappun u stenna b'interess id-dħul fis-seħħ imminenti tiegħu.

• Infografika - kummerċ bejn l-UE u l-Ġappun: fatti u ċifri

Brexit

Il-mexxejja tal-UE27 kellhom laqgħa straordinarja tal-Kunsill Ewropew fil-format tal-Artikolu 50 biex jiddiskutu l-Brexit. Huma reġgħu kkonfermaw il-konklużjonijiet tal-25 ta' Novembru 2018, fejn approvaw il-ftehim dwar il-ħruġ kif ukoll id-dikjarazzjoni politika.

"L-Unjoni ssostni dan il-ftehim u biħsiebha tipproċedi bir-ratifika tiegħu. Mhuwiex miftuħ għal negozjar mill-ġdid." Konklużjonijiet tal-Kunsill Ewropew (Art. 50), 13 ta' Diċembru 2018

Il-Kunsill Ewropew enfasizza li l-garanzija ta' kontinġenza kienet maħsuba bħala assigurazzjoni biex tiġi evitata fruntiera fiżika fuq il-gżira tal-Irlanda u tiżgura l-integrità tas-suq uniku. "Jekk madankollu l-garanzija ta' kontinġenza tiġi attivata, din ser tapplika b'mod temporanju, sakemm u dment li ma tiġix sostitwita minn ftehim sussegwenti li jiżgura li tiġi evitata fruntiera fiżika," qalu l-mexxejja tal-UE27 fil-konklużjonijiet.

Il-mexxejja ddiskutew ukoll l-istat ta' tħejjija tagħhom għal xenarju fejn ma jintlaħaq ebda ftehim.

• Laqgħa straordinarja tal-Kunsill Ewropew (Art. 50), 13/12/2018

Suq uniku

Il-Kunsill Ewropew appella għall-kontinwazzjoni tal-aġenda tas-suq uniku li pprovda ġid, tkabbir u impjiegi fl-UE matul l-aħħar 25 sena. Il-mexxejja jridu jaraw progress fl-oqsma li ġejjin:

• il-ħidma leġislattiva li għaddejja
• koordinazzjoni ma' oqsma ta' politika relatati
• implimentazzjoni fil-livell nazzjonali
• il-kompetittività globali
• it-trasformazzjoni diġitali

Il-Kunsill Ewropew qabel li jorganizza diskussjoni profonda fir-rebbiegħa tal-2019, bi tħejjija għall-Aġenda Strateġika li jmiss.

• Strateġija tas‑suq uniku għal oġġetti u s-servizzi (informazzjoni ġenerali)

Migrazzjoni

Il-wasliet irregolari tnaqqsu għal-livelli ta' qabel il-kriżi bis-saħħa ta' kontrolli fil-fruntieri esterni, il-ġlieda kontra l-faċilitaturi ta' dħul klandestin u l-kooperazzjoni msaħħa mal-pajjiżi ta' oriġini u ta' tranżitu. Il-mexxejja appellaw sabiex il-politika tal-UE dwar il-migrazzjoni esterna tiġi żviluppata aktar u implimentata.

Fir-rigward tal-politiki interni tal-Unjoni, il-mexxejja stiednu lill-koleġislaturi biex jikkonkludu malajr in-negozjati dwar il-Gwardja Ewropea tal-Fruntiera u tal-Kosta (EBCG).

Appellaw ukoll għal aktar sforzi biex jiġu konklużi n-negozjati dwar l-Aġenzija għall-Asil, id-direttiva dwar ir-ritorn u r-riforma tas-sistema tal-asil tal-UE.

• Politika tal-UE dwar il-migrazzjoni (informazzjoni ġenerali)

It-tibdil fil-klima

Fid-dawl tal-preżentazzjoni tal-Komunikazzjoni tal-Kummissjoni "Pjaneta Nadifa għal Kulħadd" u b'kont meħud tal-eżitu tal-COP24 f'Katowice, il-mexxejja tal-UE stiednu lill-Kunsill biex jaħdem fuq l-elementi msemmijin fil-komunikazzjoni. Fl-ewwel semestru tal-2019 il-Kunsill Ewropew ser jipprovdi gwida dwar id-direzzjoni ġenerali u dwar il-prijoritajiet politiċi. Din ser tippermetti li l-UE tippreżenta strateġija fit-tul sal-2020 f'konformità mal-Ftehim ta' Pariġi.

• L-indirizzar tat-tibdil fil-klima fl-UE (informazzjoni ġenerali)

Sigurtà u difiża

Il-kapijiet laqgħu b'sodisfazzjon il-progress miksub fil-qasam tas-sigurtà u d-difiża, bħalma huma l-implimentazzjoni tal-kooperazzjoni strutturata permanenti (PESCO) u l-isforzi biex titjieb il-mobbiltà militari. Il-mexxejja approvaw il-patt dwar id-dimensjoni ċivili tal-PSDK.

Dawn l-inizjattivi jgħinu biex tissaħħaħ l-awtonomija strateġika tal-UE u l-kapaċità tagħha li taġixxi bħala fornitur tas-sigurtà, filwaqt li jsaħħu l-kooperazzjoni bejn l-UE u n-NATO.

• Kooperazzjoni tal-UE dwar is-sigurtà u d-difiża (informazzjoni ġenerali)

Id-diżinformazzjoni

Is-sistemi demokratiċi tagħna huma mhedda mit-tifrix tad-diżinformazzjoni. Il-mexxejja tal-UE enfasizzaw il-ħtieġa għal rispons urġenti għad-diżinformazzjoni b'rispett sħiħ tad-drittijiet fundamentali. Huma appellaw għal:

• implimentazzjoni rapida tal-pjan ta' azzjoni konġunt dwar id-diżinformazzjoni ppreżentat mill-Kummissjoni u r-Rappreżentant Għoli
• azzjoni rapida u deċiżiva kemm fil-livell Ewropew kif ukoll dak nazzjonali biex tiżgura elezzjonijiet Ewropej u nazzjonali ħielsa u ġusti

Il-Kunsill huwa mistieden ikompli l-ħidma fuq din il-kwistjoni u jirrapporta lura lill-Kunsill Ewropew f'Marzu 2019.

Il-ġlieda kontra r-razziżmu u l-ksenofobija

Il-mexxejja tal-UE kkundannaw il-forom kollha ta' antisemitiżmu, razziżmu u ksenofobija u enfasizzaw l-importanza tal-ġlieda kontra l-intolleranza. Huma laqgħu l-adozzjoni fis-6 ta' Diċembru 2018 tad-Dikjarazzjoni tal-Kunsill dwar il-ġlieda kontra l-antisemitiżmu.

Konsultazzjonijiet maċ-Ċittadini

Il-mexxejja tal-UE vvalutaw l-eżitu tad-Djalogi maċ-Ċittadini u l-Konsultazzjonijiet maċ-Ċittadini li saru fl-istati membri tal-UE. L-eżerċizzju għen biex jiġu identifikati għadd ta' elementi ta' tħassib u aspettattivi min-naħa taċ-ċittadini f'termini ta' riżultati konkreti mill-UE. Fil-laqgħa informali tagħhom f'Sibiu fid-9 ta' Mejju 2019, il-kapijiet ta' stat jew ta' gvern ser jiddiskutu l-prijoritajiet għaċ-ċiklu istituzzjonali li jmiss, bil-ħsieb li jaqblu dwar l-Aġenda Strateġika li jmiss f'Ġunju 2019.

• Konsultazzjonijiet maċ-ċittadini - Rapport Konġunt

Summit tal-Euro

Il-mexxejja tal-UE adottaw dikjarazzjoni li tapprova l-elementi kollha tar-rapport tal-Grupp tal-Euro dwar l-approfondiment tal-Unjoni Ekonomika u Monetarja, inkluż dokument dwar il-kondizzjonijiet tar-riforma tal-mekkaniżmu Ewropew ta' stabbiltà, it-termini ta' referenza tal-garanzija ta' kontinġenza komuni għall-fond uniku ta' riżoluzzjoni u t-triq 'il quddiem dwar l-unjoni bankarja.

Barra minn hekk, il-mexxejja taw mandat lill-Grupp tal-Euro għal aktar ħidma fuq strument baġitarju għall-konverġenza u l-kompetittività għaż-żona tal-euro, fil-kuntest tal-qafas finanzjarju pluriennali.

• Summit tal-Euro, 14/12/2018